ମାଦ୍ରିଦ: 98 ଦିନର ବିରତି ପରେ ସ୍ବାଭାବିକ ସ୍ଥିତିକୁ ଫେରୁଛି ସ୍ପେନ । ହେଲେ ଲକଡାଉନ ଅବଧି ଶେଷ ସତ୍ତ୍ବେ ଦେଶରେ ସତର୍କ ଘଣ୍ଟି ଜାରି ରହିଛି । ଦେଶବାସୀ ଏହି ସମୟର ଲାଭ ଉଠାଇ ବେଖାତିର ନହୋଇ ଅଧିକ ସଚେତନ ହେବା ପାଇଁ ସ୍ବାସ୍ଥ୍ୟ ମନ୍ତ୍ରଣାଳୟ ସୂଚନା ଦେଇଛି । ବର୍ତ୍ତମାନ ଦେଶରେ କୋରୋନାର ଦ୍ବିତୀୟ ଲହରୀ ଆରମ୍ଭ ହେବାର ଯଥେଷ୍ଟ ସମ୍ଭାବନା ରହିଛି । ତେଣୁ ଲୋକଙ୍କ ଅଧିକ ସତର୍କ ରହିବାକୁ ହେବ ବୋଲି ସରକାରୀ ନିର୍ଦ୍ଦେଶ ରହିଛି ।
ପ୍ରାୟ ତିନି ମାସ ଲକଡାଉନର କଡା କଟକଣାରେ ରହିବା ପରେ ଏବେ ସ୍ପେନରେ ଏବେ ଯାତାୟତ ସ୍ବାଭାବିକ ହେବା ସହ ବ୍ୟାବସାୟିକ ଅନୁଷ୍ଠାନ ଆଦି ଖୋଲିବା ଆରମ୍ଭ ହୋଇଛି । ଲକଡାଉନ ଅବଧି ଶେଷ ହେବା ସହ ଦେଶର ସମସ୍ତ ବସ ଓ ରେଳ ଷ୍ଟେସନରେ ଲୋକଙ୍କ ମାତ୍ରାଧିକ ଭିଡ ପରିଲକ୍ଷିତ ହେଉଛି । ଯାହା ଆଗକୁ ଯାଇ ଦେଶରେ ସଂକ୍ରମଣର ଦ୍ବିତୀୟ ଲହରୀ ଆରମ୍ଭ କରିବା ନେଇ ଆଶଙ୍କା ପ୍ରକାଶ ପାଇଛି । ସେପଟେ ଦେଶରେ ପର୍ଯ୍ୟଟନ ବିଭାଗ ମଧ୍ୟ ନିଜ ବ୍ୟବସାୟ ସୋମବାରଠାରୁ ଆରମ୍ଭ କରିଛି । ଏହା ଦେଶର ଜିଡିପିରେ 12 ପ୍ରତିଶତରୁ ଅଧିକ ଯୋଗଦାନ ଦେବାରେ ସହାୟକ ।
ସୋମବାରଠାରୁ ଦେଶର ସୀମା କଟକଣା ମଧ୍ୟ ଶେଷ ହୋଇଛି । ଏଥିସହ ସେନଗେନ ରାଷ୍ଟ୍ରମାନଙ୍କ ପାଇଁ ମଧ୍ୟ କଟକଣା କୋହଳ କରାଯାଇଥିବା ଜଣା ପଡିଛି । ଏଥିରୁ କେବଳ ପର୍ତ୍ତୁଗାଲକୁ ଜୁଲାଇ 1ଯାଏଁ ବାଦ ଦିଆଯାଇଛି । ଦେଶରେ ଉଭୟ ଘରୋଇ ଓ ଅନ୍ତର୍ଜାତୀୟ ବିମାନ ସେବା ମଧ୍ୟ ସ୍ବାଭାବିକ ହୋଇଥିବା ଦେଖାଯାଇଛି । ଛୁଟି ସମୟରେ ବିଶ୍ବରେ ଦ୍ବିତୀୟ ବୃହତ୍ତମ ପର୍ଯ୍ୟଟନର ସ୍ଥାନ ହେଉଛି ସ୍ପେନ । ତେଣୁ ଅର୍ଥନୀତିକୁ ସୁଧାରିବା ପାଇଁ ଦେଶର ପର୍ଯ୍ୟଟନ ବିଭାଗ ଚେଷ୍ଟା ଆରମ୍ଭ କରିଛି ।
ସୂଚନା ଅନୁଯାୟୀ ଦେଶରେ ମୋଟ୍ 2,46,272 ଜଣ ଆକ୍ରାନ୍ତ ରହିଥିବା ବେଳେ ମୃତ୍ୟୁ ସଂଖ୍ୟା 28,323 ରେ ସ୍ଥିର ରହିଛି ।
@IANS
