ହାଇଦ୍ରାବାଦ: 2023 ବର୍ଷ ଆମ ସମସ୍ତଙ୍କୁ ବିଦାୟ ଦେବାକୁ ଯାଉଛି । 2023 ଅସ୍ତ ହେବା ପାଇଁ ଆଉ ଦିନ କେଇଟା ବାକି ରହିଛି । 2024ର ସୂର୍ଯ୍ୟୋଦୟ ନୂଆ ଆଶା ଆଣିବା ସହିତ ଅଧୁରା କାର୍ଯ୍ୟକୁ ପୂର୍ଣ୍ଣାଙ୍ଗ ରୂପ ଦେବ ବୋଲି ଆଶା କରାଯାଉଛି । ନୂଆ ସ୍ବପ୍ନ ଆଣି ଭାରତକୁ ଆହୁରି ସଫଳତା ଦେବା ନେଇ ସମସ୍ତେ ଲକ୍ଷ୍ୟ ରଖିଛନ୍ତି । ବର୍ଷ ବିତିବା ସହିତ ସମସ୍ତ ଭଲ ଏବଂ ଖରାପ ସ୍ମୃତି ମଧ୍ୟ ମନରେ ସତେଜ ହୋଇଥାଏ । ଯଦି ଦେଖିବା 2023ରେ ଅନେକ ଟେକ୍ନୋଲୋଜି ଆସିଛି । ସେଥିମଧ୍ୟରୁ ଗୋଟିଏ ହୋଇଛି ଆର୍ଟିଫିସିଆଲ ଇଣ୍ଟେଲିଜେନ୍ସ (AI)। ଟେକ୍ନୋଲୋଜିରେ ଅଗ୍ରଗତି ପାଇଁ ଆର୍ଟିଫିସିଆଲ ଇଣ୍ଟେଲିଜେନ୍ସ ଆଉ ପାଦେ ଆଗକୁ ବଢାଇବାରେ ସାହାଯ୍ୟ କରିବ ବୋଲି ଆଶା କରାଯାଉଛି ।
ତେବେ ଏଆଇର ବ୍ୟବହାର ଦେଖି ବିଶ୍ବବାସୀଙ୍କ ମନରେ ଭୟ ମଧ୍ୟ ବୃଦ୍ଧି ପାଇବାରେ ଲାଗିଛି । ମଣିଷ ତିଆରି କରିଥିବା ଏକ ପ୍ରଯୁକ୍ତିବିଦ୍ୟା ଯେ ମଣିଷର ସ୍ଥାନ ଦିନେ ନେଇଯିବ ତାହା ଚିନ୍ତା କରିବା ଭୁଲ ହେବ । କେତେକ ବୈଜ୍ଞାନିକ ଏଆଇକୁ ନେଇ ବିପଦ ନେଇ ଭବିଷ୍ୟବାଣୀ କରିଥିବା ବେଳେ ମଣିଷ ଓ ଏଆଇ ଏକାସହ ମିଶି କାମ କଲେ, ଆମେ ଅଧିକ ତ୍ରୁଟିଶୂନ୍ୟ ଓ ତଥ୍ୟଭିତ୍ତିକ ହୋଇପାରିବା ବୋଲି ଆଉ କେତେକ ବୈଜ୍ଞାନିକ ମତପୋଷଣ କରିଛନ୍ତି । ତେବେ ଆପଣ ଜାଣିଛନ୍ତି କି ଆର୍ଟିଫିସିଆଲ ଇଣ୍ଟେଲିଜେନ୍ସ କଣ ? କେଉଁ କ୍ଷେତ୍ରରେ କିଭଳି ସାହାଯ୍ୟ କରୁଛି ଏଆଇ...ସମ୍ପୂର୍ଣ୍ଣ ବିବରଣୀ ପାଇଁ ପଢନ୍ତୁ ଆମର ପୁରା ରିପୋର୍ଟ
ଆର୍ଟିଫିସିଆଲ ଇଣ୍ଟେଲିଜେନ୍ସ କଣ: AI ବା ଆର୍ଟିଫିସିଆଲ ଇଣ୍ଟେଲିଜେନ୍ସକୁ କୃତ୍ରିମ ବୁଦ୍ଧିମତା କୁହାଯାଏ । ଯାହାର ଅର୍ଥ କୃତ୍ରିମ ଅର୍ଥାତ୍ କୃତ୍ରିମ ଭାବରେ ବିକଶିତ ବୌଦ୍ଧିକ ଦକ୍ଷତା । ଆର୍ଟିଫିସିଆଲ ଇଣ୍ଟେଲିଜେନ୍ସ ହେଉଛି କମ୍ପ୍ୟୁଟର ସାଇନ୍ସର ଏକ ଉନ୍ନତ ଶାଖା । ଏଥିରେ କମ୍ପ୍ୟୁଟର ପ୍ରୋଗ୍ରାମିଂ ମାଧ୍ୟମରେ ଏକ ଯନ୍ତ୍ରକୁ ବୁଦ୍ଧିମାନ କରିବାକୁ ଚେଷ୍ଟା କରାଯାଏ । ଯାହାଦ୍ବାରା ମେସିନ ମଧ୍ୟ ମଣିଷ ପରି ଭାବିପାରେ ଏବଂ ନିଷ୍ପତ୍ତି ନେଇପାରେ । ଅନ୍ୟ ଅର୍ଥରେ, ଆର୍ଟିଫିସିଆଲ ଇଣ୍ଟେଲିଜେନ୍ସ ସାହାଯ୍ୟରେ ଏପରି ଏକ କମ୍ପ୍ୟୁଟର ସିଷ୍ଟମ୍ କିମ୍ବା ରୋବୋଟିକ୍ ସିଷ୍ଟମ ତିଆରି କରାଯାଇଥାଏ, ଯାହା ସମାନ ତର୍କ ଆଧାରରେ ଚାଲିବାକୁ ଚେଷ୍ଟା କରେ ଯାହା ମନୁଷ୍ୟର ବୁଦ୍ଧି ଭଳି କାମ କରିଥାଏ ।
ଆର୍ଟିଫିସିଆଲ ଇଣ୍ଟେଲିଜେନ୍ସର ଇତିହାସ: ଆର୍ଟିଫିସିଆଲ ଇଣ୍ଟେଲିଜେନ୍ସ କମ୍ପ୍ୟୁଟର ବିଜ୍ଞାନ, ମନୋବିଜ୍ଞାନ, ଭାଷାବିଜ୍ଞାନ, ଦର୍ଶନ ଏବଂ ଅନ୍ୟାନ୍ୟ ଅନେକ କ୍ଷେତ୍ରକୁ ମଧ୍ୟ ଆକର୍ଷିତ କରିଥାଏ। ଆମେରିକୀୟ କମ୍ପ୍ୟୁଟର ବୈଜ୍ଞାନିକ ଜନ୍ ମ୍ୟାକାଥିଙ୍କୁ ଆର୍ଟିଫିସିଆଲ ଇଣ୍ଟେଲିଜେନ୍ସର ଜନକ ଭାବରେ ବିବେଚନା କରାଯାଏ । ମ୍ୟାକାଥି 1956ରେ ଡର୍ଟମାଉଥ ସମ୍ମିଳନୀ ଆୟୋଜନ କରିଥିବା ବେଳେ ଏହି ସମ୍ମିଳନୀରେ ସେ ପ୍ରଥମ ଥର ପାଇଁ AIର ଧାରଣା ଏବଂ ସମ୍ଭାବନା ବିଷୟରେ ଆଲୋଚନା କରିଥିଲେ । 1950 ଦଶକରେ AI ଆରମ୍ଭ ହୋଇଥାଇପାରେ, କିନ୍ତୁ 1980ରେ ଏହା ସ୍ୱୀକୃତି ପାଇଲା ।
1970ରୁ 80 ଦଶକରେ ପ୍ରଥମେ ଏଆଇ ଓ୍ବିଣ୍ଟର ସାମ୍ନାକୁ ଆସିଥିଲା ଏହାପରେ AI Renaissance ହୋଇଥିଲା। 1990 ଦଶକରେ ଭିଡିଓ ପ୍ରୋସେସିଂ ଆରମ୍ଭ ହୋଇଥିଲା । ଏହାପରେ 2000 ଦଶକରେ ଆଇବିଏମ୍ ୱାଟସନ, ବ୍ୟକ୍ତିଗତ ସହାୟକ(Personal Assistants), ମୁଖ ଚିହ୍ନିବା(Facial Recognition), ସ୍ୱୟଂଶାସିତ ଯାନ(Autonomous Vehicle ଏବଂ ବିଷୟବସ୍ତୁ- ପ୍ରତିଛବି(Content And Image Creation) ତିଆରି କରାଯାଇଥିଲା । 2015 ମସିହାରେ ଅନେକ ପ୍ରଯୁକ୍ତିବିଦ୍ୟା କ୍ଷେତ୍ରରେ ଏଆଇର ବ୍ୟବହାର କରାଯାଇଥିଲା । 2022 ମସିହାରେ ଏଆଇ ଚାଟବୋଟ, 2023 ମସିହାରେ ଗୁଗଲ ଆକ୍ସେସ ସହିତ ଅନେକ ପ୍ଲାଟଫର୍ମରେ ଏଆଇ ଚାଟବୋଟ ଲଞ୍ଚ କରାଯାଇଥିଲା । ତେବେ ଏହାରି ଭିତରେ 2024 ମସିହାରେ ଆପଲ ଏଆଇ ଚାଟବୋଟ ଲଞ୍ଚ କରିବା ନେଇ ପ୍ରସ୍ତୁତି ଆରମ୍ଭ କରିଛି । ଆଗାମୀ ସମୟରେ, ଏଆଇ ଟେକ୍ନୋଲୋଜି ଦୁନିଆର ସବୁଠାରୁ ମୂଲ୍ୟବାନ ଏବଂ ଶକ୍ତିଶାଳୀ ଅସ୍ତ୍ର ହୋଇପାରେ ।
ଦେଶରେ ଏଆଇ ଆଙ୍କର: ବର୍ତ୍ତମାନ ଲୋକଙ୍କ ମୁହଁରେ କେବଳ ଗୋଟିଏ ଶବ୍ଦ AI । ପୂର୍ବରୁ ଆର୍ଟିଫିସିଆଲ ଇଣ୍ଟେଲିଜେନ୍ସର ବ୍ୟବହାର ହେଉଥିଲେ ହେଁ ପ୍ରଚାର ପ୍ରସାରରେ ଅଭିବୃଦ୍ଧି ହୋଇନଥିଲା । କିନ୍ତୁ ଚଳିତ ବର୍ଷ ଏହାର ବ୍ୟବହାର ବୃଦ୍ଧି ପାଇଛି । ପ୍ରଥମଥର ପାଇଁ ଓଡିଆ ଗଣମାଧ୍ୟମ ଟ୍ୟାନେଲ ଦେଶର ପ୍ରଥମ ଏଆଇ ଆଙ୍କର ଲଞ୍ଚ କରିଛି। ଏଆଇ ସହାୟତାରେ ମଣିଷ ସଦୃଶ ଦେଖାଯାଉଥିବା ରୋବଟ୍ ଖବର ପଢିବାରେ ସକ୍ଷମ ହେଉଛି ।
ଆର୍ଟିଫିସିଆଲ ଇଣ୍ଟେଲିଜେନ୍ସର ବ୍ୟବହାର ଏବଂ ଭବିଷ୍ୟତ: ଅନେକ କ୍ଷେତ୍ରରେ AI ବ୍ୟବହୃତ ହେଉଛି । ସମୟ ସହିତ ସମସ୍ତ କ୍ଷେତ୍ରରେ ଏହାର ବ୍ୟବହାର ବୃଦ୍ଧି ପାଇବାରେ ଲାଗିଛି। ଶିକ୍ଷା, ସ୍ବାସ୍ଥ୍ୟ ଠାରୁ ଆରମ୍ଭ କରି ମାର୍କେଟିଂ କୃଷି କ୍ଷେତ୍ର ପର୍ଯ୍ୟନ୍ତ ସବୁଥିରେ ଏଆଇର ବ୍ୟବହାର କରାଯାଉଛି । ଆର୍ଟିଫିସିଆଲ ଇଣ୍ଟେଲିଜେନ୍ସର ଭବିଷ୍ୟତ ଅତ୍ୟନ୍ତ ଆକର୍ଷଣୀୟ। ଏହି ଟେକ୍ନୋଲୋଜି ସମ୍ବନ୍ଧରେ ପ୍ରତିଦିନ କିଛି ନୂଆ ଘଟଣା ଘଟୁଛି । ଆଜିକାଲି ଏହାର ଆଡଭାନ୍ସ ଏବଂ ଡିପ ଲର୍ଣ୍ଣିଂ ମଡେଲ ଗୁଡିକ ବହୁତ ଦ୍ରୁତ ଗତିରେ ବିକାଶ କରୁଛି । ଯାହା ଡାକ୍ତରୀ ନିରାକରଣ, ସ୍ୱୟଂ ଚାଳିତ କାର, ସ୍ମାର୍ଟ ହାଉସ୍, ଷ୍ଟକ୍ ମାର୍କେଟ ବିଶ୍ଳେଷଣ ଇତ୍ୟାଦି ଅନେକ କାର୍ଯ୍ୟରେ ବ୍ୟବହୃତ ହେଉଛି । ଆର୍ଥିକ ବିକାଶ ଏବଂ ସାମାଜିକ ପ୍ରଗତି କ୍ଷେତ୍ରରେ ଆର୍ଟିଫିସିଆଲ ଇଣ୍ଟେଲିଜେନ୍ସର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି । ସ୍ୱାସ୍ଥ୍ୟସେବା, ଅର୍ଥ, ଶିକ୍ଷା, ସାମରିକ, ସାଇବର ସୁରକ୍ଷା, ପରିବହନ ଏବଂ ବିଜ୍ଞାପନ ଭଳି ବିଭିନ୍ନ କ୍ଷେତ୍ରକୁ ଏଆଇ ବିସ୍ତାର କରିବାକୁ ଆଶା କରାଯାଉଛି।
ସ୍ବାସ୍ଥ୍ୟ କ୍ଷେତ୍ର: ସ୍ୱାସ୍ଥ୍ୟସେବା କ୍ଷେତ୍ରରେ AI ଅଧିକ ବ୍ୟବହୃତ ହେଉଛି । କର୍କଟ ରୋଗ ଭଳି ମାରାତ୍ମକ ରୋଗ ଠାରୁ ଆରମ୍ଭ କରି ରେଡିଓଲୋଜି ପର୍ଯ୍ୟନ୍ତ, AI ସଠିକ୍ ଫଳାଫଳ ନିର୍ଣ୍ଣୟ ପାଇଁ ବ୍ୟବହୃତ ହୁଏ । ଏଥି ସହିତ ଏଆଇ ମାଇକ୍ରୋସ୍କୋପ୍ ସାହାଯ୍ୟରେ ସାଂଘାତିକ ରକ୍ତ ରୋଗର ସଠିକ୍ ତଥ୍ୟ ମଧ୍ୟ ମିଳିପାରିବ । ଏକ୍ସ-ରେ, ସିଟି ସ୍କାନ୍, ଏମଆରଆଇ ସ୍କାନ ପରି କାମରେ AIର ବ୍ୟବହାର ଅଧିକା କରାଯାଉଛି । ତେବେ ଆଗାମୀ ଭବିଷ୍ୟତୀରେ ଚିକିତ୍ସା କ୍ଷେତ୍ରରେ ହେଉଥିବା ଡାକ୍ତରଙ୍କ ଅଭାବ ଏବଂ ରୋଗ ଚିହ୍ନଟ କରି ପ୍ରତ୍ୟେତ ଚ୍ୟାଲେଞ୍ଜକୁ ଗ୍ରହଣ କରିବ ଏଆଇ। ଶୀଘ୍ର ରୋଗ ଚିହ୍ନଟ ହେବା ସହିତ ମୃତ୍ୟୁକୁ ମଧ୍ୟ ରୋକାଯାଇ ପାରିବ।
ଶିକ୍ଷା କ୍ଷେତ୍ର: ଯଦି କହିବା ଶିକ୍ଷା କ୍ଷେତ୍ରରେ ଏଆଇ ଏକ ବୈପ୍ଳବତ୍ମକ ପରିବର୍ତ୍ତନ ଆଣିଛି । AI ଦ୍ବାରା ଛାତ୍ରମାନେ ବର୍ତ୍ତମାନ ଶିକ୍ଷକମାନଙ୍କ ସହିତ ଯୋଗାଯୋଗ ନକରି ଶିକ୍ଷାଗତ ଉତ୍ସଗୁଡିକ ପାଇପାରୁଛନ୍ତି । ଛାତ୍ରମାନଙ୍କର ଶିକ୍ଷଣ ପସନ୍ଦ ଏବଂ ପଦ୍ଧତି ଅନୁସନ୍ଧାନ କରି, AI ସେମାନଙ୍କୁ ବ୍ୟକ୍ତିଗତ ଶିକ୍ଷଣ ଅଭିଜ୍ଞତା ମଧ୍ୟ ପ୍ରଦାନ କରିପାରିବ । ଆଗାମୀ ଦିନରେ ଚାଲେଞ୍ଜର ସମ୍ମୁଖୀନ ହେଉଥିବା ବ୍ୟକ୍ତିଙ୍କ ପାଇଁ ପଥପ୍ରଦର୍ଶକ ସାଜିବ ଏଆଇ ।
କୃଷି କ୍ଷେତ୍ର: କୃଷି ଶିଳ୍ପରେ AI ଦକ୍ଷତା, ଉତ୍ପାଦକତା ଏବଂ ସ୍ଥିରତା ବୃଦ୍ଧି କରି ପରିବର୍ତ୍ତନ ଆଣିଥାଏ । ସଠିକ୍ ଚାଷରେ AI ବହୁତ ପ୍ରଭାବଶାଳୀ । ସଠିକ୍ ଚାଷରେ, ଡିଜିଟାଲ୍ କୃଷି ପ୍ରଯୁକ୍ତିବିଦ୍ୟା ବ୍ୟବହାର କରି ଫସଲ ଉତ୍ପାଦନ ବୃଦ୍ଧି ପାଇଁ ପ୍ରୟାସ କରାଯାଏ । ଏହି ପ୍ରକାର ଚାଷରେ, AI ସେନ୍ସର, ଡ୍ରୋନ୍ ଏବଂ ଉପଗ୍ରହର ତଥ୍ୟ ବିଶ୍ଳେଷଣ କରେ ଏବଂ ପ୍ରକୃତ ସମୟ ତଥ୍ୟ ଉପରେ ଆଧାର କରି କୃଷକମାନଙ୍କୁ ଜଳ, ସାର ଏବଂ କୀଟନାଶକ ବ୍ୟବହାର ବିଷୟରେ ସଠିକ୍ ସୂଚନା ଦେଇଥାଏ । ମଞ୍ଜି ବୁଣିବାଠାରୁ ଆରମ୍ଭ କରି ଫସଲର ଅମଳ ପର୍ଯ୍ୟନ୍ତ, AI ଯନ୍ତ୍ରପାତି ଉପରେ ଆଧାରିତ ସ୍ୱୟଂଚାଳିତ ଯନ୍ତ୍ର ଏବଂ ରୋବୋଟିକ୍ସ ବିକଶିତ ହେଉଛି ।
ଆର୍ଥିକ କ୍ଷେତ୍ର: ଏହି କ୍ଷେତ୍ରରେ AI ଜାଲିଆତି ଚିହ୍ନଟ ଏବଂ ଯାଞ୍ଚ ସହିତ କ୍ରେଡିଟ୍ ସ୍କୋରିଂ ଏବଂ ଆର୍ଥିକ କାରବାରରେ ମୂଲ୍ୟାଙ୍କନ ପାଇଁ ବ୍ୟବହୃତ ହୁଏ । ଦ୍ରୁତ ଏବଂ ସଠିକ୍ ଉତ୍ତର ପ୍ରଦାନ କରିବାକୁ ଗ୍ରାହକ ସେବାରେ AI ଚାଟବୋଟ ବ୍ୟବହୃତ ହୋଇଥାଏ। ଭବିଷ୍ୟତରେ ବିଶେଷତଃ ପାଣ୍ଠି ପରିଚାଳନା କ୍ଷେତ୍ରରେ ଏଆଇର ବ୍ୟବହାର ବୃଦ୍ଧି ପାଇବ ବୋଲି ଆଶା କରାଯାଉଛି।
ମାର୍କେଟିଂ ଏବଂ ବିଜ୍ଞାପନ କ୍ଷେତ୍ର: AI ବ୍ୟକ୍ତିଗତ ବିଜ୍ଞାପନ ପ୍ରଦାନ କରିବାକୁ ଉପଭୋକ୍ତା ପ୍ରାଥମିକ ଏବଂ ଆଚରଣ ବିଶ୍ଳେଷଣ କରି ଲକ୍ଷ୍ୟ ରଖାଯାଇଥିବା ବିଜ୍ଞାପନରେ ସାହାଯ୍ୟ କରେ ।
ଏହା ମଧ୍ୟ ପଢନ୍ତୁ: ଉପଲବ୍ଧିର ବର୍ଷ 2023: ମହାକାଶ ମହାରେକର୍ଡ, ଜହ୍ନ ରାଇଜରେ ତ୍ରିରଙ୍ଗା ଉଡାଇ ଇତିହାସ ରଚିଲା ଭାରତ
ଗମନାଗମନ: ସ୍ୱୟଂଚାଳିତ ଯାନ ସହିତ ପରିବହନ କ୍ଷେତ୍ରରେ AI ଅନେକ ସାହାଯ୍ୟ କରୁଛି । ନାଭିଗେସନ୍ ଏବଂ ଟ୍ରାଫିକ୍ ପରିଚାଳନାରେ AI ଆଲଗୋରିଦମ ସାହାଯ୍ୟ କରେ । ମାର୍ଗ ଯୋଜନା ଏବଂ ବିପର୍ଯ୍ୟୟ ନିରାକରଣ ପାଇଁ ଉପଯୋଗ ହେବ ଏଆଇ।
ସାଇବର ସିକ୍ୟୁରିଟି: ଏହି କ୍ଷେତ୍ରରେ AI ଏକ ଆବଶ୍ୟକତା ପାଲଟିଛି । ସାଇବର ନିରାପତ୍ତାରେ, ନେଟୱାର୍କ ଟ୍ରାଫିକରେ ଢାଞ୍ଚା ଏବଂ ଅସନ୍ତୁଷ୍ଟତାକୁ ଚିହ୍ନିବା ପାଇଁ AI ଅଧିକରୁ ଅଧିକ ବ୍ୟବହୃତ ହେଉଛି । ଏହା ଉପଭୋକ୍ତା ପ୍ରାମାଣିକିକରଣ ଏବଂ ଜାଲିଆତି ଚିହ୍ନଟ କରିବାରେ ମଧ୍ୟ ସାହାଯ୍ୟ କରେ।
ପ୍ରତିରକ୍ଷା କ୍ଷେତ୍ର: ଏହି କ୍ଷେତ୍ରରେ AI ଅଧିକ ପ୍ରାସଙ୍ଗିକ ହୋଇପାରିଛି ଏବଂ ସାମରିକ କାର୍ଯ୍ୟର ବିଭିନ୍ନ ଦିଗକୁ ପରିବର୍ତ୍ତନ କରିବାର ସାମର୍ଥ୍ୟ ଅଛି। ସେନାର ବିଭିନ୍ନ ବ୍ୟାୟାମରେ ସ୍ୱୟଂଚାଳିତ ଯାନ, ଡ୍ରୋନ୍ ଏବଂ ରୋବଟ୍ ବିକାଶ ପାଇଁ AI ବ୍ୟବହୃତ ହେଉଛି । ତେବେ ଆଗାମୀ ଦିନରେ ଅସ୍ତ୍ରଶସ୍ତ୍ର ତିଆରି କରି ପ୍ରତିରକ୍ଷା କ୍ଷେତ୍ରକୁ ଆହୁରି ଦୃଢ କରିପାରିବ ଆର୍ଟିଫିସିଆ ଇଣ୍ଟେଲିଜେନ୍ସ।
ଗ୍ରାଣ୍ଡ ଭ୍ୟୁର ରିସର୍ଚ୍ଚ ଅନୁସାରେ, ଆର୍ଟିଫିସିଆଲ ଇଣ୍ଟେଲିଜେନ୍ସର ଅଭିବୃଦ୍ଧି ବଢିବାରେ ଲାଗିଛି। 2023ରୁ 2030 ସୁଦ୍ଧା ବାର୍ଷିକ ଅଭିବୃଦ୍ଧି ହାର(CAGR) 37.3 ପ୍ରତିଶତ ବୃଦ୍ଧି ପାଇବ ବୋଲି ଆଶା କରାଯାଉଛି।
ଭାରତରେ ଖୋଲିଲା ପ୍ରଥମ ଏଆଇ ସ୍କୁଲ: ଭାରତରେ ଚଳିତ ବର୍ଷ ଅଗଷ୍ଟ 22 ତାରିଖରେ ପ୍ରଥମ ଏଆଇ ସ୍କୁଲ ଖୋଲିଥିଲା। ଦେଶର ପୂର୍ବତନ ରାଷ୍ଚ୍ରପତି ରାମନାଥ କୋବିନ୍ଦ କେରଳ ସ୍ଥିତ ଥିରୁଅନନ୍ତପୁରମର ଶାନ୍ତାଗିରି ବିଦ୍ୟାଭବନରେ ଏହି ବିଦ୍ୟାଳୟର ଉଦଘାଟନ କରିଥିଲେ । ଏହି ସ୍କୁଲର ଡିଜାଇନ ଏବଂ ମଡ୍ୟୁଲ ବିଶ୍ବର ଖ୍ୟାତିନାମା ଶିକ୍ଷଣୀୟ ପ୍ଲାଟଫର୍ମ(ILE) ଆମେରିକା ବୈଦିକ ଇସ୍କୁଲ ସହିତ ମିଶି ତିଆରି କରିଥିଲେ।
ବ୍ୟୁରୋ ରିପୋର୍ଟ, ଇଟିଭି ଭାରତ
