ହାଇଦ୍ରାବାଦ: ବଲିଉଡ ଫିଲ୍ମ ଜଗତରେ ଏମିତି ପ୍ରଥମଥର ପାଇଁ ହେବାକୁ ଯାଉଛି, ଯେଉଁଠି କକା ପୁତୁରାଙ୍କୁ ଚ୍ୟାଲେଞ୍ଜ ଦେବେ । ଆଜ୍ଞା ଆମେ କହୁଛୁ, ଅନିଲ କପୁର ଓ ଅର୍ଜୁନ କପୁରଙ୍କ କଥା । ଉଭୟ ଉଭୟଙ୍କୁ ଖୁବ ଭଲପାଉଥିବାବେଳେ ଏବେ କିନ୍ତୁ ଫିଲ୍ମକୁ ନେଇ ଦେଖାଦେଇପାରେ ଉଭୟଙ୍କ ମଧ୍ୟରେ ମନମତାନ୍ତର ।
କଥା କଣକି, ଅନିଲ କପୁରଙ୍କ ଅଭିନୀତ କମେଡି ଫିଲ୍ମ 'ପାଗଲପନତୀ' 2019 ଡିସେମ୍ବର 6ତାରିଖରେ ରିଲିଜ ହେବ ବୋଲି ନିର୍ମାତା ଘୋଷଣା କରିଛନ୍ତି । କିନ୍ତୁ ଏହିଦିନରେ ଅର୍ଜୁନ କପୁରଙ୍କ ଫିଲ୍ମ 'ପାନିପତ'ବି ରିଲିଜ ହେବ । ଏ ନେଇ ଫିଲ୍ମ ନିର୍ମାତା ଆଶୁତୋଷ ଗୋୱାରିକର ପୂର୍ବରୁ ହିଁ ଘୋଷଣା କରିଦେଇଥିଲେ ।
ଫିଲ୍ମ 'ପାଗଲପନତୀ' ଗୋଟିଏ ମଲ୍ଟିଷ୍ଟାରର କମେଡି ଫିଲ୍ମ । ଫିଲ୍ମରେ ଅନିଲ କପୁରଙ୍କ ସହ ଜନ ଆବ୍ରାହମ,ଇଲିଆନା ଡିକ୍ରୁଜ, ଅର୍ସଦ ୱାର୍ସୀ, ପୁଲକିତ ସମ୍ରାଟ, ଉର୍ବଶୀ ରୌଟେଲା ଓ ସୌରଭ ଶୁକ୍ଳା ଓ କୀର୍ତ୍ତି ଖରବନ୍ଦା ଆଦି ନଜର ଆସିବେ । ଫିଲ୍ମର ନିର୍ଦ୍ଦେଶନା ଅନିସ ବାଜମୀ ଦେଉଥିବାବେଳେ ଏହା ଭୂଷଣ କୁମାର, କୃଷ୍ଣା କୁମାର, କୁମାର ମଙ୍ଗତ ଓ ଅଭିଷେକ ପାଠକ ପ୍ରଯୋଜନା ଦେଉଛନ୍ତି ।
ଅନ୍ୟପଟେ ଫିଲ୍ମ 'ପାନିପତ' କଥା କହିବାକୁ ଗଲେ, ଏହାର ନିର୍ଦ୍ଦେଶନା ଦେଉଛନ୍ତି ଆଶୁତୋଷ ଗୋୱାରିକର । ଫିଲ୍ମରେ ଅର୍ଜୁନ କପୁର ଓ ସଞ୍ଜୟ ଦତ୍ତ ନଜର ଆସିବାବେଳେ ଫିଲ୍ମରେ ଅର୍ଜୁନ ହୋଇଛନ୍ତି ଜଣେ ମରାଠୀ ଯୋଦ୍ଧା । ଫିଲ୍ମ ପାଇଁ ଏବେଠାରୁ ଅର୍ଜୁନ କଠିନ ପରିଶ୍ରମ କରୁଛନ୍ତି । ଫିଲ୍ମ ପାଇଁ ଅର୍ଜୁନ ଖାଲି ନିଜ ଲୁକ ନୁହେଁ ବରଂ ଶରୀରକୁ ନେଇ ମଧ୍ୟ ଆଣିଛନ୍ତି ଖୁବ ପରିବର୍ତ୍ତନ । ତେବେ ଦେଖାଯାଉ କକା କି ପୁତୁରା କିଏ କରୁଛନ୍ତି ବକ୍ସଅଫିସରେ ରାଜ ।
