ମୁମ୍ବାଇ: ଭାରତୀୟ ସରକାରଙ୍କ ପକ୍ଷରୁ ଜାମ୍ମୁ-କାଶ୍ମୀରରୁ 370 ଧାରା ଉଚ୍ଛେଦ ହେବା ପରେ ସମଗ୍ର ଦେଶରେ ଏହାକୁ ସ୍ୱାଗତ କରାଯାଇଛି । ସରକାରଙ୍କ ଏହି ନିଷ୍ପତ୍ତିରେ ଜନସାଧାରଣଙ୍କ ଠାରୁ ନେଇ ସେଲିବ୍ରିଟି ମଧ୍ୟ ସୋସିଆଲ ମିଡିଆରେ ନିଜ ଖୁସି ଜାହିର କରିଛନ୍ତି । ଆଉ ନିଜ ନିଜ ପ୍ରତିକ୍ରିୟା ସୋସିଆଲ ମିଡିଆରେ ଦେବାରେ ଲାଗିଛନ୍ତି ।
ବର୍ତ୍ତମାନ ଏ ପ୍ରସଙ୍ଗ ସମଗ୍ର ଦେଶରେ ଚର୍ଚ୍ଚାର ପରିସର ମଧ୍ୟରେ ରହିଛି । ଏହା ମଧ୍ୟରେ ସୋସିଆଲ ମିଡିଆରେ ଏବେ କ୍ୟୁଟ ଅଭିନେତା ଶାହିଦ କପୁରଙ୍କ ଏକ ଭିଡିଓ ଭାଇରାଲ ହେବାରେ ଲାଗିଛି । ତାଙ୍କ ଫିଲ୍ମ ‘ହାଇଦର’ର ଏହି ଭିଡିଓଟି ବର୍ତ୍ତମାନ ସୋସିଆଲ ମିଡିଆ ୟୁଜର୍ସଙ୍କୁ ଆକର୍ଷିତ କରିଛି ।
‘ହାଇଦର’ ଫିଲ୍ମଟି କାଶ୍ମୀରର ପୃଷ୍ଟଭୂମି ଉପରେ ଆଧାରିତ । ଫିଲ୍ମରେ କାଶ୍ମୀର ବାସୀଙ୍କ ଜବନ କାହାଣୀ ଦେଖିବାକୁ ମିଳିଥିଲା । ଏବେ ସୋସିଆଲ ମିଡିଆରେ ଭାଇରାଲ ହେଉଥିବା ଶାହିଦଙ୍କ ଏହି ଭିଡିଓରେ ସେ ପାକିସ୍ତାନ ଓ ଭାରତର ବିଭାଜନ ଏବଂ 370 ଧାରା ଉପରେ କଥାବାର୍ତ୍ତା କରୁଥିବାର ନଜର ଆସୁଛନ୍ତି । ଆଉ କହୁଛନ୍ତି ପାକିସ୍ତାନ ଓ ଭାରତ ନିଜ ନିଜ ନିଷ୍ପତ୍ତି ଶୁଣାଇ ଦେଲେ କିନ୍ତୁ ଆମ କାଶ୍ମୀରବାସୀଙ୍କ ଇଚ୍ଛା ବିଷୟରେ କେହି ପଚାରିଲେ ନାହିଁ । କାଶ୍ମୀର ବାସୀଙ୍କ ଇଚ୍ଛା ହେଲା ସ୍ବାଧୀନତା ଆଉ କେବଳ ସ୍ବାଧୀନତା ।
ଯଦି ଶାହିଦଙ୍କ ଫିଲ୍ମ ବିଷୟରେ କଥା ହେବା ତେବେ ନିକଟରେ ରିଲିଜ ହୋଇଥିବା ତାଙ୍କ ବହୁ ଚର୍ଚ୍ଚିତ ଫିଲ୍ମ ‘କବୀର ସିଂ’ ବିଶ୍ବସ୍ତରରେ 350 କୋଟି ଆୟ କରିବାରେ ସଫଳ ହୋଇଛି । ଏହାସହ ଫିଲ୍ମଟି ଏବର୍ଷର ସବୁଠାରୁ ଅଧିକ ଆୟ କରିଥିବା ଫିଲ୍ମ ମଧ୍ୟରେ ପ୍ରଥମ ସ୍ଥାନରେ ରହିଛି । ଫିଲ୍ମରେ ଶାହିଦଙ୍କ ସହ ଅଭିନେତ୍ରୀ କିୟାରା ଆଡଭାନୀ ମୁଖ୍ୟ ଭୂମିକାରେ ନଜର ଆସିଥିଲେ । ରୋମାଣ୍ଟିକ କାହାଣୀକୁ ନେଇ କବୀର ସିଂ ଆଧାରିତ ।
