ରାଞ୍ଚି: ଅଡୁଆରେ ମଣିକର୍ଣ୍ଣିକା ଅଭିନେତ୍ରୀ । କଙ୍ଗନା ରଣାୱତ(Kangana Ranaut)ଙ୍କ ବିରୁଦ୍ଧରେ ଦାୟର ହେଲା ଦେଶଦ୍ରୋହ ମାମଲା । ସ୍ବାଧୀନତା ଏବଂ ମହାତ୍ମା ଗାନ୍ଧୀଙ୍କ ବିରୁଦ୍ଧରେ ବିବାଦୀୟ ବୟାନ ଦେବା ପରେ କଙ୍ଗନାଙ୍କ ନାଁରେ ଧନବାଦ କୋର୍ଟରେ ମାମଲା ଦାୟର ହୋଇଛି । ଅଭିଯୋଗରେ କଙ୍ଗନାଙ୍କ ମନ୍ତବ୍ୟ ଦେଶଦ୍ରୋହୀ ଏବଂ ଅପମାନଜନକ ବୋଲି କୁହାଯାଇଛି ।
ସମାଜସେବୀ ଇଜହାର ଅହମ୍ମଦ ଓରଫ ବିହାରୀ ଏହି ମାମଲା କରିଛନ୍ତି । ସେ ଏହି ଅଭିନେତ୍ରୀ ବିରୁଦ୍ଧରେ ଏଫଆଇଆର ରୁଜୁ କରିବା ପାଇଁ ଆଦେଶ ଦେବାକୁ କୋର୍ଟକୁ ନିବେଦନ କରିଛନ୍ତି । ଆସନ୍ତା ୨୦ ତାରିଖରେ ଏହି ମାମଲାର ଶୁଣାଣି ହେବ ।
ଉଲ୍ଲେଖଯୋଗ୍ୟ, କଙ୍ଗନା ନିଜର ଏକ ବୟାନରେ କହିଥିଲେ, ୨୦୧୪ ପରେ ଭାରତ ସ୍ବାଧୀନ ହୋଇଛି । ଏହା ପୂର୍ବରୁ ମିଳିଥିବା ସ୍ବାଧୀନତା ଭିକ ଅଟେ । ବଲିଉଡ ଅଭିନେତ୍ରୀଙ୍କ ଏଭଳି ବୟାନ ପରେ ସାରା ଦେଶରେ ଉତ୍ତେଜନା ପ୍ରକାଶ ପାଇଛି । ଯାହାକୁ ନେଇ ଝାଡଖଣ୍ଡ ଧନବାଦ କୋର୍ଟରେ ମାମଲା ଦାୟର କରାଯାଇଛି ।
କହିରଖୁଛୁ କି, ସ୍ବାଧୀନତାକୁ ନେଇ କଙ୍ଗନାଙ୍କ ବିବାଦୀୟ ବୟାନ ପରେ ଦିଲ୍ଲୀ ମହିଳା ଆୟୋଗ ଅଧ୍ୟକ୍ଷା ରାଷ୍ଟ୍ରପତିଙ୍କୁ ଏକ ପତ୍ର ଲେଖିଥିଲେ । କଙ୍ଗନାଙ୍କୁ ଦିଆଯାଇଥିବା ପଦ୍ମଶ୍ରୀ ସମ୍ମାନ ଫେରାଇ ନେବାକୁ ସେ ପତ୍ରରେ ନିବେଦନ କରିଥିଲେ । ଏହା ସଙ୍ଗେ ସଙ୍ଗେ ତାଙ୍କ ବିରୁଦ୍ଧରେ ଦେଶଦ୍ରୋହ ମାମଲା ରୁଜୁ ପାଇଁ ମଧ୍ୟ ଉଲ୍ଲେଖ କରିଥିଲେ ଅଧ୍ୟକ୍ଷା ।
ବ୍ୟୁରୋ ରିପୋର୍ଟ, ଇଟିଭି ଭାରତ
