କାନବେରା: ଅଷ୍ଟ୍ରେଲିଆରେ ଦ୍ରୁତ ବେଗରେ କୋହଳ ହେବାରେ ଲାଗିଛି କୋରୋନା କଟକଣା । ଇତି ମଧ୍ୟରେ ଦେଶରେ ଏକାଧିକ ନୂଆ ଆକ୍ରାନ୍ତ ଚିହ୍ନଟ ହେବା ସତ୍ତ୍ବେ ସରକାର ନିଜ ପଦକ୍ଷେପ ଉପରେ ବିଶ୍ବାସ ଜାହିର କରିଛନ୍ତି । ସାମାନ୍ୟ ସଚେତନତା ଦ୍ବାରା କୋରୋନା ସଂକ୍ରମଣ ସ୍ଥିତିକୁ ଏଡାଇ ଦିଆଯାଇପାରିବ ବୋଲି ରାଜ୍ୟ ସରକାରମାନେ ଆଶା ରଖିଛନ୍ତି । ସେପଟେ ଖୁବଶୀଘ୍ର ଦେଶରେ କ୍ରୀଡାଭିତ୍ତିକ କାର୍ଯ୍ୟକ୍ରମ ଆୟୋଜନ ହେବା ନେଇ ଜଣା ପଡିଛି ।
ଦେଶରେ କଟକଣା କୋହଳ ହେବା ସହ ସିନେମା ହଲ, ପବ୍, ରେସ୍ତୋରାଁ, ଜିମ୍ ଖୋଲିଛି । ଏଥିସହ ବିଭିନ୍ନ ପର୍ବପର୍ବାଣୀ ପାଳନ ଆରମ୍ଭ ହୋଇଛି । ଦେଶରେ ଖୁବଶୀଘ୍ର କ୍ରୀଡା ପ୍ରତିଯୋଗିତା ଆୟୋଜନ ନେଇ ମଧ୍ୟ ସୂଚନା ରହିଛି । ଏଥିପାଇଁ ଜଣଙ୍କ ପ୍ରତି 4 ବର୍ଗ ମିଟର ସ୍ଥାନ ହିସାବରେ ଗୋଟିଏ ଷ୍ଟାଡିୟମର କ୍ଷମତାକୁ 40,000ରୁ 10,000କୁ ହ୍ରାସ କରାଯାଇଛି । ସେପଟେ ଜୁଲାଇ 1ରୁ ନ୍ୟୁ ସାଉଥ ୱେଲ୍ସରେ ସମସ୍ତ ବ୍ୟବସାୟ ସ୍ବାଭାବିକ ସ୍ଥିତିକୁ ଫେରିବା ନେଇ ଜଣା ପଡିଛି ।
ପବ୍ରେ କ୍ଷମତାକୁ 20ରୁ 50କୁ ବୃଦ୍ଧି କରାଯାଇଥିବା ମଧ୍ୟ ଜଣା ପଡିଛି । ଏସବୁ ଭିତରେ କୌଣସି ବ୍ୟକ୍ତି ଯଦି ଥଣ୍ଡା କାସ ପରି ଅସୁବିଧା ଭୋଗନ୍ତି ତେବେ ତୁରନ୍ତ ନିକଟସ୍ଥ ଡାକ୍ତରଖାନାରେ ସମ୍ପର୍କ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି । ଦୀର୍ଘ ଦୁଇ ମାସରୁ ଉର୍ଦ୍ଧ୍ବ ସମୟ ଧରି ଦେଶରେ ଲକଡାଉନ ପରିସ୍ଥିତି ପାଇଁ ଲୋକେ ଅନେକ ଅସୁବିଧା ଭୋଗିବା ସହ ଅର୍ଥନୀତି ମଧ୍ୟ ନଇଁ ପଡିଥିଲା । ତେଣୁ ଦେଶକୁ ଟ୍ରାକକୁ ଫେରାଇବା ପାଇଁ ଏପରି ନିୟାମକର ଆବଶ୍ୟକତା ରହିଥିବା ସରକାର ପ୍ରକାଶ କରିଛନ୍ତି ।
ବର୍ତ୍ତମାନ ଦେଶର ପଶ୍ଚିମାଞ୍ଚଳ ଓ କ୍ବିନ୍ସଲ୍ୟାଣ୍ଡରେ କୌଣସି ନୂଆ ଆକ୍ରାନ୍ତ ଚିହ୍ନଟ ହୋଇନଥିବା ସୂଚନା ରହିଛି । ତେଣେ ସାଉଥ ୱେଲ୍ସରେ ଲାଗୁ ରହିଥିବା ଯାତାୟତଜନିତ କଟକଣା ଜୁଲାଇ 20ଯାଏଁ ବଳବତ୍ତର ରହିବା ନେଇ ସ୍ପଷ୍ଟ ହୋଇଛି । ସୂଚନା ମୁତାବକ ଦେଶରେ ମୋଟ ଆକ୍ରାନ୍ତ ସଂଖ୍ୟା 7333 ରହିଥିବା ବେଳେ ମୃତ୍ୟୁ ସଂଖ୍ୟା 102ରେ ସ୍ଥିର ରହିଛି ।
@IANS
