ବାର୍ସିଲୋନା: ବଢୁଥିବା କୋରୋନା ସଂକ୍ରମଣ ସଂଖ୍ୟାକୁ ନଜରରେ ରଖେ ସ୍ପେନର କାଟାଲୋନିଆ ପ୍ରାନ୍ତରେ ପୁଣି ଜାରି ହୋଇଛି ଲକଡାଉନ କଟକଣା । ଏହି ପ୍ରାନ୍ତରେ ପ୍ରାୟ 2,10,000 ଲୋକେ ରହୁଥିବା ବେଳେ ସ୍ଥାନୀୟ ସଂକ୍ରମଣକୁ ରୋକିବାକୁ ହେଲେ ପୁଣି ଲକଡାଉନ ଲାଗୁ କରିବାକୁ ହେବ ବୋଲି ରାଷ୍ଟ୍ରପତି କ୍ବିମ ଟୋରା ସୂଚନା ଦେଇଛନ୍ତି । କ୍ବିମ ଏହା ମଧ୍ୟ କହିଛନ୍ତି କି ବାର୍ସିଲୋନାର ପଶ୍ଚିମରେ ଥିବା ସେଗ୍ରିଆରେ ସଂକ୍ରମଣର ଅଧିକ ଆଶଙ୍କା ରହିଥିବାରୁ ଏଠାରେ କଟକଣାକୁ କଡାକଡି କରାଯାଇଛି ।
ଶନିବାର ଅପରାହ୍ନରୁ ଲାଗୁ ହୋଇଥିବା କଟକଣା ଅନୁଯାୟୀ ସେଗ୍ରିଆ ଓ ଲେଇଡାଠାରେ ବସବାସ କରୁଥିବା ନାଗରିକ ବିନା କାରଣରେ ଅନ୍ୟ ସହର ବା ଅଞ୍ଚଳକୁ ଯିବାଆସିବା ଉପରେ ପ୍ରତିବନ୍ଧକ ଲଗାଯାଇଛି । ସେପଟେ କାର୍ଯ୍ୟ ଉଦ୍ଦେଶ୍ୟରେ ଅନ୍ୟ ଅଞ୍ଚଳରୁ ଏଠାକୁ ଆସିଥିବା ନାଗରିକମାନେ ସହର ଛାଡିପାରିବା ପାଇଁ ଅନୁମତି ରହିଛି । ଏଥିସହ ସହରରେ ଯାତାୟତ ଉପରେ ରୋକ ଲଗାଇବା ପାଇଁ ଏକାଧିକ ପୋଲିସ ଟେକପଏଣ୍ଟର ବ୍ୟବସ୍ଥା କରାଯାଇଛି ।
ଏହି ସମସ୍ତ ଅଞ୍ଚଳରେ ସର୍ବାଧିକ 10 ଜଣ ଲୋକେ ଏକାଠି ହୋଇପାରିବା ନେଇ ଅନୁମତି ରହିଛି । ସେପଟେ ଲେଇଡାରେ ଅର୍ଣ୍ଣଉ ଡେ ଭିଲାନୋଭାରେ ଥିବା ଏକ ଡାକ୍ତରଖାନା ବାହାରେ 105 ଶଯ୍ୟ ବିଶିଷ୍ଟ ଅସ୍ଥାୟୀ ଚିକିତ୍ସା କେନ୍ଦ୍ରର ବ୍ୟବସ୍ଥା କରାଯାଇଥିବା ଜଣା ପଡିଛି । ସ୍ପେନ ସ୍ବାସ୍ଥ୍ୟମନ୍ତ୍ରୀଙ୍କ ସୂଚନା ମୁତାବକ ଦେଶରେ କୋରୋନା ଦ୍ବାରା ଦ୍ବିତୀୟ ସର୍ବାଧିତ କ୍ଷତିଗ୍ରସ୍ତ ପ୍ରାନ୍ତ ହେଉଛି କାଟାଲୋନିଆ । ତେଣୁ ଏହି ଅଞ୍ଚଳର ବାସିନ୍ଦାଙ୍କ ସୁରକ୍ଷା ପାଇଁ କଟକଣା ପୁଣି ଲାଗୁ କରାଯିବା ଏକମାତ୍ର ଉପାୟ ପାଲଟିଛି ।
ସ୍ପେନରେ ବର୍ତ୍ତମାନ ସୁଦ୍ଧା 2,50,545 ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ 28,385 ଜଣଙ୍କର ମୃତ୍ୟୁ ହୋଇସାରିଛି ।
@IANS
