ଇସଲାମବାଦ : ପୂର୍ବତନ ପାକସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ପୁଣି ଝଟକା । ପାକିସ୍ତାନ ନିର୍ବାଚନ ଆୟୋଗ ପାକିସ୍ତାନ ତହରିକ ଏ ଇନସାଫ (ପିଟିଆଇ) ଦଳ ଠାରୁ ଦଳୀୟ ଚିହ୍ନ କ୍ରିକେଟ ବ୍ୟାଟ୍ ପ୍ରତ୍ୟାହାର କରିନେଇଛି । ଯାହା ଏହି ପାର୍ଟିର ସଂସ୍ଥାପକ ଇମ୍ରାନ ଖାନଙ୍କ ପୂର୍ବ କ୍ରିକେଟ ଜୀବନକୁ ଦର୍ଶାଉଥିଲା । ପାକ୍ ମୁଖ୍ୟ ନିର୍ବାଚନ ଆୟୁକ୍ତ ସିକନ୍ଦର ସୁଲତାନ ରାଜାଙ୍କ ଅଧ୍ୟକ୍ଷତାରେ ପାଞ୍ଚ ଜଣିଆ ଇସିପି ପୀଠ ଏହି ନିଷ୍ପତ୍ତି ପ୍ରକାଶ କରିଥିଲେ । ଏହି ପୀଠ ପିଟିଆଇ ପାର୍ଟି ମଧ୍ୟରେ ହୋଇଥିବା ନିର୍ବାଚନକୁ ବେଆଇନ ଏବଂ ଅବୈଧ ବୋଲି ଘୋଷଣା କରିଥିଲେ ।
ପାକିସ୍ତାନ ତହରିକ ଏ ଇନସାଫର ପୂର୍ବ ସଦସ୍ୟ ଅକବର ଏସ ବାବରଙ୍କ ଯାଚିକା ଉପରେ ୧୧ ପୃଷ୍ଠା ବିଶିଷ୍ଟ ଏହି ଆଦେଶ ଦିଆଯାଇଛି । ଏହି ଯାଚିକାରେ ପିଟିଆଇ ନିୟମ ଅନୁସାରେ ନିର୍ବାଚନ କରାଇନାହିଁ । ଏହି ଘଟଣା ପୂର୍ବରୁ ଦେଶରେ କ୍ଷମତାରେ ଥିବା ପାର୍ଟି ପାଇଁ ଏକ ଶକ୍ତ ଝଟକା । କାରଣ ଆସନ୍ତା ବର୍ଷ ଫେବୃଆରୀ ୮ ତାରିଖରେ ପାକିସ୍ତାନରେ ସାଧାରଣ ନିର୍ବାଚନ ହେବ ।
ଏହା ମଧ୍ୟ ପଢନ୍ତୁ... ବିଲାଓ୍ୱଲ ଭୁଟ୍ଟୋ ପିପିପି ପ୍ରଧାନମନ୍ତ୍ରୀ ପ୍ରାର୍ଥୀ, ଆସନ୍ତା ଫେବୃଆରୀ 8ରେ ପାକିସ୍ତାନରେ ସାଧାରଣ ନିର୍ବାଚନ
ସୂଚନାଯୋଗ୍ୟ ଯେ, ସଫଳ କ୍ରିକେଟ ଷ୍ଟାରରୁ ପାକିସ୍ତାନର ରାଜନୀତିରେ ଇମ୍ରାନ ଖାନ ପ୍ରବେଶ କରିଥିଲେ । ସେ ଅଗଷ୍ଟ ୨୦୧୮ରୁ ଏପ୍ରିଲ ୨୦୨୨ ଯାଏଁ ପାକିସ୍ତାନର ପ୍ରଧାନମନ୍ତ୍ରୀ ଦାୟିତ୍ବ ତୁଲାଇଥିଲେ । ପିଟିଆଇ ପାର୍ଟିର ପ୍ରତିଷ୍ଠାତା ଇମ୍ରାନ ଖାନ ବହୁତ ଦିନ ଧରି ଭ୍ରଷ୍ଟାଚାର ମାମଲାରେ ରାୱଲପିଣ୍ଡିର ଆଦିୱାଲା ଜେଲରେ ଅଛନ୍ତି ଏବଂ ତାଙ୍କର ମୁକ୍ତି ଏତେ ସହଜରେ ହେବାର କୌଣସି ଆଶା ଦେଖାଯାଇନାହିଁ । ସେହିପରି ତାଙ୍କର ଘନିଷ୍ଠ ସହଯୋଗୀ ଶାହ ମହମଦ କ୍ୟୁରେସୀଙ୍କୁ ଗିରଫ କରାଯାଇ ସମାନ ଜେଲରେ ରଖାଯାଇଛି ।
ପାକିସ୍ତାନର ନିର୍ବାଚନ କମିଶନ ନିଜ ଆଦେଶରେ କହିଛନ୍ତି ଯେ, ପିଟିଆଇ ଆମର ନିର୍ଦ୍ଦେଶ ପାଳନ କରିନାହିଁ । ପ୍ରଚଳିତ ସମ୍ବିଧାନ ୨୦୧୯, ନିର୍ବାଚନ ଅଧିନିୟମ ୨୦୧୭ ଓ ନିର୍ବାଚନ ନିୟମ ୨୦୧୭ ଅନୁସାରେ ପାର୍ଟି ମଧ୍ୟରେ ନିର୍ବାଚନ କରେଇବାରେ ବିଫଳ ହୋଇଛି । ଏଥି ସହିତ ଇମ୍ରାନ ଖାନଙ୍କ ବଦଳରେ ପାର୍ଟିର ଅଧ୍ୟକ୍ଷ ହୋଇଥିବା ବାରିଷ୍ଟର ଗୋହର ଅଲୀ ଖାନ ନିଜ ପଦରୁ ଇସ୍ତଫା ଦେଇଛନ୍ତି ।
ବ୍ୟୁରୋ ରିପୋର୍ଟ , ଇଟିଭି ଭାରତ
