ମୁମ୍ବାଇ: ସମସ୍ୟା ଘେରରେ ସୁପରଷ୍ଟାର ସଲମାନ ଖାନଙ୍କ ରିୟାଲିଟି ଶୋ ‘ବିଗବସ 14’। ସବୁବେଳେ ବିବାଦରେ ଆସୁଥିବା ଏହି ଶୋକୁ ନେଇ ଦେଖିବାକୁ ମିଳିଛି ନୂଆ ବିବାଦ । ଏଥର ମରାଠୀ ଭାଷାକୁ ନେଇ ଗାୟକ ଜାନ କୁମାର ସାନୁଙ୍କ ମନ୍ତବ୍ୟ ପାଇଁ କଲର୍ସ ଟିଭି ଚ୍ୟାନେଲ ବୁଧବାର କ୍ଷମା ମାଗିଛି । ଖାଲି ଏତିକି ନୁହେଁ ପୁଅ ପାଇଁ ହାତ ଯୋଡି କ୍ଷମା ପ୍ରାର୍ଥନା କରିଛନ୍ତି ଲୋକପ୍ରିୟ ପ୍ଲେବ୍ୟାକ ସିଙ୍ଗର କୁମାର ସାନୁ ।
ସେ ନିଜର ଏକ ଭିଡିଓ ଟ୍ବିଟରରେ ସେୟାର କରି କହିଛନ୍ତି, ‘ନମସ୍କାର ଉଦ୍ଧବ ସାର୍ ମୁଁ କୁମାର ସାନୁ ମତେ ଭଲ ଲାଗିଲା ଯେ ବିଏମସି କୋରୋନା ସମୟରେ ମୋର ସମ୍ପୂର୍ଣ୍ଣ ଧ୍ୟାନ ରଖିଥିଲା । ସେହି ସବୁ ଜିନିଷ ପାଇଁ ମୁଁ ଧନ୍ୟବାଦ ଜଣାଉଛି । ମୁଁ ବିଏମସି ପାଇଁ କୋରୋନାରୁ ମୁକ୍ତ ହୋଇ ଘରକୁ ଫେରିଥିଲି । ମୋ ପୁଅ ଜାନ ଅପମାନଜନକ କଥା କହିଛନ୍ତି । ଆମେ 40-41 ବର୍ଷରେ ଏମିତି ଭାବିନାହୁଁ । ଯେଉଁ ମୁମ୍ବାଇ ସହର, ମୁମ୍ବା ଦେବୀ ମତେ ଆଶୀର୍ବାଦ ଦେଇଛନ୍ତି । ଆଉ ମତେ ସଫଳତା ଯୋଗାଇଛନ୍ତି, ସେହି ମୁମ୍ବା ଦେବୀ ଓ ମହାରାଷ୍ଟ୍ର ବିରୋଧରେ ମୁଁ ଏମିତି କୌଣସି କଥା ଭାବି ମଧ୍ୟ ପାରିବିନାହିଁ । କିନ୍ତୁ ମୋ ପୁଅ ମରାଠୀ ଭାଷା ବିରୋଧରେ କହିଛନ୍ତି । ଏଥିପାଇଁ ମୁଁ କହିବାକୁ ଚାହୁଁଛି ଯେ ଆମ ସମସ୍ତେ ସବୁ ଭାଷାକୁ ଭଲ ପାଉ। ମୁଁ ସବୁ ଭାଷାରେ ମଧ୍ୟ ଗୀତ ଗାଇଛି । ମୁଁ ପାଖାପାଖି 27 ବର୍ଷରୁ ପୁଅ ଠୁ ଅଲଗା ଅଛି । ମତେ ଜଣାନାହିଁ ଯେ ତାଙ୍କୁ ମା' କିପରି ଶିକ୍ଷା ଦେଇଛନ୍ତି । ହେଲେ ଜଣେ ବାପା ରୂପେ ମୁଁ କେବଳ ଆପଣଙ୍କୁ କ୍ଷମା ମାଗିପାରିବି । ଜାନଙ୍କୁ ଏଭଳି ଅପମାନଜନକ କଥା କହିବାର ନଥିଲା । ତାଙ୍କ ଦ୍ବାରା ହୋଇଥିବା ଭୁଲ୍ ପାଇଁ କ୍ଷମା ମାଗୁଛି ।’
ସେପଟେ ଜାନଙ୍କ ମା' ରିତା ଭଟ୍ଟାଚାର୍ଯ୍ୟ ଏକ ବୟାନ ଜାରି କରି କହିଛନ୍ତି, ‘ମୁଁ ସମସ୍ତଙ୍କୁ ଅନୁରୋଧ କରୁଛି ଦୟା କରି ଏହାକୁ କେବଳ ଏକ ଖେଳ ରୂପେ ଗ୍ରହଣ କରନ୍ତୁ । ଏସବୁ ଜିନିଷରେ ନିଜର ବ୍ୟକ୍ତିଗତ ଏଜେଣ୍ଡାକୁ ଯୋଡନ୍ତୁ ନାହିଁ । ଯେତେବେଳେ ରାହୁଲ ବୈଦ୍ୟ, ଜାନ ଓ ନିକ୍କୀ ଏକାଠି ଥିଲେ ସେହି ସମୟରେ ରାହୁଲ ଓ ନିକ୍କି ମରାଠୀରେ କଥା ହୋଇଥିଲେ, ଯାହା ଜାନ ବୁଝିପାରୁନଥିଲେ । ଏଥିପାଇଁ ସେ କହିଲେ କି ମରାଠୀରେ କଥା ନହେବାକୁ । କାରଣ ତାଙ୍କୁ ଲାଗୁଥିଲା ସେମାନେ ତାଙ୍କ ବିଷୟରେ କଥା ହେଉଛନ୍ତି । ଦୟାକରି ପରିସ୍ଥିତିକୁ ବିଶ୍ଳେଷଣ କରନ୍ତୁ ଏବଂ ତାପରେ ଏକ ସିଦ୍ଧାନ୍ତରେ ଆସନ୍ତୁ ।
