ହାଉତି ଠିକଣାରେ ଆମେରିକା ଷ୍ଟ୍ରାଇକ୍ ଜାରି, ୟେମେନରେ ୨୮ ଟାର୍ଗେଟରେ ମିସାଇଲ ମାଡ଼

US strikes another Houthi controlled site: ହାଉତି ଆଡ୍ଡାରେ ଆମେରିକାର ଷ୍ଟ୍ରାଇକ୍ ଜାରି। ଲଗାତର ଦ୍ବିତୀୟ ଦିନ ପାଇଁ ୟେମେନରେ ହାଉତି ଠିକଣାକୁ ଟାର୍ଗେଟ କରି ଆକାଶପଥରୁ ଆକ୍ରମଣ କରିଛି ୟୁଏସ ସେନା। ଅଧିକ ପଢ଼ନ୍ତୁ,

ନ୍ୟୁୟର୍କ: ଆତଙ୍କୀ ସଂଗଠନ ହାଉତି ବିରୋଧରେ ଆମେରିକାର ଆକ୍ସନ ଜାରି । ଦ୍ବିତୀୟ ଦିନ ପାଇଁ ହାଉତି ଆଡ୍ଡା ଉପରେ ଆକ୍ରମଣ କରିଛି ଆମେରିକା ସେନା । ୟେମେନରେ ହାଉତି ଠିକଣା ଉପରେ ଷ୍ଟ୍ରାଇକ୍ କରିଛି ଆମେରିକା ବାୟୁସେନା । ୟୁଏସ ସେଣ୍ଟ୍ରାଲ କମାଣ୍ଡ ପକ୍ଷରୁ ଏହି ସୂଚନା ଦିଆଯାଇଛି । ହାଉତିର ଏକାଧିକ ଆଡ୍ଡାକୁ ଟାର୍ଗେଟ କରାଯାଇଛି । ଗତକାଲି ଆମେରିକା ଏବଂ ବ୍ରିଟେନ ବାୟୁସେନା ପକ୍ଷରୁ ହାଉତି ଠିକଣା ଉପରେ ଆକାଶମାର୍ଗରୁ ଆକ୍ରମଣ କରାଯାଇଥିଲା ।

ଆଜି ଆମେରିକା ବାୟୁସେନା ପକ୍ଷରୁ ୟେମେନରେ ହାଉତିର ଆଉ ଏକ ଆଡ୍ଡା ଉପରେ ବୋମାମାଡ଼ କରିଛି । ଆମେରିକା ପକ୍ଷରୁ ଏହି ସୂଚନା ଦିଆଯାଇଛି । ୟେମେନ ରାଜଧାନୀ ସାନାରେ ରହୁଥିବା ଆସୋସିଏଟେଡ୍ ପ୍ରେସ ସାମ୍ବାଦିକଙ୍କ ସୂଚନା ଅନୁସାରେ, ଭୟଙ୍କର ଭାବେ ଶବ୍ଦ ଶୁଭିଥିଲା । ଗତକାଲି ଆମେରିକା ଏବଂ ବ୍ରିଟେନର ମିଳିତ ବାହିନୀ ୨୮ଟି ଟାର୍ଗେଟ ଉପରେ ୬୦ରୁ ଅଧିକ ମିସାଇଲ ମାଡ଼ କରିଥିଲେ । ଏଥିରେ ରାଡାର ସାଇଟ ଏବଂ ସମୁଦ୍ରକୂଳ ଟ୍ରାଫିକକୁ ଟାଗେଟ କରାଯାଇଥିଲା । ଶୁକ୍ରବାରଠାରୁ ହାଉତି ଆଡ୍ଡା ଉପରେ ଆକ୍ରମଣ ଆରମ୍ଭ କରିଛି ଆମେରିକା । ଆକ୍ରମଣ ପୂର୍ବରୁ ହାଉତି ଆତଙ୍କୀମାନେ ଲୋହିତ ସାଗରରୁ ଅପସରି ଯିବା ପାଇଁ ଚେତବନୀ ଦିଆଯାଇଥିଲା । ଆମେରିକା ରାଷ୍ଟ୍ରପତି ଜୋ ବାଇଡେନ୍, ଗତକାଲି ହାଉତି ଉପରେ ଆକ୍ରମଣ ପାଇଁ ଚେତାବନୀ ଦେଇଥିଲେ ।

ଲୋହିତ ସାଗରରେ ହାଉତିର ଡ୍ରୋନ ଆକ୍ରମଣର କଡ଼ା ଜବାବ ଦେଇଛି ଆମେରିକା । ଗତକାଲି ଆମେରିକା ଏବଂ ବ୍ରିଟେନ ବାୟୁସେନା ପକ୍ଷରୁ ୟେମେନରେ ହାଉତି ବିଦ୍ରୋହୀଙ୍କ ଏକାଧିକ ଠିକଣା ଉପରେ ରକେଟ ଏବଂ ମିସାଇଲ ମାଡ଼ କରାଯାଇଥିଲା । ଗତ ଦୁଇ ମାସ ଧରି ହାଉତି ଆତଙ୍କୀମାନେ ଲୋହିତ ସାଗରରେ ଅସ୍ଥିରତା ସୃଷ୍ଟି କରି ଚାଲିଛନ୍ତି । ହାଉତି ଆତଙ୍କୀମାନେ ବାଣିଜ୍ୟିକ ଜାହାଜଗୁଡ଼ିକୁ ଟାର୍ଗେଟ କରି ଡ୍ରୋନ୍ ମାଡ଼ କରି ଆସୁଥିଲେ । ଗତ ନଭେମ୍ବରଠାରୁ ବର୍ତ୍ତମାନ ପର୍ଯ୍ୟନ୍ତ ଲୋହିତ ସାଗରରେ ୨୭ରୁ ଅଧିକ ଥର ଡ୍ରୋନ ଆକ୍ରମଣ ହୋଇଛି । ଆମେରିକାର ଜବାବୀ କାର୍ଯ୍ୟାନୁଷ୍ଠାନରେ ୧୦ରୁ ଅଧିକ ହାଉତି ଆତଙ୍କୀ ନିପାତ ହୋଇଛନ୍ତି ।