ମୁମ୍ବାଇ: ସୁପରଷ୍ଟାର ସଲମାନ ଖାନ ଓ କ୍ୟାଟ୍ରିନା କୈଫଙ୍କ ଚର୍ଚ୍ଚିତ ଆକ୍ସନ ଡ୍ରାମା ଫିଲ୍ମ ‘ଟାଇଗର 3’ର ସୁଟିଂ ଖୁବଶୀଘ୍ର ଆରମ୍ଭ ହେବାକୁ ଯାଉଛି । ଫିଲ୍ମକୁ ନେଇ ଉତ୍ସାହିତ ଦର୍ଶକ । ଗତ ବର୍ଷ ଫିଲ୍ମ ନିର୍ମାଣ କରିବା ଘୋଷଣା କରି ସମସ୍ତଙ୍କ ଉତ୍ସାହିତକୁ ଦୁଇଗୁଣ କରିଦେଇଥିଲେ ମେକର୍ସ । ଇତିମଧ୍ୟରେ ଫିଲ୍ମକୁ ନେଇ ବଡ ଖବର ସାମ୍ନାକୁ ଆସିଛି । ଯାହା ଦର୍ଶକଙ୍କ ପାଇଁ ଖୁସିର ଖବର ହୋଇପାରେ । କାରଣ ଫିଲ୍ମରେ ଭିଲେନ ହୋଇ କିଏ ସଲମାନଙ୍କ ସହ ଲଢିବେ ତାହା ନେଇ ସୂଚନା ମିଳିଛି ।
ଆଜ୍ଞା ହଁ, ବଲିଉଡର ସିରିୟଲ କିସର ଇମରାନ ହାସମୀଙ୍କ ଏଣ୍ଟ୍ରି ‘ଟାଇଗର 3’ରେ ହୋଇଛି । ଫିଲ୍ମରେ ସେ ଭିଲେନ ଅବତାରରେ ଅଭିନୟ କରିବେ । ଏହାର ସୂଚନା ୟଶରାଜ ଫିଲ୍ମସ୍ ବ୍ୟାନର ତରଫରୁ ଦିଆଯାଇଛି । ସେପଟେ ମେକର୍ସ ଇମରାନଙ୍କ ବିଷୟରେ କହିଛନ୍ତି, ‘ସେ ଜଣେ ଇନଟେନ୍ସ, ଫାଇନ୍ ଆକ୍ଟର । ସବୁ ଭୂମିକାରେ ଦମଦାର ଅଭିନୟ କରିବା ପାଇଁ ସେ ପରିଚିତ । ଆଉ ଟାଇଗର 3ରେ ଭିଲେନ ଭୂମିକାରେ ସେ ଭଲ ଅଭିନୟ କରିବେ ବୋଲି ଆମର ଆଶା ।’
ପ୍ରକାଶ ଥାଉକି ମାର୍ଚ୍ଚରେ ଫିଲ୍ମର ଆକ୍ସନ ସିନ୍ସ ସୁଟ କରିବା ପାଇଁ ଇସ୍ତାନବୁଲ ଯାତ୍ରା କରିବେ ଷ୍ଟାରକାଷ୍ଟ । ପୂର୍ବରୁ ଫିଲ୍ମର ଅଧିକାଂଶ ଆକ୍ସନ ସିନ୍ସ ଦୁବାରେ ସୁଟ୍ ହେବ ବୋଲି ଯୋଜନା କରିଥିଲେ ମେକର୍ସ ।
