ମୁମ୍ବାଇ: କୋରୋନା ଭାଇରସ ବିରୋଧ ଲଢେଇରେ ବଲିଉଡ ସେଲିବ୍ରିଟି ସହଯୋଗ କରିବାରେ ଲାଗିଛନ୍ତି। ଯିଏ ଯେତେ ସମ୍ଭବ ସେତେ ଦାନ କରୁଛନ୍ତି। ଏଯାବତ୍ ଅନେକ ସେଲିବ୍ରିଟି ଦାନ କରିସାରିଲେଣି । ବର୍ତ୍ତମାନ ଏହି କ୍ରମରେ ସାମିଲ ହୋଇଛନ୍ତି ବିଶିଷ୍ଟ ଅଭିନେତା ନାନା ପାଟେକର। ସେ ମଧ୍ୟ କୋରୋନା ମୁକାବିଲା ପାଇଁ ଏକ କୋଟି ଦାନ କରିବାକୁ ଯାଉଛନ୍ତି।
ପିଏମ କେୟାର୍ସ ଫଣ୍ଡ ଜରିଆରେ ସେ ପ୍ରଭାବିତ ଲୋକଙ୍କୁ ଆର୍ଥିକ ରୂପେ ସାହାଯ୍ୟ କରିବାକୁ ଘୋଷଣା କରିଛନ୍ତି। ଯାହାର ଏକ ଭିଡିଓ ବର୍ତ୍ତମାନ ଟ୍ବିଟରରେ ଭାଇରାଲ ହୋଇଛି। ସେ 50-50 ଲକ୍ଷ ଟଙ୍କା ଲେଖାଏଁ ଦୁଇଟି ଚେକ୍ ପିଏମ ଓ ସିଏମ ଫଣ୍ଡକୁ ପଠାଇବେ । ଏନେଇ ସେ ଭିଡିଓରେ କହିଛନ୍ତି । ଏହାସହ ସେ ଦେଶବାସୀଙ୍କୁ ଘରେ ରହି ସୁରକ୍ଷିତ ରହିବାକୁ ମଧ୍ୟ ଅପିଲ କରିଛନ୍ତି।
ପ୍ରକାଶ ଥାଉକି, ନାନାଙ୍କ ପୂର୍ବରୁ ଅକ୍ଷୟ କୁମାର, କାର୍ତ୍ତିକ ଆର୍ୟନ, ଅନୁଷ୍କା ଶର୍ମା, ବିରାଟ କୋହଲି, ଭୂଷଣ କୁମାର, କପିଲ ଶର୍ମା, ଶିଳ୍ପା ସେଟ୍ଟୀ, ରାଜକୁନ୍ଦ୍ରା କୋଟି କୋଟି ଟଙ୍କା ଦାନ କରିସାରିଲେଣି ।
