ମାଦ୍ରିଦ: ଦୀର୍ଘ 98 ଦିନ ଧରି ସ୍ପେନରେ ଲାଗୁ ରହିଥିବା ଦେଶବ୍ୟାପୀ ଲକଡାଉନ ତଥା ଆପାତକାଳୀନ ସ୍ଥିତିରେ ଲାଗିବାକୁ ଯାଉଛି ବିରାମ । ଶନିବାର ମଧ୍ୟରାତ୍ରରେ ଏହି ନିୟମର ଅବଧି ଶେଷ ହୋଇଛି । ଏହି ସମୟ ମଧ୍ୟରେ ଅନେକ ଥର ନିୟମରେ ପରିବର୍ତ୍ତନ ହୋଇଛି ସତ ହେଲେ ଇତିହାସରେ ଏହା ସବୁଠାରୁ ଦୀର୍ଘତମ ଲକଡାଉନ ରହିଥିବା ଜଣାପଡିଛି ।
କିଛି ସପ୍ତାହ ତଳେ ଦେଶରେ ଲକଡାଉନ କୋହଳ ପ୍ରକ୍ରିୟା ଆରମ୍ଭ ହୋଇଥିଲା । ଏହି ସମୟ ମଧ୍ୟରେ ସ୍ପେନର ଗଳିକନ୍ଦି ଧିରେ ଧିରେ ସ୍ବାଭାବିକ ହେବା ଆରମ୍ଭ କରିଥିଲା । ଦେଶର ତମାମ ଦୋକାନ, ବଜାର, ଉଦ୍ୟୋଗ ଓ ବ୍ୟାବସାୟିକ ଅନୁଷ୍ଠାନ ଆଦି ଧିରେ ଧିରେ ଖୋଲିବାରେ ଲାଗିଥିଲା । ରାସ୍ତାଘାଟରେ ମଧ୍ୟ ଲୋକେ ଚଳପ୍ରଚଳ କରୁଥିଲେ ।
ସୂଚନା ମୁତାବକ ମାର୍ଚ୍ଚ 14ରୁ ସ୍ପେନରେ ଆପାତକାଳୀନ ସ୍ଥିତି ଲାଗୁ କରିଥିଲେ ପ୍ରଧାନମନ୍ତ୍ରୀ ପେଡ୍ରୋ ସାନଚେଜ । ସ୍ପେନର ଇତିହାସରେ ଏହା ଦ୍ବିତୀୟ ଥର ପାଇଁ ହୋଇଥିଲା କି ଏପରି ଏକ ବଡ ପଦକ୍ଷେପ ନିଆଯାଇଥିଲା । ଏହା ପୂର୍ବରୁ 2010 ମସିହାରେ ଦେଶରେ ଏୟାର ଟ୍ରାଫିକ ନିୟନ୍ତ୍ରଣ କରିବା ପାଇଁ ସମାନ ପଦକ୍ଷେପ ନିଆଯାଇଥିଲା । କିନ୍ତୁ ଏହା ମାତ୍ର 15 ଦିନ ପାଇଁ ଲାଗୁ କରାଯାଇଥିଲା । ସେପଟେ କୋରୋନା ପାଇଁ ପ୍ରଥାମିକ ସ୍ତରରେ ମାତ୍ର 15 ଦିନ ପାଇଁ ଲକଡାଉନ ଲାଗୁ କରାଯାଇଥିଲା । ହେଲେ ଧିରେ ଧିରେ ପରିସ୍ଥିତିକୁ ନଜରରେ ରଖି ଏହାର ଅବଧି ବୃଦ୍ଧି କରାଯାଇଥିଲା ।
ଦେଶରେ ବର୍ତ୍ତମାନ ଲକଡାଉନ ଅବଧି ଶେଷ ହୋଇଛି ସତ ହେଲେ କିଛି ନିୟମ ଯେପରିକି ମାସ୍କର ବ୍ୟବହାର ଓ ସାମାଜିକ ଦୂରତା ଆଦି ଆଗକୁ ବି ବାଧ୍ୟତାମୂଳକ ରହିବ । ଦେଶରେ ଏଯାବତ୍ ଆକ୍ରାନ୍ତ ସଂଖ୍ୟା 2,45,575 ରହିଥିବାବେଳେ ମୃତ୍ୟୁ ସଂଖ୍ୟା 28,315ରେ ସ୍ଥିର ରହିଛି ।
@IANS
