ନୂଆଦିଲ୍ଲୀ: ଟ୍ୟୁବରକଲୋସିସ୍(ଟିବି) ପାଇଁ ଉଦ୍ଦିଷ୍ଟ ବିସିଜି(ବ୍ୟାସିଲସ୍ କାଲମେଟ୍ ଗୁଏରିନ୍) ଟିକା ଆଲଜାଇମର୍ ସହ ଅନ୍ୟ କିଛି କିଛି ରୋଗକୁ କମାଇବାରେ ସହାୟକ ହୋଇଥାଏ ବୋଲି ଏକ ଅଧ୍ୟୟନରୁ ଜଣାପଡିଛି । ବିସିଜି ଟିକା ଏକାଧିକ ଲାଭଦାୟକ ପ୍ରଭାବ ପ୍ରଦାନ କରୁଥିବା ଦେଖିବାକୁ ମିଳିଛି । ମାସଂପେଶୀ ଜନିତ ସମସ୍ୟା ଏବଂ ବ୍ଲାଡକ କ୍ୟାନସର ପାଇଁ ଏହାକୁ ସୁପାରିସ କରାଯାଉଥିବା ନେଇ କିଛି ବୈଜ୍ଞାନିକ କହିଛନ୍ତି ।
ମାସାଚୁସେଟ୍ସ ଜେନେରାଲ୍ ହସ୍ପିଟାଲ୍ (MGH) ଏବଂ ବ୍ରିଗମ୍ ଏବଂ ମହିଳା ଡାକ୍ତରଖାନା(BWH)ର ଟିମ୍ 6,467 ଜଣ ବ୍ଲାଡର କ୍ୟାନ୍ସର ରୋଗୀକୁ ନେଇ 15 ବର୍ଷ ପର୍ଯ୍ୟନ୍ତ ରିସର୍ଚ୍ଚ କରିଥିଲେ । ଏହି ଗୋଷ୍ଠୀରେ 3,388 ରୋଗୀ ବିସିଜି ଟିକା ନେଇଥିଲେ । ଅନ୍ୟପଟେ 3,079 ଜଣ ବୟସ ଏବଂ ଅନ୍ୟାନ୍ୟ ବାର୍ଦ୍ଧକ୍ୟ ଜନିତ ରୋଗରେ ପୀଡିତ ଥିଲେ ।
ଅନୁସନ୍ଧାନ ସମୟରେ, ଜାମା ନେଟୱାର୍କ ଓପନ୍ ପତ୍ରିକାରେ ପ୍ରକାଶିତ ଅଧ୍ୟୟନରୁ ଜଣାପଡ଼ିଛି ଯେ ବିସିଜି ଟିକା ଗୋଷ୍ଠୀର 202 ରୋଗୀ ଏବଂ କଣ୍ଟ୍ରୋଲ୍ ଗ୍ରୁପରେ 262 ରୋଗୀ ଆଲଜାଇମର ରୋଗ ଏବଂ ଆନୁସଙ୍ଗିକ ଡିମେନ୍ସିଆ ରୋଗରେ ଆକ୍ରାନ୍ତ ହୋଇଥିଲେ। ଅନୁସନ୍ଧାନକାରୀମାନେ କହିଛନ୍ତି ଯେ, ପ୍ରତି ବର୍ଷରେ 1000ଜଣଙ୍କ ଭିତରେ 8.8 ପ୍ରତିଶତ ଚିହ୍ନଟ ହୋଇଥିବା ବେଳେ ବିସିଜି ଟିକା ନେଇନଥିବା ପ୍ରାୟ 12.1 ପ୍ରତିଶତ ଲୋକ ବର୍ଷକୁ ଚିହ୍ନଟ ହେଉଛନ୍ତି। ବିଶ୍ଳେଷଣରୁ ଜଣାପଡିଛି ଯେ ବିସିଜି ଟିକା ସହିତ ଚିକିତ୍ସା ଆଲଜାଇମର ରୋଗ ଏବଂ ଡିମେନ୍ସିଆର 20 ପ୍ରତିଶତ କମ ବିପଦ ହୋଇଥାଏ।
70 ବର୍ଷରୁ ଅଧିକ ବୟସ୍କ ରୋଗୀଙ୍କ କ୍ଷେତ୍ରରେ ଏହା ଅଧିକ ସହାୟକ ହୋଇଥିଲା। ବିସିଜି ଟିକା ନେଇଥିବା ଗୋଷ୍ଠୀରୁ 751ଜଣ ଏବଂ ବିସିଜି ଟିକା ନେଇନଥିବା ଗ୍ରୁପରୁ 973ଜଣଙ୍କ ମୃତ୍ୟୁ ହୋଇଥିଲା । ବିସିଜି ଟିକା ନେଇଥିବା ବ୍ୟକ୍ତିଙ୍କଠାରେ ମୃତ୍ୟୁ ହେବାର ଆଶଙ୍କା 25 ପ୍ରତିଶତ କମ ରହିଥାଏ ବୋଲି ଅନୁସନ୍ଧାନରୁ ଜଣାପଡିଛି । ବିସିଜି ପରି ଏକ ଟିକା, ଯଦି ପ୍ରଭାବଶାଳୀ ପ୍ରମାଣିତ ହୁଏ, ତେବେ ଅଲଜାଇମର ରୋଗ ପରି ଏକ ଭୟଙ୍କର ରୋଗକୁ ପ୍ରତିହତ କରିବାରେ ଏକ ସଞ୍ଜିବନୀ ହୋଇପାରିବ ବୋଲି ବିଶେଷଜ୍ଞମାନେ ମତପୋଷଣ କରିଛନ୍ତି । ଆଲଜାଇମର ରୋଗ ସମ୍ବନ୍ଧୀୟ କ୍ଲିନିକାଲ ପରୀକ୍ଷଣରେ ବୟସ୍କଙ୍କୁ ଟୀକାକରଣ କରାଯାଇଛି । ଯଦି କୌଣସି ଲକ୍ଷଣ ଜଣାପଡ଼େ ତେବେ ରୋଗ ପ୍ରତିରୋଧକ ଶକ୍ତି ବଢାଇବାରେ ବିସିଜି ଟିକା ସହାୟକ ହେବ ବୋଲି କୁହାଯାଇଛି ।
ତେବେ କହିରଖୁଛୁ ଯେ, ପୂର୍ବରୁ ବିସିଜି ଟିକା ନେଇ ଅନ୍ୟ ଏକ ଖବର ରିପୋର୍ଟ ମଧ୍ୟ ପ୍ରକାଶିତ ହୋଇଥିଲା । ଟ୍ୟୁବରକଲୋସିସ୍(ଟିବି) ରୋଗ ପାଇଁ ଉଦ୍ଦିଷ୍ଟ ବିସିଜି(ବ୍ୟାସିଲସ୍ କାଲମେଟ୍ ଗୁଏରିନ୍) ଟିକା ମହାମାରୀ କୋଭିଡ୍-୧୯ ସଂକ୍ରମଣର ବ୍ୟାପକତାକୁ କମାଇଦିଏ ବୋଲି ଆମେରିକୀୟ ଅନୁଧ୍ୟାନରୁ ଜଣାପଡିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
