ମୁମ୍ବାଇ: ବି-ଟାଉନର ବିକ୍କୀ ଡୋନର ଆୟୁଷ୍ମାନ ଖୁରାନା ବର୍ତ୍ତମାନ ନିଜ ଆଗାମୀ ଫିଲ୍ମ ‘ଶୁଭ ମଙ୍ଗଲ ଜ୍ୟାଦା ସାବଧାନ’କୁ ନେଇ ଚର୍ଚ୍ଚାରେ । ଦର୍ଶକ ତାଙ୍କ ଏହି ଫିଲ୍ମକୁ ନେଇ ଖୁବ୍ ଉତ୍ସାହିତ । କାରଣ ପ୍ରଥମଥର ଆୟୁଷ୍ମାନ ଫିଲ୍ମରେ ସମଲିଙ୍ଗୀ ଭୂମିକାରେ ଅଭିନୟ କରୁଥିବାର ଦେଖାଯିବେ । ସେମିତି ଦେଖିବାକୁ ଗଲେ ଆୟୁଷ୍ମାନଙ୍କୁ ବଲିଉଡର ଫେମସ ନିର୍ମାତା ନିଜ ନିଜ ଫିଲ୍ମରେ ନେବାକୁ ସବୁବେଳେ ବ୍ୟାକୁଳ ଥାଆନ୍ତି । ଇତମଧ୍ୟରେ ଶୁଣିବାକୁ ମିଳୁଛି ଯେ ଆୟୁଷ୍ମାନ ଲୋକପ୍ରିୟ ନିର୍ମାତା ଇମତିଆଜ ଅଲ୍ଲୀଙ୍କ ଆଗାମୀ ଫିଲ୍ମରେ କାମ କରିବାକୁ ମନା କରିଦେଇଛନ୍ତି । ଯାହା ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି ।
ଇମତିଆଜ ପଞ୍ଜାବୀ ଲୋକ ଗାୟକ ଅମର ସିଂଙ୍କ ଜୀବନକୁ ନେଇ ଫିଲ୍ମ ନିର୍ମାଣ କରିବାକୁ ପ୍ଲାନିଂ କରୁଛନ୍ତି । ‘ଜବ ୱି ମେଟ’, ‘ତମାଶା’, ‘ହାଇୱେ’ ଭଳି ଫିଲ୍ମ ନିର୍ମାଣ କରିସାରିଥିବା ଇମତିଆଜ, ଅମରଙ୍କ ରୋଲ ପାଇଁ ଆୟୁଷ୍ମାନଙ୍କ ସହ ସମ୍ପର୍କ କରିଥିଲେ । ହେଲେ ଆକ୍ଟର ତାଙ୍କ ପ୍ରସ୍ତାବକୁ ଅସ୍ବୀକାର କରିଥିଲେ । ଏବେ ଦେଖିବା ବାକି ରହିଲା ଆୟୁଷ୍ମାନଙ୍କ ବ୍ୟତୀତ ଇମତିଆଜଙ୍କ ଏହି ଫିଲ୍ମରେ କିଏ ଅଭିନୟ କରୁଛନ୍ତି ।
ପ୍ରକାଶ ଥାଉକି ପଞ୍ଜାବୀ ଗାୟକ ଅମର ସବୁବେଳେ ନିଜ ବିବାଦୀୟ ଗୀତ ପାଇଁ ଚର୍ଚ୍ଚିତ । ‘ଏଲୱିସ ଅଫ ପଞ୍ଜାବ’ ନାମରେ ମଧ୍ୟ ସେ ଫେମସ । ଶୁଣିବାକୁ ମିଳୁଛି ଯେ ଗୋଟିଏ ମାସ ପୂର୍ବରୁ ଇମତିଆଜ ସ୍କ୍ରପ୍ଟ ସହ ଆୟୁଷ୍ମାନଙ୍କ ସହ ସମ୍ପର୍କ କରିଥିଲେ । ଖାଲି ଏତିକି ନୁହେଁ ସେ ଆୟୁଷ୍ମାନଙ୍କ ବ୍ୟତୀତ କ୍ୟୁଟ ଆକ୍ଟର କାର୍ତ୍ତିକ ଆର୍ୟନଙ୍କୁ ମଧ୍ୟ ଫିଲ୍ମରେ ନେବାକୁ ପ୍ଲାନିଂ କରୁଛନ୍ତି ।
