ମୁମ୍ବାଇ: 2005ରେ ରିଲିଜ ହୋଇଥିବା ଅଭିଷେକ ବଚ୍ଚନ ଓ ରାନୀ ମୁଖାର୍ଜୀଙ୍କ ସୁପରହିଟ୍ ଫିଲ୍ମ ‘ବଣ୍ଟି ଔର ବବଲି’ ବକ୍ସ ଅଫିସରେ ଶାନଦାର ପ୍ରଦର୍ଶନ କରିଥିଲା । ମୁଖ୍ୟ କଥା ହେଲା ଯେ ଏହି ଫିଲ୍ମରେ ଅଭିଷେକଙ୍କ ପିତା ତଥା ମହାନାୟକ ଅମିତାଭ ବଚ୍ଚନ ମଧ୍ୟ ପାର୍ଟି ସଙ୍ଗରେ ନଜର ଆସିଥିଲେ । ୟଶରାଜ ପ୍ରଡକ୍ସନରେ ନିର୍ମିତ ଏହି ଫିଲ୍ମରେ ଐଶ୍ଚର୍ଯ୍ୟା ରାୟ ବଚ୍ଚନଙ୍କ ଆଇଟମ ନମ୍ବର ‘କଜରା’ରେ ଦର୍ଶକଙ୍କ ବେଶ ମନ କିଣିଥିଲା ।
15 ବର୍ଷ ପରେ ଏହି ଫିଲ୍ମର ସିକ୍ବେଲ ‘ବଣ୍ଟି ଔର ବବଲି 2’ ନିର୍ମାଣ ହେବାକୁ ଯାଉଛି । ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରୁଛନ୍ତି ‘ଗଲି ବୟ’ ଷ୍ଟାର ସିଦ୍ଧାନ୍ତ ଚତୁ୍ର୍ବେଦୀ ଓ ସାରଭାରି । ଏହି ଫିଲ୍ମ ଜରିଆରେ ସାରଭାରି ବଲିଉଡରେ ଡେବ୍ୟୁ କରୁଛନ୍ତି । ଇତିମଧ୍ୟରେ ଫିଲ୍ମର ରିଲିଜ ତାରିଖ ଘୋଷଣା ହୋଇଯାଇଛି।
ୟଶରାଜ ଫିଲ୍ମସ ଟ୍ବିଟର ହ୍ୟାଣ୍ଡେଲରେ ଏକ ଭିଡିଓ ସେୟାର କରି କ୍ୟାପସନରେ ଲେଖାଯାଇଛି, ‘ଆପଣଙ୍କୁ ଠକି ନେବେ ଯେବେ, ଯାହାର ଆଶା ଆପଣ କରିନଥିବେ । ଏହି ଫିଲ୍ମ 2020 ଜୁନ 26ରେ ରିଲିଜ ହେବାକୁ ଯାଉଛି।’
ପ୍ରକାଶ ଥାଉକି ଫିଲ୍ମରେ କିଛି ପରିବର୍ତ୍ତନ କରାଯାଇଛି । ଅଭିଷେକଙ୍କ ସ୍ଥାନରେ ଫିଲ୍ମରେ ସୈଫ ଅଲ୍ଲୀ ଖାନ ଓ ରାନଙ୍କ ଝଲକ ମଧ୍ୟ ଦେଖିବାକୁ ମିଳିବ । ଯାହାର ଖୁଲାସା ଗତ ବର୍ଷ ହୋଇଥିଲା ।
