ବ୍ରାଟିସଲାଭା: 7 ମାସ ବିତିଲାଣି, କିନ୍ତୁ କୋରୋନା ମହାମାରୀ ଥମିବାର ନାଁ ନେଉନାହିଁ । ଏହି କଥାକୁ ଅନେକ ଦେଶ ଗମ୍ଭୀରତାର ସହ ଚିନ୍ତା କରୁଛନ୍ତି ଏବଂ ଏହି ଦିଗରେ ଯଥା ସମ୍ଭବ ପଦକ୍ଷେପ ନେଉଛନ୍ତି । ୟୁରୋପରେ ଏମିତି ଏକ ଦେଶ ଯିଏ କୋରୋନାର ଦ୍ଵିତୀୟ ଲହରୀରୁ ନିଜର ନାଗରିକଙ୍କ ସୁରକ୍ଷା ପାଇଁ ଏକ ବଡ ପଦକ୍ଷେପ ନେବାକୁ ନିଷ୍ପତ୍ତି ନେଇଛି । ୟୁରୋପୀୟ ଦେଶ ସ୍ଲୋଭାକିଆ ଶନିବାର ଘୋଷଣା କରିଛି ଯେ, ୧୦ ବର୍ଷ ଏବଂ ତଦୁର୍ଦ୍ଧ୍ଵ ଲୋକଙ୍କ କୋରୋନା ଟେଷ୍ଟ କରାଯିବ । ତେବେ ଏନେଇ ସ୍ଲୋଭାକିଆର ପ୍ରଧାନମନ୍ତ୍ରୀ ଇଗୋର ମାଟୋଭିକ୍ ଶନିବାର ଘୋଷଣା କରିଛନ୍ତି ।
ସମଗ୍ର ଦେଶରେ ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଏହି ନିର୍ଣ୍ଣୟ ନିଆଯାଇଛି ବୋଲି ସେ କହିଛନ୍ତି । କାରଣ ଅଧିକ ସଂଖ୍ୟକ ଟେଷ୍ଟ କଲେ ଭାଇରସକୁ ଚିହ୍ନଟ କରାଯାଇ ପାରିବ ଏବଂ ଏହାକୁ ରୋକିବାରେ ସହାୟକ ହେବ । ସେ ଏହା ମଧ୍ୟ କହିଛନ୍ତି, ଯଦି ବ୍ୟାପକ ପରିମାଣରେ ଟେଷ୍ଟ ନହୁଏ ତେବେ ସେ ନିଜ ପଦରୁ ଇସ୍ତଫା ଦେବେ। ମାଗଣାରେ ସମସ୍ତଙ୍କର ପରୀକ୍ଷଣ କରାଯିବ ଏବଂ ଏହା ଆଗାମୀ ସପ୍ତାହରୁ ଆରମ୍ଭ ହୋଇ ଶେଷ ସପ୍ତାହ ପର୍ଯ୍ୟନ୍ତ ଜାରି ରହିବ ।
ଏହି ଅଭିଯାନରେ ଦେଶର ପ୍ରାୟ ୫.୪ ମିଲିୟନ ଅର୍ଥାତ ୫୪ ଲକ୍ଷ ନିବାସୀଙ୍କ କୋରୋନା ଟେଷ୍ଟ କରାଯିବ ।
