ମୁମ୍ବାଇ: ଏବର୍ଷ ଖ୍ରୀଷ୍ଟମାସ ଅବସରରେ ଦର୍ଶକ ବକ୍ସ ଅଫିସରେ ବି-ଟାଉନର ଚର୍ଚ୍ଚିତ ଲଭବାର୍ଡ ରଣବୀର କପୁର ଓ ଆଲିୟା ଭଟ୍ଟଙ୍କ ବହୁପ୍ରତିକ୍ଷିତ ଫିଲ୍ମ ‘ବ୍ରହ୍ମାସ୍ତ୍ର’ ଦେଖିଥାଆନ୍ତେ । କିନ୍ତୁ କିଛି ଦିନ ପୂର୍ବରୁ ମେକର୍ସ ଏହାର ରିଲିଜ ତାରିଖ ଆସନ୍ତା ବର୍ଷ ଘୋଷଣା କରି ଦର୍ଶକଙ୍କୁ ନିରାଶ କରିଥିଲେ । ଫିଲ୍ମର ରିଲିଜ ତାରିଖ ମେକର୍ସ ସୁପରଷ୍ଟାର ସଲମାନ ଖାନଙ୍କ ଚର୍ଚ୍ଚିତ ଫିଲ୍ମ ‘ଦବଙ୍ଗ 3’ର ରିଲିଜକୁ ଦୃଷ୍ଟିରେ ରଖି ଘୁଞ୍ଚାଇ ନେଇଛନ୍ତି । କିନ୍ତୁ ଇତିମଧ୍ୟରେ ଦର୍ଶକଙ୍କ ପାଇଁ ଏକ ଗୁଡନ୍ୟୁଜ ସାମ୍ନାକୁ ଆସିଛି । ଯାହା ଶୁଣି ଖୁସି ହୋଇଯିବେ ଦର୍ଶକ ।
ଆଜ୍ଞା ହଁ, ଆୟନ ମୁଖାର୍ଜୀଙ୍କ ନିର୍ଦ୍ଦେଶିତ ଏହି ଫିଲ୍ମରେ ବି-ଟାଉନର ବାଦଶାହ ଶାହରୁଖ ଖାନ ଏଣ୍ଟ୍ରି ମାରିବେ । ଫିଲ୍ମରେ ଶାହରୁଖ ଅତିଥି ଅଭିନେତା ରୂପେ ନଜର ଆସିବେ । ଯାହାର ଘୋଷଣା ସେ ଆସନ୍ତା କାଲି(ଶନିବାର) ତଥା ନିଜ ଜନ୍ମଦିନ ଅବସରରେ କରି ଫ୍ୟାନ୍ସଙ୍କୁ ସରପ୍ରାଇଜ ଦେଇପାରନ୍ତି । ଶାହରୁଖ ଶେଷଥର ଆନନ୍ଦ ଏଲ ରାୟଙ୍କ ଫ୍ଲପ ଫିଲ୍ମ ‘ଜିରୋ’ରେ ନଜର ଆସିଥିଲେ ।
ଏହାବ୍ୟତୀତ ‘ବ୍ରହ୍ମାସ୍ତ୍ର’ରେ ବିଗ ବି ଅମିତାଭ ବଚ୍ଚନ ତେଲୁଗୁ ସୁପରଷ୍ଟାର ନାଗାର୍ଜୁନ ଓ ମୌନୀ ରାୟଙ୍କୁ ମଧ୍ୟ ମୁଖ୍ୟ ଭୂମିକାରେ ଦେଖିବାକୁ ମିଳିବ । ଏହାର କାହାଣୀ ଥ୍ରିଲର, ଡ୍ରାମାକୁ ନେଇ ଆଧାରିତ ।
