ମୁମ୍ବାଇ: ବଲିଉଡ ଡ୍ରଗ୍ସ ମାମଲାରେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି) ନିଜର ଦୁଇ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ହାସ୍ୟ ଅଭିନେତ୍ରୀ ଭାରତୀ ସିଂ ତାଙ୍କ ସ୍ବାମୀ ହର୍ଷ ଏବଂ ଦୀପିକା ପାଦୁକୋନଙ୍କ ମ୍ୟାନେଜର କରିସ୍ମା ପ୍ରକାଶଙ୍କୁ ଜାମିନ ଦେବାରେ ସେମାନଙ୍କର ଭୂମିକା ସନ୍ଦେହଜନକ ଥିବା ନେଇ ମୁମ୍ବାଇ ଏନସିବିର ଦୁଇଜଣ ଅଧିକାରୀଙ୍କୁ ନିଲମ୍ବିତ କରାଯାଇଛି ।
ଏହା ବ୍ୟତୀତ ଏନସିବି ଓକିଲଙ୍କ ଭୂମିକାର ଯାଞ୍ଚ ମଧ୍ୟ କରୁଛି । କାରଣ ସେଲିବ୍ରିଟିଙ୍କ ଜାମିନର ଶୁଣାଣି ସମୟରେ ଓକିଲମାନେ ହାଜର ହୋଇପାରିନଥିଲେ । ଏହି ଉଭୟ ଅଧିକାରୀଙ୍କ ଉପରେ ବିଭାଗୀୟ ତଦନ୍ତ ନିର୍ଦ୍ଦେଶ ଦିଆଯାଇଛି ।
ପ୍ରକାଶ ଥାଉକି ନିକଟରେ ଭାରତୀଙ୍କ ଘର ଓ ଅଫିସରେ ଛାନଭିନ କରିଥିଲା ଏନସିବି । ଆଉ ଏହି ଯାଞ୍ଚରେ ଟିମକୁ ଘରୁ 86.5 ଗ୍ରାମ ଗଞ୍ଜେଇ ମିଳିଥିଲା । ଭାରତୀ ଓ ହର୍ଷଙ୍କ ବ୍ୟତୀତ ଅନେକ ସେଲିବ୍ରିଟି ଏଯାବତ ଏନସିବିର ଜେରା ହୋଇସାରିଲେଣି । ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ସହ ସମ୍ପୃକ୍ତ ଥିବା ଏହି ଡ୍ରଗ୍ସ ମାମଲାରେ ଧିରେ ଧିରେ କରି ଅନେକ ସେଲିବ୍ରିଟିଙ୍କ ନାମ ସାମ୍ନାକୁ ଆସିବାରେ ଲାଗିଛି ।
