ମୁମ୍ବାଇ: ସବୁବର୍ଷ ପରି ଏବର୍ଷ ମଧ୍ୟ ଇୟରଏଣ୍ଡ ଅବସରରେ ବଲିଉଡରେ ଅନେକ ଦମଦାର ଫିଲ୍ମ ରିଲିଜ ହେବାକୁ ଯାଉଛି । ଯେଉଁଠାରେ ଏହି ଦୀପାବଳୀ ବକ୍ସ ଅଫିସରେ ଜବରଦସ୍ତ କଡା ଟକ୍କର ଦେଖିବାକୁ ମିଳିଛି । ସେହିପରି ଆସନ୍ତା ନଭେମ୍ବରକୁ ନେଇ ଦର୍ଶକ ଖୁବ୍ ଏକ୍ସାଇଟେଡ । କାରଣ ନଭେମ୍ବରରେ ରିଲିଜ ହେବାକୁ ଯାଉଛି ଅନେକ ଜବରଦସ୍ତ ଫିଲ୍ମ । ତେବେ ଆସନ୍ତୁ ନଜର ପକାଇବା ଏହି ଫିଲ୍ମ ଉପରେ...
ଦର୍ଶକ ସିଦ୍ଧାର୍ଥ ମଲହୋତ୍ରା, ରିତେଶ ଦେଶମୁଖ ଓ ତାରା ସୁତାରିୟାଙ୍କ ରୋମାଣ୍ଟିକ ଡ୍ରାମ ଫିଲ୍ମ ‘ମରଜାୱାଂ’ ଦେଖିବାକୁ ବ୍ୟାକୁଳ ଅଛନ୍ତି । ଫିଲ୍ମର ଟ୍ରେଲର ଦେଖିବା ପରେ ଦର୍ଶକ ଫିଲ୍ମଟି ବଡ ପରଦାରେ ଦେଖିବାକୁ ଉତ୍ସାହିତ । ନଭେମ୍ବର 15ରେ ରିଲିଜ ହେବ ଏହି ଫିଲ୍ମ ।
ଏହାବ୍ୟତୀତ ଆକ୍ସନ ହିରୋ ବିଦ୍ୟୁତ ଜାମୱାଲଙ୍କ ଆକ୍ସନ ଫିଲ୍ମ ‘କମାଣ୍ଡୋ 3’ ମଧ୍ୟ ରିଲିଜ ହେବାକୁ ପ୍ରସ୍ତୁତ ହୋଇସାରିଲାଣି । ଆକ୍ସନ ଫିଲ୍ମକୁ ପସନ୍ଦ କରୁଥିବା ଦର୍ଶକଙ୍କ ପାଇଁ ଏହା କୌଣସି ଉପହାର ଠାରୁ କମ ନୁହେଁ । ନଭେମ୍ବର 29ରେ ରିଲିଜ ହେବ ଏହି ଫିଲ୍ମ ।
ଦୀପାବଳୀରେ ଅକ୍ଷୟ କୁମାରଙ୍କ ମଲ୍ଟି ଷ୍ଟାରର କମେଡି ଫିଲ୍ମ ‘ହାଉସଫୁଲ 4’ ରିଲିଜ ହୋଇଯାଇଛି । ଏହି କମେଡି ଫିଲ୍ମରେ ପରେ ଆଉ ଏକ ମଲ୍ଟି ଷ୍ଟାରର କମେଡି ଫିଲ୍ମ ‘ପାଗଲପନ୍ତୀ’ ସିନେମାଘରେ ରିଲିଜ ହେବାକୁ ପ୍ରସ୍ତୁତ । ଯାହାର ଟ୍ରେଲର ରିଲିଜ ହୋଇଯାଇଛି । ଆଉ ଦର୍ଶକଙ୍କ ମନ ମଧ୍ୟ କିଣିଛି । ଅନିଲ କପୁର, ଜନ ଅବ୍ରାହମ, ଇଲିୟାନା ଡିକ୍ରୁଜ, ଅର୍ଶଦ ୱାରସୀ, ପୁଲକିତ ସମ୍ରାଟ, କ୍ରିତି ଖରବନ୍ଦା, ଉର୍ବଶୀ ରୌତେଲା ଓ ସୌରଭ ଶୁକ୍ଲାଙ୍କ ଅଭିନୀତ ଏହି ଫିଲ୍ମ ନଭେମ୍ବର 22ରେ ରିଲିଜ ହେବ ।
ନିକଟରେ ବି-ଟାଉନର ଭର୍ସାଟାଇଲ ଆକ୍ଟର ନୱାଜୁଦ୍ଦୀନ ସିଦ୍ଦିକୀଙ୍କ ବହୁ ପ୍ରତିକ୍ଷିତ ଫିଲ୍ମ ‘ମୋତିଚୁର ଚକନାଚୁର’ ଟ୍ରେଲର ରିଲିଜ ହୋଇଥିଲା । ନୱାଜ ଓ ଆଥିୟା ସେଟ୍ଟୀଙ୍କ ରୋମାନ୍ସ ଦେଖିବାକୁ ଦର୍ଶକଙ୍କ ଉତ୍ସାହିତ ବଢିଚାଲିଛି । ନଭେମ୍ବର 15ରେ ଏହି ଫିଲ୍ମ ‘ମରଜାୱାଂ’ ସହ ମୁହାଁମୁହିଁ ହେବାକୁ ଯାଉଛି ।
ନିକଟରେ ‘ସାହୋ’ ଫିଲ୍ମରେ ଦମଦାର ଭୂମିକାରେ ନଜର ଆସିଥିବା ନିଲ ନିତିନ ମୁକେଶଙ୍କ ହରର, ଥ୍ରିଲର ଡ୍ରାମା ଫିଲ୍ମ ‘ବାଇପାସ ରୋଡ’ ମଧ୍ୟ ରିଲିଜ ହେବାକୁ ଯାଉଛି । ଦୁଇଥର ଫିଲ୍ମର ରିଲିଜ ତାରିଖ ପରିବର୍ତ୍ତନ କରି ଏବେ ନଭେମ୍ବର 1ରେ ଫିଲ୍ମକୁ ରିଲିଜ କରିବେ ମେକର୍ସ । ଫିଲ୍ମରେ ନିଲ ଓ ଅଦାଙ୍କ ରୋମାନ୍ସ ଦେଖିବାକୁ ମିଳିବ । ଫିଲ୍ମର ନିର୍ମାଣ ମିରାଜ ଗ୍ରୁପ ସହ ନିଲ କରୁଛନ୍ତି । ସେହିପରି ଫିଲ୍ମରେ ନିଲଙ୍କ ଭାଇ ନିର୍ଦ୍ଦେଶନାରେ ଡେବ୍ୟୁ କରିବାକୁ ଯାଉଛନ୍ତି ।
ଦୀର୍ଘ ସମୟରୁ ଚର୍ଚ୍ଚାରେ ଥିବା ଆୟୁଷ୍ମାନ ଖୁରାନାଙ୍କ ‘ବାଲା’ ଓ ସନ୍ନି ସିଂଙ୍କ ‘ଉଜଡା ଚମନ’ ନଭେମ୍ବର 7,8ରେ ରିଲିଜ କରିବାର ଯୋଜନା କରିଥିଲେ ମେକର୍ସ । କିନ୍ତୁ ‘ଉଜଡା ଚମନ’ ଆୟୁଷ୍ମାନଙ୍କ ‘ବାଲା’ ଫିଲ୍ମ ଉପରେ କପି ରାଇଟ ଅଭିଯୋଗ ଆଣି ଯାଚିକା ଦାୟର କରିଥିଲା । ବାଲା ଫିଲ୍ମ ଉପରେ ଆସନ୍ତା 4 ତାରିଖରେ ଶୁଣାଣି ହେବାକୁ ଯାଉଛି । କିନ୍ତୁ ଏହାପୂର୍ବରୁ ‘ଉଜଡା ଚମନ’ ମେକର୍ସ ଫିଲ୍ମ ନଭେମ୍ବର 1ରେ ରିଲିଜ କରିବାକୁ ଯାଉଛନ୍ତି ।
