ମୁମ୍ବାଇ: ପରଲୋକରେ ଭେଟରାନ ଆକ୍ଟର ରିଷି କପୁର । ଦୀର୍ଘ ଦିନର କ୍ୟାନ୍ସର ସଂଗ୍ରାମ ପରେ ଶେଷରେ ସେ ସମସ୍ତଙ୍କୁ ଛାଡି ଆରପାରିକୁ ଚାଲିଯାଇଛନ୍ତି । ଆଜି ଆମ ଗହଣରେ କପୁର ଖାନଦାନର ଲାଡଲା ଚିଣ୍ଟୁ ନାହାନ୍ତି । ତାଙ୍କର ଅଗଣିତ ଫ୍ୟାନ୍ସ ମଧ୍ୟ ଏବେବି ଏହି କଥାକୁ ବିଶ୍ବାସ କରିପାରୁନାହାନ୍ତି ।
ଏହି ସମୟରେ ସୋସିଆଲ ମିଡିଆରେ ରିଷିଙ୍କ ଅନେକ ଫଟୋ ଭାଇରାଲ ହେଉଛି । କପୁର ଖାନଦାନଠାରୁ ପ୍ରଶଂସକ ସମସ୍ତେ ରିଷିଙ୍କୁ ପୁରୁଣା ଫଟୋ ଦ୍ବାରା ମନେ ପକାଉଛନ୍ତି । ତେବେ ଏପରି ସମୟରେ ବଲିଉଡର ଲୋଲୋ ତଥା କରିସ୍ମା କପୁର ମଧ୍ୟ ଏକ ପୁରୁଣା ଫଟୋ ସେୟାର କରିଛନ୍ତି । ଦାଦା ରିଷିଙ୍କୁ ମନେ ପକାଇ ସେ 1988 ମସିହାର ଏକ ଫଟୋ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଅପଲୋଡ କରିଛନ୍ତି । ସେତେବେଳେ କାଶ୍ମୀରକୁ ଏକ ଟ୍ରିପରେ ସମସ୍ତେ ଯାଇଥିଲେ ।
ଏହି ଫଟୋରେ ରିଷି, ନୀତୁ କପୁରଙ୍କ ସମେତ କରିସ୍ମା, କରୀନା, ରଣବୀର, ରିଧିମା ପ୍ରବୃତି ନଜର ଆସୁଛନ୍ତି । ରିଷି ଓ ନୀତୁଙ୍କ ପାଖରେ କରିସ୍ମା ଛିଡା ହୋଇଛନ୍ତି । ସମସ୍ତଙ୍କ ବଡ ଭଉଣୀ ଲୋଲୋ ସେତେବେଳେ ସ୍କୁଲରେ ପଢୁଥିଲେ । ବାକି ଅନ୍ୟମାନେ ବହୁତ ଛୋଟ ଥିଲେ । ସାମନାରେ କ୍ୟୁଟ କରୀନା, ରଣବୀର ଓ ତାଙ୍କ ଭଉଣୀ ରିଧିମା ଛିଡା ହୋଇଛନ୍ତି । ଏହି ଫଟୋ କାଶ୍ମୀରରେ ଉଠାଯାଇଛି । ସେ ସମୟରେ ରିଷିଙ୍କ ଅନେକ ଫିଲ୍ମ କାଶ୍ମୀରରେ ସୁଟିଂ ହେଉଥିଲା । ତେଣୁ ସମୟ ପାଇଲେ କପୁର ଖାନଦାନର ପିଲାଙ୍କ ସହ ନୀତୁ ସେଠାକୁ ବୁଲିବାକୁ ପଳାଉଥିଲେ ।
ତେବେ ଦାଦା ରିଷିଙ୍କୁ ମନେ ପକାଇ ନିକଟରେ ବେବୋ କରୀନା କପୁର ଖାନ ମଧ୍ୟ କିଛି ଫଟୋ ସେୟାର କରିଥିଲେ । ସୈଫ ଅଲ୍ଲୀ ଖାନ ଓ ତାଙ୍କ ବାପାଙ୍କ ସହ ରିଷିଙ୍କ ଏକ ଫଟୋ ନିକଟରେ କରୀନା ପୋଷ୍ଟ କରିଥିଲେ । ଏହାସହ ରିଷିଙ୍କ ସହ ନିଜ ପିଲାବେଳର ଫଟୋ ମଧ୍ୟ ସେ ସେୟାର କରିଥିଲେ ।
