ମାଦ୍ରିଦ: ସ୍ପେନରେ କୋରୋନା ସ୍ଥିତିରେ ସମ୍ପୂର୍ଣ୍ଣ ସୁଧାର ନଆସିଥିଲେ ବି ଏହା ଅତି ଭୟଙ୍କର ସ୍ଥିତିରେ ରହିନାହିଁ । ଆସନ୍ତା ଜୁନ 21ରେ ଦେଶରେ ଲାଗୁ ରହିଥିବା ଲକଡାଉନ ଅବଧି ଶେଷ ହେବାକୁ ବସିଥିବା ବେଳେ ନିୟମ କୋହଳ ପ୍ରକ୍ରିୟା ଆରମ୍ଭ ହେବାକୁ ଯାଉଛି । ଏମିତିରେ ନିୟମରେ କ’ଣ ସବୁ ପରିବର୍ତ୍ତନ ହେବ ଓ ଏନେଇ ଆଭିମୁଖ୍ୟ କିପରି ରହିବ ତାହା ଉପରେ ପ୍ରସ୍ତୁତ ଯୋଜନାରେ ମୋହର ମାରିଛନ୍ତି ପ୍ରଧାନମନ୍ତ୍ରୀ ପେଡ୍ରୋ ସାନସେଜ୍ ।
ଏହି ନିୟମ ମଧ୍ୟରେ ଫେସ ମାସ୍କର ବ୍ୟବହାରକୁ ବାଧ୍ୟତାମୂଳକ କରାଯାଇଛି । ନୂଆ ନିୟମ ଅନୁଯାୟୀ କୌଣସି ଜନସାଧାରଣ ଅଞ୍ଚଳରେ ଯଦି କୌଣସି ନାଗରିକ ବିନା ଫେସ ମାସ୍କରେ ଧରା ପଡନ୍ତି, ତେବେ ତାଙ୍କୁ 100 ୟୁରୋ ବା 113 ଡଲାରର ଫାଇନ ଭରିବାକୁ ହେବ । ସମାନ ଭାବେ କର୍ମକ୍ଷେତ୍ରମାନଙ୍କରେ କର୍ମଚାରୀଙ୍କୁ ସ୍ବଚ୍ଛତା ଦିଗ ପ୍ରତି ବିଶେଷ ଧ୍ୟାନ ଦେବାକୁ ହେବ । ଏଥିସହ କର୍ମକ୍ଷେତ୍ରରେ କର୍ମଚାରୀମାନେ କିପରି ସୁରକ୍ଷିତ ସାମାଜିକ ଦୂରତ୍ବ ବଜାୟ ରଖିପାରିବେ ସେ ଦିଗରେ ଦୃଷ୍ଟି ଦେବାକୁ ପଡିବ ।
ଅଧିକ ଜନଗହଳିପୂର୍ଣ୍ଣ ଅଞ୍ଚଳକୁ ନଯିବାକୁ ଲୋକଙ୍କୁ ପରାମର୍ଶ ଦିଆଯାଇଛି । ଏଥିସହ ଅତି ଜରୁରୀ ପରିସ୍ଥିତି ନହେବା ଯାଏଁ ଲୋକଙ୍କୁ ଘରୁ ବାହାରିବାକୁ ମଧ୍ୟ ମନା କରାଯାଇଛି । ଏତତ୍ବ୍ୟତୀୟ ଖାଦ୍ୟ ବଜାର ଓ ଅତ୍ୟାବଶ୍ୟକୀୟ ସାମଗ୍ରୀ ବଜାରର ସଠିକ୍ ପରିଚାଳନା ଉପରେ ମଧ୍ୟ ନୂଆ ନିୟମରେ ଗୁରୁତ୍ବାରୋପ କରାଯାଇଛି । ସେପଟେ ଅନ୍ତଃରାଜ୍ୟ ଯାତାୟତ ଓ ବିମାନସେବାରୁ ଅନୁମତି ଦେଇଛନ୍ତି ପେଡ୍ରୋ ।
@IANS
