ମୁମ୍ବାଇ: ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଫିଲ୍ମ ଇଣ୍ଡଷ୍ଟ୍ରି ଓ ତାଙ୍କ ଫ୍ୟାନ୍ସଙ୍କ ପାଇଁ ବଡ ଝଟକା ଥିଲା । ଯେଉଁ ଦୁଃଖରୁ ଏଯାବତ ବାହାରି ପାରିନାହାଁନ୍ତି କେହି । ଆଜି ମଧ୍ୟ ସୋସିଆଲ ମିଡିଆରେ ଅଭିନେତାଙ୍କ ପାଇଁ ନ୍ୟାୟ ଦାବି କରୁଥିବାର ନଜର ଆସୁଛନ୍ତି ସମସ୍ତେ। ଇତିମଧ୍ୟରେ ଫିଲ୍ମ ‘ନ୍ୟାୟ ଦ ଜଷ୍ଟିସ’ର ଟିଜର ରିଲିଜ ହୋଇଛି । ଯାହାକୁ ଦେଖି ରାଗିଯାଇଛନ୍ତି ଅଭିନେତାଙ୍କ ଫ୍ୟାନ୍ସ ।
59 ସେକେଣ୍ଡର ଟିଜରରେ ଏମିତି ଦୃଶ୍ୟ ଦେଖିବାକୁ ମିଳୁଛି, ଯାହା ସୁଶାନ୍ତଙ୍କ ଆତ୍ମହତ୍ୟା ଏବଂ ମୃତ୍ୟୁ ପରର ଯାଞ୍ଚର କାହାଣୀକୁ ନେଇ ପର୍ଯ୍ୟବେଶିତ। ଟିଜର ଦେଖିବା ପରେ ଫିଲ୍ମର ମେକର୍ସଙ୍କ ଉପରେ ଅପମାନଜନକ କମେଣ୍ଟ କରିବା ଆରମ୍ଭ କରିଦେଇଥିଲେ ଫ୍ୟାନ୍ସ । ଜଣେ ଫ୍ୟାନ ଲେଖିଛନ୍ତି, ‘ସୁଶାନ୍ତଙ୍କ ଜୀବନ ଉପରେ ଫିଲ୍ମ ନିର୍ମାଣ କରିବାକୁ ତୁମର ସାହସ କେମିତି ହେଲା । କଣ ମାମଲାର ସମାଧାନ ହୋଇସାରିଛି । ’ ଦ୍ବିତୀୟ ଫ୍ୟାନ ଲେଖିଛନ୍ତି, ‘ଫିଲ୍ମ ନିର୍ମାଣ କରିବାକୁ କଣ ସୁଶାନ୍ତଙ୍କ ପରିବାରଠୁ ଅନୁମତି ମିଳିଛି ।’ ଫ୍ୟାନ୍ସଙ୍କ ଏପରି କମେଣ୍ଟ ଦେଖି ବର୍ତ୍ତମାନ ଟିଜରର କମେଣ୍ଟ ସେକ୍ସନ ବନ୍ଦ କରିଦିଆଯାଇଛି ।
ଫିଲ୍ମର ଟିଜର ବିକାଶ ପ୍ରଡକ୍ସନ ୟୁଟ୍ୟୁବ ଚ୍ୟାନେଲରେ ଅପଲୋଡ କରାଯାଇଥିଲା । ଯାହାର ଡେସ୍କ୍ରିପ୍ସନରେ ସୁଶାନ୍ତ ବିଷୟରେ କୌଣସି ଆଲୋଚନା କରାଯାଇନାହିଁ । ହେଲେ ଲେଖା ଯାଇଛି ବାସ୍ତବ ଘଟଣାକୁ ନେଇ ଆଧାରିତ ଫିଲ୍ମ । ସେହିପରି ଟିଜରରେ ଟିଭିରୁ ନେଇ ବଲିଉଡର ଅନେକ ଜଣାଶୁଣା କଳାକାରଙ୍କୁ ଦେଖିବାକୁ ମିଳୁଛି । ଏହି କ୍ରମରେ ସାମିଲ ଅଛନ୍ତି ଜୁବେର ଖାନ, ଶ୍ରେୟା ଶୁକ୍ଲା ଅସରାନୀ, କିରଣ କୁମାର, ସୁଧା ଚନ୍ଦ୍ରନ୍, ଶକ୍ତି କପୁର, ରଜା ମୁରାଦଙ୍କ ପରି କଳାକାର ।
