କାବୁଲ: ଆଫଗାନିସ୍ତାନର କୁଣ୍ଡୁଜ ଏବଂ ବାଦଖଶାନ ପ୍ରଦେଶରେ ତାଲିବାନ ଆତଙ୍କବାଦୀମାନେ ଆକ୍ରମଣ କରିଛନ୍ତି । ଏହି ଆକ୍ରମଣରେ 12 ଜଣ ପୋଲିସକର୍ମୀ ଏବଂ 4 ଜଣ ଆଫଗାନ ନାଗରିକ ପ୍ରାଣ ହରାଇଥିବା ଜଣାପଡିଛି । ଏହି ଘଟଣାରେ 11 ଜଣ ତାଲିବାନ ଆତଙ୍କବାଦୀ ମଧ୍ୟ ନିହତ ହୋଇଥିବା ସୋମବାର ଆଫଗାନ କର୍ତ୍ତୃପକ୍ଷ ସୂଚନା ଦେଇଛନ୍ତି ।
ସୂଚନା ମୁତାବକ, ତାଲିବାନ ଆତଙ୍କବାଦୀ ରବିବାର ରାତିରେ କୁଣ୍ଡୁଜ ପ୍ରଦେଶର ଇମାମ ସାହିବ ଜିଲ୍ଲାରେ ଆକ୍ରମଣ କରିଥିଲେ । ଏହି ଘଟଣାରେ 5 ଜଣ ପୋଲିସକର୍ମୀ ଏବଂ 4 ଜଣ ସାଧାରଣ ନାଗରିକ ପ୍ରାଣ ହରାଇଥିଲେ। ଆକ୍ରମଣରେ ଅନ୍ୟ 8 ଜଣ ଗୁରୁତର ଭାବରେ ଆହତ ହୋଇଥିଲେ । ସେମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତୀ କରାଯାଇଥିଲା । ତେବେ ସୋମବାର ସେମାନଙ୍କ ମଧ୍ୟରୁ 7 ଜଣ ପ୍ରାଣ ହରାଇଥିବା ପ୍ରଦେଶ ପରିଷଦର ଜଣେ ସଦସ୍ୟ ସୂଚନା ଦେଇଛନ୍ତି ।
ସୁରକ୍ଷାକର୍ମୀ ଏବଂ ଆତଙ୍କବାଦୀଙ୍କ ମଧ୍ୟରେ ଏହି ସଂଘର୍ଷ ସୋମବାର ସକାଳ ପର୍ଯ୍ୟନ୍ତ ଚାଲିଥିଲା । ଆତଙ୍କବାଦୀଙ୍କ ଆକ୍ରମଣ ପରେ ଆଫଗାନର ସୁରକ୍ଷାକର୍ମୀ ସେମାନଙ୍କୁ ପାଲଟା ଜବାବ ଦେଇଥିଲେ । ସୁରକ୍ଷାକର୍ମୀଙ୍କ ପାଲଟା ଆକ୍ରମଣରେ 6 ଆତଙ୍କବାଦୀ ନିହତ ହୋଇଥିବା ବେଳେ ଅନେକ ଆହତ ହୋଇଥିଲେ । ଶେଷରେ ଏଥିରେ ଭୟଭୀତ ହୋଇ ଅନେକ ଆତଙ୍କବାଦୀ ଘଟଣାସ୍ଥଳରୁ ପଳାଇବାକୁ ଚେଷ୍ଟା କରିଥିଲେ ।
ଅନ୍ୟପକ୍ଷରେ ପଡୋଶୀ ବାଦଖଶାନର ପ୍ରଦେଶର ଆର୍ଗାନଜଖୱା ଜିଲ୍ଲା ଚେକପୋଷ୍ଟ ନିକଟରେ ତାଲିବାନ ଆତଙ୍କବାଦୀ ଆକ୍ରମଣ କରିଥିଲେ । ଏଥିରେ 7 ଜଣ ପୋଲିସକର୍ମୀ ଏବଂ 5 ଜଣ ତାଲିବାନ ଆତଙ୍କବାଦୀ ନିହତ ହୋଇଥିଲେ । ଘଟଣାରେ 2 ଜଣ ପୋଲିସକର୍ମୀ ମଧ୍ୟ ଆହତ ହୋଇଥିବା ସୂଚନା ରହିଛି ।
