ମୁମ୍ବାଇ: ଲକଡାଉନ କୋହଳ ହେବା ପରେ ଧିରେ ଧିରେ କରି ଜନଜୀବନ ପୂର୍ବ ଅବସ୍ଥାକୁ ଫେରିବାରେ ଲାଗିଛି । ଦେଶର ଅନେକ ବଡ ବଡ କମ୍ପାନୀର କାର୍ଯ୍ୟ ମଧ୍ୟ ଆରମ୍ଭ ହୋଇଗଲାଣି । ସେହିପରି ନିକଟରେ ମହାରାଷ୍ଟ୍ର ସରକାର ତରଫରୁ ଟିଭି ଏବଂ ଫିଲ୍ମ ଇଣ୍ଡଷ୍ଟ୍ରିର କାମ ପାଇଁ ଅନୁମତି ମିଳିଥିଲା । ଯାହାପରେ ଏବେ ସବୁ ଧାରାବାହିକ ଓ ଅଧା ଥିବା ଫିଲ୍ମର ସୁଟିଂ ଆରମ୍ଭ ହୋଇଯାଇଛି । ଲକଡାଉନ ପାଇଁ ଗତ ତିନି ମାସରୁ ସୁଟିଂ, ଫିଲ୍ମ ରିଲିଜ ସବୁ ସ୍ଥିଗତ ରହିଥିଲା । ସେହିପରି ଏବେ ସୁଟିଂ ସେଟକୁ ଫେରିଛନ୍ତି ଫେମସ ଅଭିନେତ୍ରୀ ଅଦା ଶର୍ମା । ଯାହାକୁ ନେଇ ସେ ନିଜ ଅନୁଭୂତି ସୋସିଆଲ ମିଡିଆରେ ସେୟାର କରିଛନ୍ତି ।
ଦୀର୍ଘ ଦିନର ବ୍ୟବଧାନ ପରେ ଅଦା ନିଜ କାମକୁ ଫେରିଛନ୍ତି । ଆଉ କହିଛନ୍ତି ଏବେ ଯୁଦ୍ଧକ୍ଷେତ୍ରରେ ଥିବା ଭଳି ଜଣାପଡୁଛି । ପ୍ରକାଶ ଥାଉକି ସେ ଏକ କଫି ବ୍ରାଣ୍ଡ ପାଇଁ ବିଜ୍ଞାପନର ସୁଟିଂ କରିଛନ୍ତି ।
ଏହି ବିଜ୍ଞାପନକୁ ସଫଳ କରିବା ପାଇଁ ସ୍କ୍ରିପ୍ଟରେ କିଛି ପରିବର୍ତ୍ତନ ମଧ୍ୟ କରାଯାଇଛି । ଏହି ଅବସରରେ ଅଦା ସୋସିଆଲ ମିଡିଆରେ ସୁଟିଂର ଫଟୋ ସେୟାର କରିଛନ୍ତି । ଯେଉଁଥିରେ ସେ ସିଲ୍ଡ ମାସ୍କ ପିନ୍ଧିଥିବାର ନଜର ଆସୁଛନ୍ତି । ଆଉ ସାଥିରେ ତାଙ୍କର ଦୁଇ କ୍ରୁ ମେମ୍ବର ମଧ୍ୟ ଥିବାର ଦେଖାଯାଉଛନ୍ତି ।
