କରାଚି: ମେ’ 22ରେ ପାକିସ୍ତାନରେ ଦୁର୍ଘଟଣାଗ୍ରସ୍ତ ହୋଇଥିଲା ପାକିସ୍ତାନ ଅନ୍ତର୍ଜାତୀୟ ଏୟାରଲାଇନ୍ସର ଏକ ଯାତ୍ରୀବାହୀ ବିମାନ । କରାଚିରେ ହୋଇଥିବା ଏହି ଦୁର୍ଘଟଣାରେ ମାନବଗତ ତ୍ରୁଟି ବା ଅବହେଳା ଯୋଗୁଁ ହୋଇଥିବା ଏକ ରିପୋର୍ଟରେ ପ୍ରକାଶ ପାଇଛି । ଉଭୟ କକପିଟ୍ ଓ ଏୟାର କଣ୍ଟ୍ରୋଲ ଟାୱାର ମଧ୍ୟରେ ହୋଇଥିବା ତ୍ରୁଟି ଯୋଗୁଁ ଆଖି ପିଛୁଳାକେ ମୃତ୍ୟୁ ମୁହଁକୁ ଠେଲି ହୋଇଯାଇଥିଲେ 99 ମଧ୍ୟରୁ 97 ଯାତ୍ରୀ ।
ଏହି ଘଟଣା ପଛରେ ଦୀର୍ଘ ଦିନ ଧରି ଚାଲିଥିବା ତଦନ୍ତରୁ ସ୍ପଷ୍ଟ ହୋଇଛି କି ବିମାନରେ କୌଣସି ଯାନ୍ତ୍ରିକ ତ୍ରୁଟି ରହିନଥିଲା । ଏନେଇ ସୋମବାର ବିମାନ ଚଳାଚଳ ବିଭାଗକୁ ହସ୍ତାନ୍ତର ହୋଇଛି ପ୍ରାଥମିକ ତଦନ୍ତ ରିପୋର୍ଟ । ପିଆଇଏ PK8303 ବିମାନ 8 ଜଣ କ୍ରିୟୁ ସଦସ୍ୟଙ୍କ ସମେତ 99 ଜଣ ଯାତ୍ରୀଙ୍କୁ ନେଇ ପାକିସ୍ତାନ ଫେରୁଥିବା ବେଳେ କରାଚି ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା । ଏହି ସମୟରେ ଦ୍ବିତୀୟ ଥର ପାଇଁ ବିମାନ ଅବତରଣର ଚେଷ୍ଟା କରିଥିଲେ ପାଇଲଟ ।
ଏହି ବିମାନ ଜନଗହଳିପୂର୍ଣ୍ଣ ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଥିବାରୁ ସ୍ଥାନୀୟ ଅଞ୍ଚଳରେ ମଧ୍ୟ ଏହାର ପ୍ରଭାବରେ ବ୍ୟାପକ କ୍ଷୟକ୍ଷତି ହୋଇଥିବା ଦେଖାଯାଇଥିଲା । ଏହି ଘଟଣାର ଗୋଟିଏ ଦିନ ପରେ ବେସାମରିକ ବିମାନ ଚଳାଚଳ ବିଭାଗ ଏହାର ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ । ଜୁନ 22ରେ ଏହି ତଦନ୍ତର ପ୍ରାଥମିକ ରିପୋର୍ଟ ହସ୍ତଗତ ହୋଇଛି । ବିମାନର ବ୍ଲାକବକ୍ସକୁ ତଦନ୍ତ ପାଇଁ ଫ୍ରାନ୍ସ ପଠାଯାଇଥିବା ବେଳେ ରିପୋର୍ଟ ମୁତାବକ କକ୍ପିଟ୍ କ୍ରିୟୁ, କଣ୍ଟ୍ରୋଲ ଟାୱାର ଓ ଏୟାର ଟ୍ରାଫିକ କଣ୍ଟ୍ରୋଲରେ ବାରମ୍ବାର ତ୍ରୁଟି ପରିଲକ୍ଷିତ ହୋଇଥିଲା ।
ତେବେ ବ୍ଲାକବକ୍ସରୁ ମିଳିଥିବା ତଥ୍ୟ ଅନୁଯାୟୀ ଏଯାବତ୍ ବିମାନରେ ଯାନ୍ତ୍ରିକ ତ୍ରୁଟିର କୌଣସି ସୂଚନା ନାହିଁ । ସେପଟେ ନିର୍ଦ୍ଧାରିତ ବେଗ ଓ ପରିସରଠାରୁ ବିମାନ ଅଧିକ ବେଗରେ ପରିସର ବାହାରକୁ ଯାଇଥିବା ଦେଖାଯାଇଥିଲା । ବିମାନଟି ଏତେ ଅଧିକ ବେଗରେ ଥିବା ସତ୍ତ୍ବେ କଣ୍ଟ୍ରୋଲ ଟାୱାର ଏହାକୁ ପ୍ରଥମ ଥର ଅବତରଣ ପାଇଁ ଅନୁମତି ଦେଇଥିଲା । ପ୍ରତିବଦଳରେ କକ୍ପିଟ୍ କ୍ରିୟୁ ମଧ୍ୟ କଣ୍ଟ୍ରୋଲ ଟାୱାର ସବିଶେଷ ତଥ୍ୟ ଦେଇନଥିବା ଦେଖାଯାଇଥିଲା ।
ଅବତରଣରେ ଜାମ ଓ ଲ୍ୟାଣ୍ଡିଂ ଗିଅରରେ ଅସୁବିଧା ନେଇ ମଧ୍ୟ ପାଇଲଟ କଣ୍ଟ୍ରୋଲ ଟାୱାର ଅବଗତ କରାଇନଥିଲେ । ଯାହା ପାଇଲଟଙ୍କର ସବୁଠାରୁ ବଡ ଭୁଲ ନିଷ୍ପତ୍ତି ସାବ୍ୟସ୍ତ ହୋଇଥିଲା । ପ୍ରଥମ ଅବତରଣରେ ଅସୁବିଧା ହେବାରୁ ବିମାନଟି ଆକାଶରେ 17 ମିନିଟ ଯାଏଁ ଅପେକ୍ଷା କରିଥିଲା । ଏହି ସମୟରେ ବିମାନର ଦୁଇଟି ଇଞ୍ଜିନ ଫେନ ହୋଇଯାଇଥିଲା । ଫଳରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା ।
ଆଶ୍ଚର୍ଯ୍ୟକର କଥା କି ଦୁର୍ଘଟଣାର 12 ଘଣ୍ଟା ପରେ ବି ନିକଟସ୍ଥ ରନ ୱେରେ ଦୁର୍ଘଟଣାଗ୍ରସ୍ତ ବିମାନର ଇଞ୍ଜିନରୁ କିଛି ଅଂଶ ଇତସ୍ତତଃ ପଡିରହିଥିଲା । ଅଥଚ ବିମାନବନ୍ଦର କର୍ତ୍ତୃପକ୍ଷ ଏହାକୁ ସଫା କରିବା ବଦଳରେ ଅନ୍ୟ ବିମାନ ଗୁଡିକୁ ଅବତରଣ ଅନୁମତି ଦେଇଥିଲା । ତେବେ ଏହି ରିପୋର୍ଟ ପ୍ରଧାନମନ୍ତ୍ରୀ ଇମରାନ ଖାନଙ୍କୁ ପଠାଯାଇଥିବା ଜଣା ପଡିଛି ।
@IANS
