ମୁମ୍ବାଇ: କଙ୍ଗନା ରଣାୱତ ଓ ରାଜକୁମାର ରାଓଙ୍କ ବହୁପ୍ରତିକ୍ଷିତ ଫିଲ୍ମ 'ଜଜମେଣ୍ଟାଲ ହେ କ୍ୟା' ରିଲିଜ ହେବାକୁ ପ୍ରସ୍ତୁତ ହୋଇସାରିଲାଣି । ଫିଲ୍ମଟି ଜୁଲାଇ 26ରେ ରିଲିଜ ହେବାକୁ ଯାଉଛି । ଏହାସହ କଙ୍ଗନା ଓ ରିଚା ଚଡ୍ଡା କବାଡୀ କାହାଣୀ ଉପରେ ଆଧାରିତ ଫିଲ୍ମ 'ପଙ୍ଗା'ରେ ଏକାଠି ନଜର ଆସିବେ । ଇତିମଧ୍ୟରେ ଜାରି ହୋଇଯାଇଛି କଙ୍ଗନାଙ୍କ ଆଉ ଏକ ଆକ୍ସନ ଫିଲ୍ମ 'ଧାକଡ'ର ଦ୍ବିତୀୟ ପୋଷ୍ଟର ।
ଏହି ପୋଷ୍ଟରଟିକୁ ଟ୍ବିଟରରେ ସେୟାର କରିଛନ୍ତି ଫିଲ୍ମ କ୍ରିଟିକ ଏବଂ ଟ୍ରେଡ ଆନାଲିଷ୍ଟ ତରଣ ଆଦର୍ଶ । 'ଧାକଡ'ର ନିର୍ଦ୍ଦେଶନା ଦାୟିତ୍ବ ତୁଲାଉଛନ୍ତି ରଜନେସ ରାଜି ଘାଈ । ସେହିପରି ଫିଲ୍ମର ପ୍ରଯୋଜନା କରୁଛନ୍ତି ସୋହେଲ ମାକଲାଇ ପ୍ରଡକ୍ସନ ।
ଯଦି ଏହି ନୂଆ ପୋଷ୍ଟର ବିଷୟରେ କଥା ହେବା, ତେବେ ପ୍ରଥମ ପୋଷ୍ଟରରେ କଙ୍ଗନାଙ୍କ ବ୍ୟାକ ସାଇଡ ଦେଖିବାକୁ ମିଳିଥିଲା । କିନ୍ତୁ ଦ୍ବିତୀୟ ପୋଷ୍ଟରରେ କଙ୍ଗନାଙ୍କ ଚେହେରା ଦେଖାଯିବା ସହ ଦୁଇ ହାତରେ ବନ୍ଧୁକ ଧରି ଆକ୍ସନ ଅବତାରରେ ନଜର ଆସୁଛନ୍ତି ।
ପ୍ରକାଶ ଥାଉକି ଫିଲ୍ମଟିକୁ ଆସନ୍ତା ବର୍ଷ ଦୀପାବଳୀରେ ରିଲିଜ କରିବାର ଯୋଜନା କରିଛନ୍ତି ଫିଲ୍ମ ମେକର୍ସ । ଅନ୍ୟପଟେ କଙ୍ଗନା ବର୍ତ୍ତମାନ 'ଜଜମେଣ୍ଟାଲ ହେ କ୍ୟା'କୁ ନେଇ ଖୁବ୍ ଉତ୍ସାହିତ । ଫିଲ୍ମରେ ପୁଣିଥରେ ଦେଖିବାକୁ ମିଳିବ କଙ୍ଗନା ଓ ରାଜକୁମାରଙ୍କ ଜବରଦସ୍ତ କେମେଷ୍ଟ୍ରି ।
