ଢେଙ୍କାନାଳ: ଜଘନ୍ୟ ହତ୍ୟାକାଣ୍ଡ । ଶାଶୁଘର ଲୋକେ ଯୌତୁକ ପାଇଁ ନବବଧୂକୁ ମାରି ଜଙ୍ଗଲରେ ଫୋପାଡି ଦେଇଥିବା ଅଭିଯୋଗ ହୋଇଛି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଢେଙ୍କାନାଳ ରାସୋଳ ଥାନା ଅନ୍ତର୍ଗତ କଲୋନୀ ସାହିରେ । ମୃତକ ମହିଳା ଜଣକ ହେଲେ ଆରତୀ ସାହୁ । ଘଟଣାରେ ସ୍ବାମୀ ସୁଜିତ ସାହୁ, ଶ୍ବଶୁର ନିରଞ୍ଜନ ସାହୁ ଓ ଶାଶୁ କୁମୁଦିନୀ ସାହୁଙ୍କୁ ଗିରଫ କରିବା ସହ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ ।
ଗତକାଲି (ମଙ୍ଗଳବାର) ଠାରୁ ନବବଧୂ ନିଖୋଜ ଥିବାରୁ ମହିଳାଙ୍କ ବାପା ଘର ଲୋକେ ରାସୋଳ ଥାନାରେ ଅଭିଯୋଗ କରିଥିଲେ । ଯାହାକୁ ନେଇ ଘଟଣାର ଛାନଭିନ ଆରମ୍ଭ କରିଥିଲା ପୋଲିସ । ଆଉ ଏନେଇ ମହିଳାଙ୍କ ସ୍ବାମୀଙ୍କୁ ପୋଲିସ ଅଟକ ରଖି ପଚରା ଉଚରା କରିବାବେଳେ ହତ୍ୟାକାଣ୍ଡର ଗୁମର ଖୋଲିଥିଲେ ଅଭିଯୁକ୍ତ ସ୍ବାମୀ ।
ପ୍ରଥମେ ହତ୍ୟା କରିବା ପରେ ସ୍କୁଟି ଯୋଗେ ନିଜେ ସ୍ବାମୀ ସୁଜିତ ସାହୁ ଓ ଶାଶୁ କୁମୁଦିନୀ ସାହୁ ନିକଟସ୍ଥ ଦଣ୍ଡିରି ଗାଁ ପାଖରେ ଥିବା ଘଞ୍ଚ ଜଙ୍ଗଲରେ ମୃତଦେହକୁ ଫିଙ୍ଗି ଫେରାର ହୋଇଯାଇଥିଲେ । ଏହା ପରେ ଆଜି (ବୁଧବାର) ଏକ ଜରି ବସ୍ତାରୁ ମୃତଦେହକୁ ଉଦ୍ଧାର କରିଛି ପୋଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
