ମୁମ୍ବାଇ: ଫେମସ ପ୍ରଯୋଜକ, ଅଭିନେତା କମାଲ ଆର ଖାନ ଓରଫ କେଆରକେ ସବୁବେଳେ ନିଜ ବିବାଦୀୟ ବୟାନ ଓ ଟ୍ବିଟ ପାଇଁ ଚର୍ଚ୍ଚାରେ ରୁହନ୍ତି । ସେ ଏବେ ପୁଣିଥରେ ନିଜ ବୟାନ ପାଇଁ ବିବାଦ ଘେରରେ ଆସିଛନ୍ତି । ଏବେ ତାଙ୍କ ଟ୍ବିଟ ତାଙ୍କରି ଉପରେ ଭାରି ପଡିଛି । ବର୍ତ୍ତମାନ ଟ୍ବିଟକୁ ଆଧାର କରି ତାଙ୍କ ବିରୋଧରେ ଏଫଆଇଆର ରୁଜୁ ହୋଇଛି । ପୋଲିସ ସୂଚନା ଅନୁଯାୟୀ କେଆରକେଙ୍କ ନାମରେ ବୁଧବାର ବ୍ରାନ୍ଦା ପୋଲିସ ଷ୍ଟେସନରେ ଏଫଆଇଆର ରୁଜୁ କରାଯାଇଛି ।
ମାମଲାଟି ହେଲା ଯେ ସେ ବିଶିଷ୍ଟ ଅଭିନେତା ଅଭିନେତା ଋଷି କପୁର ଓ ଇରଫାନ ଖାନଙ୍କ ଉପରେ କିଛି ଦିନ ପୂର୍ବରୁ ଦୁଇଟି ଆପତ୍ତିଜନକ ଟ୍ବିଟ କରିଥିଲେ । ଏହାକୁ ଆଧାର କରି ଯୁବ ସେନା କୋର କମିଟିର ସଦସ୍ୟ ରାହୁଲ କନଲ ଗତ 30 ତାରିଖରେ ତାଙ୍କ ବିରୋଧରେ ଏହି ମାମଲା ରୁଜୁ କରିଥିଲେ ।
ପ୍ରକାଶ ଥାଉ କି କେଆରକେ ନିଜ ଟ୍ବିଟରେ ଲେଖିଥିଲେ, ‘ଋଷି କପୁରଙ୍କୁ ଏଚଏନ ରିଲାଏନ୍ସ ମେଡିକାଲରେ ଭର୍ତ୍ତି କରାଯାଇଛି । ମୁଁ ତାଙ୍କୁ କହିବାକୁ ଚାହୁଁଛି ଯେ ସାର୍ ସୁସ୍ଥ ହୋଇ ଫେରିଆସିବେ, ଚାଲିଯିବନି । କାରଣ ମଦ ଦୋକାନ ଆଉ ଦୁଇ, ତିନି ଦିନରେ ଖୋଲିବାକୁ ଯାଉଛି ।’
ଏହିପରି ଆପତ୍ତିଜନକ ଟ୍ବିଟ କରିବା ପାଇଁ ତାଙ୍କ ବିରୋଧରେ ଧାରା 294 ଏବଂ ଆଇପିସିର ଅନ୍ୟାନ୍ୟ ବ୍ୟବସ୍ଥା ଅନୁଯାୟୀ ଏକ ଏଫଆଇଆର ଦାଖଲ କରାଯାଇଛି । ତେବେ ତାଙ୍କୁ ଗିରଫ କରାଯାଇ ନାହିଁ ଏବଂ ଅଧିକ ତଦନ୍ତ ଜାରି ରହିଛି ।
