ମୁମ୍ବାଇ: ବଲିଉଡ ଓ ମୁମ୍ବାଇ ପୋଲିସ ମଧ୍ୟରେ ସମ୍ପର୍କ ବହୁତ ପୁରୁଣା । ସବୁବେଳେ ଉଭୟ ପରସ୍ପରକୁ ସହଯୋଗ କରିଥାନ୍ତି । ମୁମ୍ବାଇ ପୋଲିସ ପାଇଁ ବଲିଉଡ ଷ୍ଟାର ଅନେକ ସମୟରେ ନିଜ ବଦାନ୍ୟତା ଦେଖାଇଛନ୍ତି । କୋରୋନା ମହାମାରୀ ବେଳେ ମଧ୍ୟ ପୋଲିସଙ୍କ ପାଇଁ ଆଗେଇ ଆସିଛନ୍ତି ବଲିଉଡ ଷ୍ଟାର । ଅନେକ ଷ୍ଟାର ମୁମ୍ବାଇ ପୋଲିସ ଫାଉଣ୍ଡେସନକୁ ସାହାଯ୍ୟ କରିବା ସହ ବ୍ୟକ୍ତିଗତ ଭାବେ ପିପିଇ କିଟ ସବୁ ଯୋଗାଇ ଦେଇଛନ୍ତି ।
ଏବେ ଏହି ତାଲିକାରେ ସାମିଲ ହୋଇଛନ୍ତି ବଲିଉଡର ଗ୍ରୀକ ଗଡ ହ୍ରିତିକ ରୋଶନ । ମୁମ୍ବାଇ ପୋଲିସର ଅନ ଡ୍ୟୁଟି ପୋଲିସ କର୍ମୀଙ୍କ ପାଇଁ ସେ ହ୍ୟାଣ୍ଡ ସାନିଟାଇଜର ପ୍ରଦାନ କରିଛନ୍ତି । ଯେଉଁମାନେ ଏହି ବିପଦରେ ବାହାରେ ରହି ନିଜ ସୁରକ୍ଷାକୁ ବଳି ପକାଇ ଲୋକଙ୍କୁ ରକ୍ଷା କରୁଛନ୍ତି ସେମାନଙ୍କ ପାଇଁ ସେ ଏହି ସହାୟତାର ହାତ ବଢାଇଛନ୍ତି । ଏନେଇ ମୁମ୍ବାଇ ପୋଲିସ ପକ୍ଷରୁ ହ୍ରିତିକଙ୍କୁ ଧନ୍ୟବାଦ ଦିଆଯାଇଛି ।
‘‘କୋରୋନା ଯୋଦ୍ଧାଙ୍କୁ ସାହାଯ୍ୟ ପାଇଁ ଆପଣଙ୍କୁ ବହୁତ ବହୁତ ଧନ୍ୟବାଦ । ଏପରି ମୂଲ୍ୟବାନ ପଦକ୍ଷେପକୁ ଆମେ ପ୍ରଶଂସା କରୁଛୁ,’’ ବୋଲି ମୁମ୍ବାଇ ପୋଲିସ ପକ୍ଷରୁ ଟ୍ବିଟ କରି କୁହାଯାଇଛି । ଏହାର ଉତ୍ତରରେ ୱାର ଷ୍ଟାର ଲେଖିଛନ୍ତି ଯେ, ‘‘ଆମ ସୁରକ୍ଷା ନିଜ ହାତକୁ ନେଇଥିବା ମୁମ୍ବାଇ ପୋଲିସକୁ କୃତଜ୍ଞତା ଜଣାଉଛି । ସମସ୍ତେ ସୁରକ୍ଷିତ ରହନ୍ତୁ’’ । ଗୁରୁବାର ଫରହାନ ଅଖତର ସରକାରୀ ହସ୍ପିଟାଲକୁ ପିପିଇ କିଟ ପ୍ରଦାନ କରିଥିଲେ । ଏହାସହ ଅନେକ ବଲିଉଡ ଷ୍ଟାର ମଧ୍ୟ କୋରୋନା ଯୋଦ୍ଧାଙ୍କୁ ବିଭିନ୍ନ ପ୍ରକାର ପ୍ରତିଷେଧକ ସାମଗ୍ରୀ ପ୍ରଦାନ କରିଛନ୍ତି ।
