ଲାହୋର: ପାକିସ୍ତାନରେ କୋରୋନା ସହ ମୁକାବିଲା ପାଇଁ ଲାହୋର ସମେତ ପଞ୍ଜାବ ପ୍ରାନ୍ତର କେତେକ ଅଞ୍ଚଳରେ ଲାଗୁ ହୋଇଛି ସ୍ମାର୍ଟ ଲକଡାଉନ । ଏଠାରେ ପ୍ରାୟ 100 ମିଲିୟନରୁ ଅଧିକ ଲୋକେ ବସବାସ କରୁଥିବା ବେଳେ ସେମାନଙ୍କ ସୁରକ୍ଷା ପାଇଁ ଭିନ୍ନ ପଦକ୍ଷେପ ନେବାର ଆବଶ୍ୟକତା ରହିଛି । ଏଥିପାଇଁ ବୁଧବାରଠାରୁ ଏହି ଅଞ୍ଚଳରେ ଲାଗୁ କରାଯାଇଛି ସ୍ମାର୍ଟ ଲକଡାଉନ ।
ଗୁରୁବାର ଏହି ପ୍ରାନ୍ତରେ ପ୍ରାୟ 60 ନୂଆ ମାମଲା ଚିହ୍ନଟ ହୋଇଥିବା ବେଳେ ପାକିସ୍ତାନର ମୋଟ 1,60,116 ଆକ୍ରାନ୍ତଙ୍କ ମଧ୍ୟରୁ କେବଳ ପଞ୍ଜାବ ପ୍ରାନ୍ତରେ 60,138ଟି ପଜିଟିଭ ମାମଲା ସାମ୍ନାକୁ ଆସିଛି । ତେବେ ଏଠାରେ ଲାଗୁ ହୋଇଥିବା ସ୍ମାର୍ଟ ଲକଡାଉନ ଆଧାରରେ ଅର୍ଥନୀତି ଉପରେ କମ ପ୍ରଭାବ ପକାଇ ଲୋକଙ୍କୁ ଏକ ବ୍ୟବସ୍ଥିତ ଢଙ୍ଗରେ ପରିଚାଳିତ କରିବା ପାଇଁ ଯୋଜନା ପ୍ରସ୍ତୁତ କରାଯାଇଛି ।
ଦେଶରେ ଯେକୌଣସି ସ୍ଥାନରେ ଯଦି 300ରୁ ଉର୍ଦ୍ଧ୍ବ ପଜିଟିଭ ମାମଲା ଚିହ୍ନଟ ହୁଏ ସେଠାରେ ଏହି ସ୍ମାର୍ଟ ଲକଡାଉନ ଲାଗୁ କରାଯିବା ନେଇ ନିଷ୍ପତ୍ତି ନିଆଯାଇଛି । ସ୍ମାର୍ଟ ଲକଡାଉନ ଲାଗୁ ଥିବା ଅଞ୍ଚଳରେ ପ୍ରବେଶ ଓ ପ୍ରସ୍ଥାନ ଗେଟ ଗୁଡିକରେ ଯାଞ୍ଚ କଡାକଡି କରାଯାଇଛି । ସେପଟେ ଆବଶ୍ୟକସ୍ଥଳେ ଗୋଟିଏ ପରିବାରରୁ କେବଳ ଜଣଙ୍କୁ ବାହାରକୁ ଯିବା ପାଇଁ ଅନୁମତି ଦିଆଯିବ ।
କେବଳ ସେତିକି ନୁହେଁ, ସମ୍ପୃକ୍ତ ଅଞ୍ଚଳରେ ମଲ୍, ଦୋକାନ, ବଜାର, ରେସ୍ତୋରାଁ ସମେତ ସରକାରୀ ଓ ଘରୋଇ କାର୍ଯ୍ୟାଳୟ ଆଦି ଆଗାମୀ ଦୁଇ ସପ୍ତାହ ଯାଏଁ ସମ୍ପୂର୍ଣ୍ଣ ବନ୍ଦ ରହିବ । ଏଥିସହ ଏଠାରେ କେବଳ ଔଷଧ ଦୋକାନ ଓ ଗ୍ରୋସେରୀ ଦୋକାନ ଖୋଲା ରହିବା ନେଇ ନିୟମ କଡାକଡି କରାଯାଇଛି । ଏଠାରେ ସମସ୍ତ ଯାତାୟତର ବ୍ୟବସ୍ଥା ବନ୍ଦ ରହିବା ନେଇ ମଧ୍ୟ ଜଣା ପଡିଛି ।
@IANS
