ମୁମ୍ବାଇ: ସଲମାନ ଖାନ ଓ ଧକ୍ ଧକ୍ ଗାର୍ଲ ମାଧୁରୀ ଦୀକ୍ଷିତଙ୍କ ଅଭିନୀତ ସୁପରହିଟ୍ ଫିଲ୍ମ ‘ହମ ଆପକେ ହୈ କୌନ’କୁ ଆଜି ପର୍ଯ୍ୟନ୍ତ ଭୁଲି ନାହାଁନ୍ତି ଦର୍ଶକ । ଏହି ରୋମାଣ୍ଟିକ ଫିଲ୍ମରେ ସଲମାନ ଓ ମାଧୁରୀଙ୍କ କେମେଷ୍ଟ୍ରିକୁ ଖୁବ୍ ପସନ୍ଦ କରିଥିଲେ ଦର୍ଶକ । ଏବେ ମଧ୍ୟ ଅନେକ ସ୍ଥାନରେ ଏହି ଫିଲ୍ମର ସୁପରଡୁପର ଗୀତ ଶୁଣିବାକୁ ମିଳୁଛି । ଇତିମଧ୍ୟରେ ଫିଲ୍ମ ରିଲିଜକୁ 25 ବର୍ଷ ପୂରଣ ହୋଇଛି । ଏହି ଅବସରରେ ଏହାର ମେକର୍ସ ଫିଲ୍ମର ସ୍ପେଶାଲ ସ୍କ୍ରିନିଂର ଆୟୋଜନ କରିବାକୁ ଘୋଷଣା କରିଛନ୍ତି ।
1994ରେ ଆସିଥିବା ‘ହମ ଆପକେ ହୈ କୌନ’ର ନିର୍ଦ୍ଦେଶନା ସୁରଜ ବଡଜାତିଆ ଏବଂ ତାଙ୍କ ପ୍ରଡକ୍ସନ ହାଉସ ରାଜଶ୍ରୀ ବ୍ୟାନରରେ ଏହି ନିର୍ମାଣ କରାଯାଇଥିଲା । ଏହି ବିଗ ବଜେଟର ଫିଲ୍ମଟି ବିଶ୍ବସ୍ତରରେ ମଧ୍ୟ ଶାନଦାର କଲେକ୍ସନ କରିବାରେ ସଫଳ ହୋଇଥିଲା ।
ସଲମାନ ଓ ମାଧୁରୀଙ୍କ ବ୍ୟତୀତ ଏହି ମ୍ୟୁଜିକାଲ ଫ୍ୟାମିଲି ଡ୍ରାମା ଫିଲ୍ମରେ ମୋହନିଶ ବହଲ, ରେଣୁକା ସାହାଣୀ, ଅନୁପମ ଖେର, ରିମା ଲାଗୁ ଓ ଆଲୋକ ନାଥ ମୁଖ୍ୟ ଭୂମିକାରେ ନଜର ଆସିଥିଲେ ।
ଫିଲ୍ମର ସ୍ପେଶାଲ ସ୍କ୍ରିନିଂ ଆସନ୍ତା ଅଗଷ୍ଟ 9ରେ ଲିବର୍ଟି ସିନେମାରେ ଆୟୋଜନ ହେବ । ଯେଉଁଥିରେ ଫିଲ୍ମର ପୁରା ଷ୍ଟାର-କାଷ୍ଟ ସଲମାନ, ମାଧୁରୀଙ୍କ ସହ ଯୋଗ ଦେବେ । ଏହାସହ ପୁରା ଟିମ ଫିଲ୍ମକୁ ନେଇ ନିଜ ଅନୁଭୂତି ସେୟାର କରିବ ବୋଲି ଶୁଣିବାକୁ ମିଳୁଛି ।
‘ହମ ଆପକେ ହୈ କୌନ’ ଫିଲ୍ମଟି 1982ରେ ଆସିଥିବା ‘ନଦିୟା କେ ପାର’ ଫିଲ୍ମର ମଡର୍ଣ୍ଣ ସିକ୍ବେଲ ଫିଲ୍ମ ଥିଲା । ଫିଲ୍ମଟି ଅନେକ ନ୍ୟାଶନାଲ ପୁରସ୍କାର ମଧ୍ୟ ଜିତି ସାରିଛି ।
