ହାଇଦ୍ରାବାଦ: ସୌରମଣ୍ଡଳର ଏକମାତ୍ର ତଥା ସର୍ବାଧିକ ଉତପ୍ତ ନକ୍ଷତ୍ର ସୂର୍ଯ୍ୟ ସମ୍ପର୍କରେ ଅନୁଧ୍ୟାନ କରିବା ପାଇଁ ଭାରତ ଆରମ୍ଭ କରିଥିଲା ପ୍ରଥମ ସୌର ମିଶନ। ଗତ ସେପ୍ଟେମ୍ବର 2 ତାରିଖ ପୂର୍ବାହ୍ନ ୧୧ଟା ୫୦ ମିନିଟ ସମୟରେ ଇସ୍ରୋର ସୌର ଅଭିଯାନ ଆଦିତ୍ୟ L୧ ଆନ୍ଧ୍ରପ୍ରଦେଶ ଶ୍ରୀହରିକୋଟାର ସତୀଶ ଧାୱନ ସ୍ପେସ୍ ସେଣ୍ଟରରୁ ସଫଳ ଉତକ୍ଷେପଣ ହୋଇଥିଲା । ଏହା ପରଠାରୁ ସଫଳତା ଦିଗରେ ବଢି ଚାଲିଛି। ଲାଗରେଞ୍ଜ ପଏଣ୍ଟ (ଏଲ-1) ଅଭିମୁଖେ ଅଗ୍ରସର ହୋଇଥିବା ଆଦିତ୍ୟ ଏଲ 1 କେବେ ଏବଂ କେଉଁ ସମୟରେ ଲକ୍ଷ୍ୟସ୍ଥଳରେ ପହଞ୍ଚିବ ସେନେଇ ଏକ ବଡ ସୂଚନା ଦେଇଛନ୍ତି ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋ) ଅଧ୍ୟକ୍ଷ ଏସ ସୋମନାଥ।
ଆସନ୍ତା ଜାନୁଆରୀ 6 ତାରିଖରେ ପ୍ରାୟ ଅପରାହ୍ନ 4 ସମୟରେ ଲାଗରେଞ୍ଜ ପଏଣ୍ଟରେ ପହଞ୍ଚିବା ନେଇ ସୂଚନା ଦେଇଛନ୍ତି ସୋମନାଥ। ଇଣ୍ଡିଆନ ଇନଷ୍ଟିଚ୍ୟୁଟ ଅଫ ଟେକ୍ନୋଲୋଜି(IIT) ବମ୍ବେର ବାର୍ଷିକ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ସମ୍ମିଳନୀ ଟେକଫେଷ୍ଟକୁ ସମ୍ବୋଧିତ କରିବା ସମୟରେ ଏଭଳି କହିଛନ୍ତି ଇସ୍ରୋ ଅଧ୍ୟକ୍ଷ । ଆଦିତ୍ୟ ଏଲ 1ର ଇଞ୍ଜିନକୁ ନିୟନ୍ତ୍ରିତ ଭାବେ ଅପରେଟ କରିବୁ, ଯାହା ଫଳରେ ଏହା ହେଲୋ ଅର୍ବିଟ ନାମକ କକ୍ଷରେ ପ୍ରବେଶ କରିପାରିବ ବୋଲି ସେ କହିଛନ୍ତି । L1 କକ୍ଷପଥରୁ ସୂର୍ଯ୍ୟର ବାହ୍ୟସ୍ତର (କରୋନା) ଓ କ୍ରୋମୋସ୍ଫିୟର ଉପରେ ଅଧ୍ୟୟନ କରି ନୂଆ ତଥ୍ୟ ସାମ୍ନାକୁ ଆଣିବ ବୋଲି ଆଶା ରଖାଯାଇଛି।
ଲାଗରେଞ୍ଜ ପଏଣ୍ଟ କଣ : ଲାଗରେଞ୍ଜ ପଏଣ୍ଟ ହେଉଛି ଏଭଳି ଏକ କ୍ଷେତ୍ର ଯେଉଁଠାରେ ପୃଥିବୀ ଏବଂ ସୂର୍ଯ୍ୟ ମଧ୍ୟରେ ମାଧ୍ୟାକର୍ଷଣ ଶକ୍ତି ନିଷ୍କ୍ରିୟ ହୋଇଯାଇଥାଏ। ତେବେ ଏନେଇ ଇସ୍ରୋ ଅଧ୍ୟକ୍ଷ କହିଛନ୍ତି ଯେ, "ଏହି ମାଧ୍ୟାକର୍ଷଣକୁ ସମ୍ପୂର୍ଣ୍ଣ ନିରପେକ୍ଷ କରିବା ସମ୍ଭବ ନୁହେଁ । କାରଣ ଚନ୍ଦ୍ର, ମଙ୍ଗଳ ଏବଂ ଶୁକ୍ର ମଧ୍ୟ ରହିଛନ୍ତି। ତେବେ ସମସ୍ତ 6ଟି ପେଲୋଡର ପରୀକ୍ଷଣ କରାଯାଇଛି ଏବଂ ସେମାନେ ଠିକ ଭାବେ କାର୍ଯ୍ୟ କରୁଛନ୍ତି। ସେମାନେ ମଧ୍ୟ ସଠିକ ତଥ୍ୟ ପ୍ରଦାନ କରୁଛନ୍ତି। "
ଏହା ମଧ୍ୟ ପଢନ୍ତୁ: ଉପଲବ୍ଧିର ବର୍ଷ ୨୦୨୩: ଭାରତର ପ୍ରଥମ ସୌର ମିଶନ ଆଦିତ୍ୟ-ଏଲ ୧ ପ୍ରେରଣରେ ଇସ୍ରୋର ଅସୀମ ସଫଳତା
ପ୍ରକାଶଥାଉକି, ଏହା ପୂର୍ବରୁ ମଧ୍ୟ ଆଦିତ୍ୟ ଏଲ 1 ନେଇ ଅପଡେଟ ପ୍ରଦାନ କରିଥିଲେ ବିଜ୍ଞାନ ପ୍ରଯୁକ୍ତିବିଦ୍ୟା ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂ। ଭାରତର ପ୍ରଥମ ସୌର ମିଶନ ଆଦିତ୍ୟ ଏଲ 1 ଆସନ୍ତା ମାସର ପ୍ରଥମ ସପ୍ତାହରେ ଅର୍ଥାତ 2024 ଜାନୁଆରୀ ମାସରେ ପ୍ରଥମ ସପ୍ତାହରେ ଲାଗରେଞ୍ଜ ପଏଣ୍ଟରେ ପହଞ୍ଚିବା ନେଇ କହିଥିଲେ କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂ ।
ଚନ୍ଦ୍ରଯାନ-3 ବିଷୟରେ କହିଲେ ଏମିତି: ତେବେ ଭାରତର ମୁନ ମିଶନ ଚନ୍ଦ୍ରଯାନ ନେଇ ସୋମନାଥ କହିଛନ୍ତି, " ତଥ୍ୟ ସଂଗ୍ରହ କରିବାର 14 ଦିନ ପରେ ପ୍ରଜ୍ଞାନ ରୋଭର ସବୁ ଦିନ ପାଇଁ ସ୍ଲିପ ମୋଡକୁ ଚାଲି ଯାଇଥିଲା। ଆମେ ଭାବୁଥିଲୁ ଏହା ପୁନଃ ଆକ୍ଟିଭ ହେବ କିନ୍ତୁ ତାହା ସମ୍ଭବ ହେଲା ନାହିଁ।"
ବ୍ୟୁରୋ ରିପୋର୍ଟ, ଇଟିଭି ଭାରତ
