ମୁମ୍ବାଇ: ମୁମ୍ବାଇରେ କୋରୋନା ସଙ୍କଟ ଅଧିକା ଥିବାରୁ ଫିଲ୍ମ ମେକର୍ସ ନିଜ ନିଜ ଫିଲ୍ମ ଅନ୍ୟ ରାଜ୍ୟରେ ସୁଟ କରିବାର ଯୋଜନା କରିଛନ୍ତି । ଏହି କ୍ରମରେ ସାମିଲ ଅଛି ହ୍ୟାଣ୍ଡସମ ଆକ୍ଟର ଜନ୍ ଅବ୍ରାହମ ଓ ଦିବ୍ୟା ଖୋସଲାଙ୍କ ଚର୍ଚ୍ଚିତ ଫିଲ୍ମ ‘ସତ୍ୟମେବ ଜୟତେ 2’। ଫିଲ୍ମର ସୁଟିଂ ଲକ୍ଷ୍ନୌରେ ବୁଧବାର ଆରମ୍ଭ କରିବା ପାଇଁ ସେଠାରେ ପହଞ୍ଚିଛନ୍ତି ଏହି ଯୋଡି। ଫିଲ୍ମର ଷ୍ଟାର-କାଷ୍ଟଙ୍କଠୁ ନେଇ କ୍ରୁ ମେମ୍ବର ସୁରକ୍ଷା ସହ ଫିଲ୍ମ ସୁଟିଂ କରିବା ପ୍ରସ୍ତୁତି ଚଳାଇଛନ୍ତି ।
ଫିଲ୍ମର ସୁଟିଂ ଆସନ୍ତା ବର୍ଷ ଜାନୁଆରୀ ପର୍ଯ୍ୟନ୍ତ ଚାଲିବ । ନିର୍ଦ୍ଦେଶକ ମିଲାପ ଜାୱେରି ଉତ୍ତରପ୍ରଦେଶ ସରକାରଙ୍କ ପ୍ରଶଂସା କରିବା ସହ ଫିଲ୍ମ ସୁଟିଂ ବିଷୟରେ କହିଛନ୍ତି, ‘ପ୍ରଥମ ଦିନରେ ଆମେ କେବଳ ଲିଡ୍ ଯୋଡିଙ୍କ ସହ ସୁଟିଂ କରିବୁ । ଆଉ ପରେ ଅଭିନେତା ହର୍ଷ ଛାୟା, ଗୌତମି କପୁର, ଶାଦ୍ ରନ୍ଧୱା, ଅନୁପ ସୋନି ଏବଂ ସାହିଲ ଫିଲ୍ମରେ ସାମିଲ ହେବେ ।’
ଲକ୍ଷ୍ନୌର ଇତିହାସକ ସ୍ଥାନ ସହ କିଛି କଲେଜରେ ଫିଲ୍ମର ସୁଟିଂ କରାଯିବ । ସେହିପରି ଭିଡ ଜମୁନଥିବା ସ୍ଥାନରେ ଫିଲ୍ମର ସୁଟିଂ ସୁରକ୍ଷିତ ରୂପେ କରିବାକୁ ଚାହୁଁଛନ୍ତି ମେକର୍ସ । କେବଳ କାଷ୍ଟ ଓ କ୍ରୁଙ୍କ ଉପସ୍ଥିତରେ ସୁଟିଂ ହେବ ବୋଲି କହିଛନ୍ତି ମିଲାପ ।
ପ୍ରକାଶ ଥାଉକି ନିଖିଲ ଆଡଭାନୀଙ୍କ ସହ ମିଶି ଭୂଷଣ କୁମାର ‘ସତ୍ୟମେବ ଜୟତେ 2’ର ପ୍ରଯୋଜନା ଦାୟିତ୍ବ ତୁଲାଉଛନ୍ତି । ଫିଲ୍ମକୁ ଆସନ୍ତା ବର୍ଷ ମେ 12ରେ ରିଲିଜ କରିବାକୁ ଯୋଜନା କରିଛନ୍ତି ମେକର୍ସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
