ମୁମ୍ବାଇ: ସୁପରଷ୍ଟାର ସଲମାନ ଖାନଙ୍କ ଜୀବନରୁ ସମସ୍ୟା କେବେ କମ ହେବାର ନାଁ ନେଉନାହିଁ । ଯେଉଁଠି ଗୋଟିଏ ମାମଲା ଶାନ୍ତ ପଡୁଛି ଆଉ ଗୋଟିଏ ମାମଲାରେ ତାଙ୍କ ନାଁ ସାମ୍ନାକୁ ଆସି ଚର୍ଚ୍ଚା ସୃଷ୍ଟି କରୁଛି । ଏଥର ମୁମ୍ବାଇର ଜଣେ ବ୍ୟକ୍ତି ତାଙ୍କ ବିରୋଧରେ ଲୁଟପାଟ ଅଭିଯୋଗ, ହିଂସା ଅପରାଧି ଗତିବିଧି ଏବଂ ଧମକ ଦେବା ମାମଲା ରୁଜୁ କରିଛନ୍ତି ।
ଏହାର ସୂଚନା ଏଏନଆଇର ଅଧିକାରୀକ ଟ୍ବିଟର ଆକାଉଣ୍ଟରେ ଦିଆଯାଇଛି । ପ୍ରକାଶ ଥାଉକି ସଲମାନଙ୍କ ଉପରେ ବରିଷ୍ଠ ସାମ୍ବାଦିକ ଅଶୋକ ପାଣ୍ଡେ ଏହି କେସ ରୁଜୁ କରିଛନ୍ତି । ଅଶୋକଙ୍କ ଓକିଲ ଶ୍ରୀ ନୀରଜ ଗୁପ୍ତା ଓ ନିଶା ଅରୋରୋ କହିଛନ୍ତି କି ସଲମାନଙ୍କ ବିରୋଧରେ ଆଇପିସି ଧାରା, 323, 392,426 ଏବଂ 506 ଅନୁଯାୟୀ ମାମଲା ରୁଜୁ କରାଯାଇଛି । ଏହି ମାମଲାରେ ଆସନ୍ତା ଜୁଲାଇ 12ରେ ଶୁଣାଣି କରାଯିବ । ଅଶୋକ ଅନ୍ଧେରି ମେଟ୍ରୋପଲିଟିୟନ ମାଜିଷ୍ଟ୍ରେଟ କୋର୍ଟରେ ଉପରିକ୍ତ ମାମଲା ପାଇଁ କେସ ରୁଜୁ କରିଛନ୍ତି ।
ପ୍ରକାଶ ଥାଉକି, ସଲମାନଙ୍କୁ ନିକଟରେ କୃଷ୍ଣସାର ମୃଗ ଶିକାର ମାମଲାରେ କୋର୍ଟରୁ ଜାମିନ ମିଳିଥିଲା । ତାଙ୍କ ଉପରେ ଅଭିଯୋଗ ଲାଗିଥିଲା କି ସେ ଲାଇସେନ୍ସ ହଜାଇ ଦେବା କଥା କହି କୋର୍ଟରେ ଯେଉଁ ଆଫିଟେଭିଟ ପ୍ରସ୍ତୁତ କରିଥିଲେ ତାହା ଅସଲି ନଥିଲା । ଅନ୍ୟପଟେ ସେ କିଛି ଦିନ ପୂର୍ବରୁ ନିଜ ବଡିଗାର୍ଡଙ୍କୁ ମାଡପିଟ କରିବା ଖବର ମଧ୍ୟ ଜୋର ଧରିଥିଲା ।
