ମୁମ୍ବାଇ: ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲାରେ ପୁଣି ଫାଶିରୁ ବଞ୍ଚିଯାଇଛନ୍ତି ଦୋଷୀ। ମଙ୍ଗଳବାର ଏହି ଚାରି ଦୋଷୀଙ୍କୁ ଫାଶି ଦିଆଯାଇଥାଆନ୍ତା । ହେଲେ ସୋମବାର ଫାଶି ଆଦେଶକୁ ଟାଳି ଦିଆଯାଇଥିଲା । ପଟିଆଲା ହାଉସ କୋର୍ଟ ଆଗାମୀ ଆଦେଶ ପର୍ଯ୍ୟନ୍ତ ଫାଶି ଉପରେ ରୋକ ଲଗାଇଛି। ତୃତୀୟଥର ନିର୍ଭୟା ଦୋଷୀ ଫାଶିରୁ ବଞ୍ଚିଯାଇଛନ୍ତି । ନିର୍ଭୟା ଗଣଦୁଷ୍କର୍ମର ଅନ୍ୟତମ ଦୋଷୀ ପବନ କୁମାର ଗୁପ୍ତା ରାଷ୍ଟ୍ରପତିଙ୍କ ନିକଟରେ ରାଜକ୍ଷମା ଆବେଦନ କରିଛି। ପବନଙ୍କ ପାଇଁ ତାଙ୍କ ଓକିଲ ଓ ପିତା ଏହି ରାଜକ୍ଷମା ସୋମବାର ଦ୍ବିପହରରେ ଦାୟର କରିଥିଲେ। ବର୍ତ୍ତମାନ ରାଷ୍ଟ୍ରପତି ରାମନାଥ କୋବିନ୍ଦ ଛତିଶଗଡ ଯାତ୍ରାରେ ଅଛନ୍ତି । ସେ ଫେରିବା ପରେ ଏହି ଯାଚିକା ଉପରେ ଆଗାମୀ ନିଷ୍ପତ୍ତି ନିଆଯିବ। ଫାଶୀ ଟଳିଯିବାରୁ ଖପ୍ପା ନଜର ଆସୁଛନ୍ତି ଦେଶବାସୀ।
ଏବେ ଏହି ମାମଲାରେ ବଲିଉଡର ବିଶିଷ୍ଟ ଅଭିନେତା ଋଷି କପୁରଙ୍କ ବୟାନ ସାମ୍ନାକୁ ଆସିଛି । ସେ ବାରମ୍ବାର ଫାଶୀ ଟଳୁଥିବାରୁ ଖୁବ୍ କ୍ରୋଧିତ ଅଛନ୍ତି । ସେ ନିଜ ରାଗ ଆକ୍ସନ ହିରୋ ସନ୍ନି ଦେଓଲ ଓ ନିଜ ଅଭିନୀତ ଫିଲ୍ମ ‘ଦାମିନୀ’ର ଫେମସ ଡାଇଲଗ ଜରିଆରେ ପ୍ରକାଶ କରିଛନ୍ତି।
ସେ ଟ୍ବିଟ କରି ଲେଖିଛନ୍ତି, ‘ନିର୍ଭୟା କେସ। ତାରିଖ ପେ ତାରିଖ, ତାରିଖ ପେ ତାରିଖ, ତାରିଖ ପେ ତାରିଖ । ଦାମିନୀ ଏହା ଖରାପ କଥା ।’ ତାଙ୍କର ଏହି ଟ୍ବିଟର ଅନେକ ଲୋକ ବର୍ତ୍ତମାନ ସମର୍ଥନ କରିଛନ୍ତି । ସମସ୍ତେ ତାଙ୍କ ଏହି କଥାରେ ଏକମତ ।
ପ୍ରକାଶ ଥାଉକି ଋଷି ସବୁବେଳେ ସୋସିଆଲ ମିଡିଆରେ ଆକ୍ଟିଭ ରୁହନ୍ତି । ଆଉ ସାମାଜିକ ପ୍ରସଙ୍ଗରେ ବିନ୍ଦାସ ଅନ୍ଦାଜରେ ନିଜ ପ୍ରତିକ୍ରିୟା ରଖନ୍ତି। ସେ ଗତ ବର୍ଷ ନ୍ୟୁୟର୍କରେ କ୍ୟାନ୍ସର ଚିକିତ୍ସା କରି ଫେରିଥିଲେ ।
