ମୁମ୍ବାଇ: ନିକଟରେ ଜେଏନୟୁ ହିଂସା ପରେ ଛାତ୍ରଛାତ୍ରୀଙ୍କ ବିରୋଧ ପ୍ରଦର୍ଶନରେ ସାମିଲ ହୋଇ ଚର୍ଚ୍ଚାରେ ଆସିଥିଲେ ଦୀପିକା ପାଦୁକୋନ । ତାଙ୍କ ଏପରି ବ୍ୟବହାରରେ ରାଗିଯାଇ କିଛି ଲୋକ ବିରୋଧ କରିବା ସହ ତାଙ୍କ ଅଭନୀତ ଫିଲ୍ମ ‘ଛପାକ’କୁ ବଏକଟ ପାଇଁ ସୋସିଆଲ ମିଡିଆରେ କରିଥିଲେ । ଯାହାପାଇଁ ତାଙ୍କ ‘ଛପାକ’ର କଲେକ୍ସନ ଉପରେ ଏବେ ପ୍ରଭାବ ପଡୁଥିବାର ଦେଖିବାକୁ ମିଳୁଛି । ‘ଛପାକ’ ବଏକଟ ପରେ ଏବେ ଆଉ କିଛି ୟୁଜର୍ସ ତାଙ୍କ ଲକ୍ସ ବିଜ୍ଞାପନକୁ ମଧ୍ୟ ସୋସିଆଲ ମିଡିଆରେ ବଏକଟ କରିଛନ୍ତି ।
ବର୍ତ୍ତମାନ ଟ୍ବିଟରରେ ତାଙ୍କ ଲକ୍ସ ବିଜ୍ଞାପନକୁ ନେଇ ଅନେକ ମିମି ଦେଖିବାକୁ ମିଳୁଛି । ଟ୍ବିଟରରେ ଏଯାବତ ଲୋକ ଏହି ହ୍ୟାଶଟ୍ୟାଗ ସହ 33 ହଜାରରୁ ଅଧିକ ଟ୍ବିଟ କରିସାରିଲେଣି । ୟୁଜର୍ସଙ୍କ ଅନୁଯାୟୀ ଯଦି ଲକ୍ସ କମ୍ପାନୀ ନିଜ ବ୍ରାଣ୍ଡକୁ ବଞ୍ଚାଇବାକୁ ଚାହୁଁଛି ତେବେ ବିଜ୍ଞାପନରୁ ଦୀପିକାଙ୍କୁ ହଟାଇ ଦେଉ ।
ପ୍ରକାଶ ଥାଉକି ଏପରି ଏକ ମାମଲା 2016ରେ ମଧ୍ୟ ସାମ୍ନାକୁ ଆସିଥିଲା । କୌଣସି ବିବାଦକୁ ଆଧାର କରି ସ୍ନାପଡିଲ କମ୍ପାନୀ ଆମୀର ଖାନଙ୍କୁ ନିଜ ବ୍ରାଣ୍ଡ ଆମ୍ବାସଡର ପଦରୁ ହଟାଇଥିଲା । କଥାଟି ହେଲା ଯେ ଆମୀର ସେହି ସମୟରେ ଆୟୋଜିତ ଏକ କାର୍ଯ୍ୟକ୍ରମରେ କହିଥିଲେ ଭାରତରେ ଅସହିଷ୍ଣୁତା ବଢିଚାଲିଛି । ଯାହାପାଇଁ ତାଙ୍କ ପତ୍ନୀ ତାଙ୍କୁ ଭାରତ ଛାଡିବାକୁ କହିଥିଲେ ।
ଆମୀରଙ୍କ ଏହି ବୟାନ ତାଙ୍କୁ ବିବାଦ ଘେରରେ ଆଣିଦେଇଥିଲା । ସୋସିଆଲ ମିଡିଆରେ ଅନେକ ଲୋକ ତାଙ୍କୁ ଦେଶୀଦ୍ରୋହୀ ମଧ୍ୟ କହିଥିଲେ । ସେହିପରି ସ୍ନାପଡିଲ କମ୍ପାନୀଙ୍କୁ ଅନେକ ଚେତାବନୀ ମିଳିଥିଲା ଯେ ଆମୀରଙ୍କୁ ଯେପର୍ଯ୍ୟନ୍ତ ବ୍ରାଣ୍ଡ ଆମ୍ବାସଡର ଅଛନ୍ତି ଏହାର ଜିନିଷ କେହି କିଣିବେ ନାହିଁ ।
