ଟୋକିୟୋ: ମହାମାରୀ ପାଇଁ ସାରା ବିଶ୍ବରେ ନାହିଁ ନଥିବା ଅସୁବିଧାର ପରିସ୍ଥିତି ସୃଷ୍ଟି ହୋଇଛି । ଏମିତିରେ ପର୍ଯ୍ୟଟନ କ୍ଷେତ୍ରକୁ ମଧ୍ୟ ସହିବାକୁ ପଡିଛି ଅପୂରଣୀୟ କ୍ଷତି । ଅନେକ ରାଷ୍ଟ୍ରରେ ପର୍ଯ୍ୟଟନ କ୍ଷେତ୍ରରୁ ପ୍ରଚୁର ଆୟ ହେଉଥିବା ବେଳେ କୋରୋନା ମହାମାରୀ ପାଇଁ ଏହି ଆୟରେ ଲାଗିଥିଲା ଲଗାମ । ଏମିତିରେ ପ୍ରଭାବିତ ରାଷ୍ଟ୍ର ମଧ୍ୟରୁ ଗୋଟିଏ ହେଉଛି ଜାପାନ । ନିଜ ପର୍ଯ୍ୟଟନ ପାଇଁ ଜାପାନ ପ୍ରସିଦ୍ଧି ଲାଭ କରିଛି ସତ, ହେଲେ ଏବେ ଆଣ୍ଠେଇ ପଡିଛି ଦେଶର ପର୍ଯ୍ୟଟନ ଶିଳ୍ପ ।
ଧିରେ ଧିରେ ସ୍ଥିତି ସହ ଖାପ ଖୁଆଇ ନୂଆ ସଚେତନତା ଓ ସୁରକ୍ଷା ପଦକ୍ଷେପ ଗ୍ରହଣ କରିବା ସହ ପର୍ଯ୍ୟଟନ ଶିଳ୍ପକୁ ସ୍ବାଭାବିକ କରିବା ପାଇଁ ଚେଷ୍ଟା ଆରମ୍ଭ କରିଛି ଜାପାନ । ଏନେଇ ଅନେକ କ୍ୟାମ୍ପେନ କାର୍ଯ୍ୟକ୍ରମର ମଧ୍ୟ ଯୋଜନା କରିଛନ୍ତି ସରକାର । ଯାହାକୁ ବିରୋଧ କରିଛନ୍ତି ଦେଶର କିଛି ବିଶେଷଜ୍ଞ । ନିକଟରେ ଦେଶରେ କୋରୋନାର ଦ୍ବିତୀୟ ଲହରୀ ଆରମ୍ଭ ହୋଇଥିବା ବେଳେ ଏପରି ସ୍ଥିତିରେ ପର୍ଯ୍ୟଟନ ବ୍ୟବସାୟ ପୁଣି ଆରମ୍ଭ କରିବାର ନିଷ୍ପତ୍ତି ସରକାରଙ୍କୁ ମହଙ୍ଗା ପଡିପାରେ ବୋଲି ବିଶେଷଜ୍ଞମାନେ ଚେତାବନୀ ଦେଇଛନ୍ତି । ସେପଟେ ସ୍ବାସ୍ଥ୍ୟ ବିଶେଷଜ୍ଞଙ୍କ କହିବା ଅନୁଯାୟୀ ଦେଶରେ ଆରମ୍ଭ ହୋଇଥିବା ଦ୍ବିତୀୟ ଲହରୀ ଦୀର୍ଘସ୍ଥାୟୀ । ଏପରି ସ୍ଥିତିରେ ପର୍ଯ୍ୟଟନ ସ୍ବାଭାବିକ ହେଲେ ପରିଣାମ ଭୟଙ୍କର ହୋଇପାରେ ବୋଲି ସେମାନେ ମତ ଦେଇଛନ୍ତି ।
ସୂଚନା ମୁତାବକ ଜାପାନର ପର୍ଯ୍ୟଟନ ପାଇଁ ବର୍ଷତମାମ ଦେଶ ବିଦେଶରୁ ଅତିଥି ଏଠାକୁ ଟାଣି ହୋଇ ଆସନ୍ତି । ଗତବର୍ଷ ଦେଶରେ ଯେତିକି ପର୍ଯ୍ୟଟକ ଆସିଥିଲେ ଚଳିତବର୍ଷ ଫେବୃଆରୀ ମାସରେ ଏହା 58.3 ପ୍ରତିଶତ ହ୍ରାସ ପାଇଥିବା ବେଳେ ମାର୍ଚ୍ଚ ମାସରେ ଏହା 93 ପ୍ରତିଶତ ହ୍ରାସ ପାଇଥିଲା । ତେଣେ ଦେଶରେ ଦ୍ବିତୀୟ କୋରୋନା ଲହରୀ ଆରମ୍ଭ ହେବା ସହ ଶନିବାର ଟୋକିୟୋରେ କେବଳ 290 ନୂଆ ମାମଲା ସହ ଦେଶବ୍ୟାପୀ 662ଟି ନୂଆ ମାମଲା ଚିହ୍ନଟ ହୋଇଥିଲା । ଯଦି ଏପରି ପରିସ୍ଥିତି ଜାରି ରୁହେ ତେବେ ସରକାରଙ୍କୁ ନିଜ ପର୍ଯ୍ୟଟନ କ୍ୟାମ୍ପେନ କାର୍ଯ୍ୟକ୍ରମକୁ ସ୍ଥଗିତ ରଖିବାକୁ ହେବ ବୋଲି ବିଶେଷଜ୍ଞମାନେ ମତ ଦେଇଛନ୍ତି ।
@IANS
