ବ୍ୟୁନେସ୍ ଆରିଜ: ଆର୍ଜେଣ୍ଟିନାର ନୂତନ ରାଷ୍ଟ୍ରପତି ଭାବେ ଶପଥ ଗ୍ରହଣ କଲେ ଜାଭିୟର ମିଲେଇ । ରବିବାର ଦିନ ବ୍ୟୁନେସ ଆରିଜରେ ଅବସ୍ଥିତ କଂଗ୍ରେସ(ସଂସଦ)ଠାରେ ପୂର୍ବତନ ରାଷ୍ଟ୍ରପତି ଆଲବର୍ଟ ଫର୍ଣ୍ଣାଣ୍ଡିଜ୍ ଅଧ୍ୟକ୍ଷତାରେ ଏହି ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିବା ହୋଇଥିଲା । ତେବେ ମିଲାଇ ଜଣେ ଅର୍ଥନୈତିଜ୍ଞ ଓ ରାଜନୈତିଜ୍ଞ ଅଟନ୍ତି । ଯିଏ ନିଜର ନିର୍ବାଚନୀ ପ୍ରଚାର ବେଳେ ଅର୍ଥ ବ୍ୟବସ୍ଥାରେ ବ୍ୟାପକ ପରିବର୍ତ୍ତନ ଆଣିବେ ବୋଲି ପ୍ରତିଶ୍ରୁତି ଦେଇଥିଲେ । ଅନ୍ୟପଟେ ଆର୍ଜେଣ୍ଟିନା ଆର୍ଥିକ ସଙ୍କଟ ମଧ୍ୟ ଗତି କରୁଥିବା ବେଳେ ଏହାର ମୁକାବିଲା ମିଲେଇଙ୍କ ପାଇଁ ବେଶ ଚ୍ୟାଲେଞ୍ଜଭରା ରହିବ ।
ନୂତନ ଯୁଗର ଆରମ୍ଭ: ଆର୍ଜେଣ୍ଟିନାର ସଂସଦ(କଂଗ୍ରେସ)ରେ ରାଷ୍ଟ୍ରପତି ଭାବେ ବିଧିବଦ୍ଧ ଭାବେ ଦାୟିତ୍ବ ଗ୍ରହଣ କରିବା ପରେ ଦେଶବାସୀଙ୍କୁ ସମ୍ବୋଧନ କରିଛନ୍ତି ମିଲେଇ । ତେବେ ଏହି ଅବସରରେ ସେ କହିଛନ୍ତି, "ଆଜି ଆର୍ଜେଣ୍ଟିନା ପାଇଁ ଏକ ନୂତନ ଯୁଗର ଆରମ୍ଭ । ଆଜିଠୁ ଅବନତି ଓ ହ୍ରାସକୁ ନେଇ ଦୁଃଖ ଭରା ଇତିହାସର ଅନ୍ତ ହେବାକୁ ଯାଉଛି । ଆମେ ପୁନଃନିର୍ମାଣ ରାସ୍ତାରେ ଆସୁଛେ । ଆର୍ଜେଣ୍ଟିନା ନାଗରିକ ପରିବର୍ତ୍ତନ ପାଇଁ ଭୋଟ ଦେଇଛନ୍ତି ଓ ଆଉ ଆମେ ଏବେ ଏଥିରୁ ପଛକୁ ହଟିବା ନାହିଁ ।"
ମିଲେଇ ଶପଥ ଗ୍ରହଣ ସମାୋହରେ ୟୁକ୍ରେନ୍ ରାଷ୍ଟ୍ରପତି ଭ୍ଲାଦିମିର ଜେଲେନସ୍କି, ବ୍ରାଜିଲ ପୂର୍ବତନ ରାଷ୍ଟ୍ରପତି ଜେର ବୋଲସୋନାରୋ ଓ ଇସ୍ରାଏଲ ବୈଦେଶିକ ମନ୍ତ୍ରୀ ଏଲି କୋହେନ ସାମିଲ ହୋଇଥିଲେ ।
ସୂଚନା ଅନୁଯାୟୀ, ମିଲେଇ ଆର୍ଜେଣ୍ଟିନା ଅର୍ଥ ବ୍ୟବସ୍ଥାକୁ ନେଇ ଆଇଏମଏଫ (international monetary fund) ସହ ଆଲୋଚନା ଆରମ୍ଭ କରିଦେଇଛନ୍ତି । ଏଥିସହ ମିଲାଇ ଓ୍ବାଶିଂଟନରେ ଆମେରିକୀୟ ଅଧିକାରୀଙ୍କ ସହ ସାକ୍ଷାତ ମଧ୍ୟ କରିଛନ୍ତି ।
ତେବେ ବର୍ତ୍ତମାନ ସ୍ଥିତିରେ ଆର୍ଜେଣ୍ଟିନା ମୁଦ୍ରାସ୍ଫୀତି ବୃଦ୍ଧି, ଆର୍ଥିକ ସଙ୍କଟ ଓ ଦାରିଦ୍ର୍ୟତା ମଧ୍ୟରେ ଗତି କରୁଥିବା ବେଳେ ଏହାର ମୁକାବିଲା ପାଇଁ ନବନିର୍ବାଚିତ ରାଷ୍ଟ୍ରପତି ଜାଭିଅରଙ୍କ ଉପରେ ଆସ୍ଥା ପ୍ରକଟ କରିଛନ୍ତି ସାଧାରଣ ନାଗରିକ । ଦେଶରେ ଚାଲିଥିବା ଏହି ସଙ୍କଟକୁ ମୁକାବିଲା କରିବା ପାଇଁ 53 ବର୍ଷୀୟ ଜାଭିଅରଙ୍କ ପାଇଁ ବଡ ଚାଲେଞ୍ଜ ଅଟେ । ଆର୍ଜେଣ୍ଟିନା ରାଷ୍ଟ୍ରପତି ନିର୍ବାଚନରେ ଜାଭିୟର୍ ମିଲି ଓ ସର୍ଜିଓ ମାସା ମଧ୍ୟରେ କଡା ମୁକାବିଲା ଦେଖିବାକୁ ମିଳିଥିଲା । ମିଲେଇଙ୍କ ସପକ୍ଷରେ ପାଖାପାଖି 56 ପ୍ରତିଶତ ଭୋଟ ଆସିଥିବା ବେଳେ ତାଙ୍କ ନିକଟତମ ପ୍ରତିଦ୍ବନ୍ଦୀ ସର୍ଜିଓ ମାସାଙ୍କୁ ମିଳିଥିଲା ପାଖାପାଖି 44 ପ୍ରତିଶତ ଭୋଟ ।
ତେବେ ନିର୍ବାଚନ ପୂର୍ବରୁ ମିଲେଇ ଆର୍ଜେଷ୍ଟିନାର ଆର୍ଥିକ ସ୍ଥିତିରେ ସୁଧାର ଆଣିବେ ବୋଲି ପ୍ରତିଶ୍ରୁତି ଦେଇଥିଲେ । ତାଙ୍କର ଯୋଜନାଗୁଡ଼ିକ ହେଉଛି କେନ୍ଦ୍ରୀୟ ବ୍ୟାଙ୍କ ବନ୍ଦ କରିବା, ଖର୍ଚ୍ଚ ହ୍ରାସ କରିବା, ଆର୍ଥନୈତିର ସୁଦୃଢ଼ତା ପାଇଁ କିଛି କଡା ସଂସ୍କାର ଆଣିବା ।
ତେବେ ଜାଭିଅର ମିଲେଇ 1970 ମସିହା ଅକ୍ଟୋବର 22ତାରିଖରେ ବୁଏନସ ଆରେସରେ ଜନ୍ମ ଗ୍ରହଣ କରିଥିଲେ । ସେ ଏକାଧାରରେ ଜଣେ ଅର୍ଥନୈତିଜ୍ଞ, ଲେଖକ ଓ ରାଜନେତା ଅଟନ୍ତି । ତାଙ୍କର ବିଶେଷକରି ଯୁବ ସମର୍ଥକ ଅଧିକ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
