ମୁମ୍ବାଇ: ନିଶାକାରବାର ନେଇ ଅନ୍ୟ ଝିଅଙ୍କ ଉପରେ ଆଙ୍ଗୁଳି ଉଠାଉଥିବା ଅଭିନେତ୍ରୀ ରିଆ ଚକ୍ରବର୍ତ୍ତୀ ଏବେ ଖୋଦ ଏହି ଜାଲରେ ଫସିଛନ୍ତି । ନିଶା କାରବାର ପାଇଁ ଜେଲରେ ଥିବା ଜଣେ ଝିଅ ବିଷୟରେ ଭାଇରାଲ ହେବାରେ ଲାଗିଛି ଅଭିନେତ୍ରୀ ଚକ୍ରବର୍ତ୍ତୀଙ୍କ ଏକ ପୁରୁଣା ଟ୍ବିଟ । ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ଦ୍ବାରା ରିଆ ଗିରଫ ହେବା ପରେ ତାଙ୍କର ଏହି ଟ୍ବିଟଟି ସୋସିଆଲ ମିଡିଆରେ ସାମ୍ନାକୁ ଆସିଛି । 2009 ମସିହାରେ କରାଯାଇଥିବା ଏହି ଟ୍ବିଟରେ ଡ୍ରଗ୍ସ କାରବାର ପାଇଁ ସାଢେ 4 ବର୍ଷ ଜେଲ ଦଣ୍ଡ ଭୋଗିଥିବା ଜଣେ ଭାରତୀୟ ଝିଅର କାହାଣୀ ଶୁଣିବା ବିଷୟରେ ଉଲ୍ଲେଖ କରାଯାଇଛି ।
ରିଆଙ୍କ ଏହି ଟ୍ବିଟରେ ଲେଖାଯାଇଛି ଯେ, ଜଣେ ଭାରତୀୟ ଝିଅର ଏକ ଅଦ୍ଭୁତ ଭୟାନକ କାହାଣୀ ସାମ୍ନାକୁ ଆସିଛି .... ଯିଏ ନିଶା କାରବାର ପାଇଁ ସାଢେ 4 ବର୍ଷ ଜେଲ ଦଣ୍ଡ ଭୋଗିଥିଲେ ।
ମଙ୍ଗଳବାର ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ଜଡିତ ଥିବା ଡ୍ରଗ୍ସ ଲିଙ୍କରେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ତାଙ୍କୁ ଗିରଫ କରିଥିଲା । ସେହିପରି ଗୋଟିଏ ରାତି ଏନସିବି କାର୍ଯ୍ୟାଳୟରେ ବିତାଇବା ପରେ ତାଙ୍କୁ ଭାୟକୁଲ୍ଲା ଜେଲକୁ ପଠାଯାଇଛି ।
ପ୍ରକାଶ ଥାଉକି ନାର୍କୋଟିକ୍ ଡ୍ରଗ୍ ଏବଂ ସାଇକୋଟ୍ରୋପିକ୍ ପଦାର୍ଥ ଅଧିନିୟମ (ଏନଡିପିସି)ର ଧାରା 89 (ସି), 20 (ବି), 27 (ଏ), 28 ଏବଂ 29 ଅନୁଯାୟୀ ରିଆଙ୍କୁ ଗିରଫ କରାଯାଇଥିଲା । ଏହାସହ ସେପ୍ଟେମ୍ବର 22 ପର୍ଯ୍ୟନ୍ତ 14 ଦିନିଆ ନ୍ୟାୟିକ ହେପାଜତକୁ ରିଆଙ୍କୁ ପଠାଯାଇଛି ।
