ଇସଲାମାବାଦ: ପାକିସ୍ତାନର ମୁଖ୍ୟ ବିଚାରପତି ଗୁଲଜାର ଅହମ୍ମଦ ଦେଶରେ ସମସ୍ତ ମଲ ଖୋଲିବା ପାଇଁ ସୋମବାର ନିର୍ଦ୍ଦେଶନାମା ଜାରି କରିଛନ୍ତି । ଦେଶରେ କୋରୋନା ସ୍ଥିତି ସେତେ ଭଲ ନଥିବା ସତ୍ତ୍ବେ ଏପରି ନିର୍ଦ୍ଦେଶ ଦିଆଯାଇଥିବା ଜଣାପଡିଛି । କୋରୋନା ସଂକ୍ରମଣ ସମୟରେ ନିଆଯାଇଥିବା ପଦକ୍ଷେପ ସମ୍ବନ୍ଧୀୟ ଏକ ମାମଲାର ଶୁଣାଣି କରିବା ସମୟରେ ସେ ମଲ ବନ୍ଦ ରଖିବା ପଛର କାରଣ ପଚାରିଥିଲେ ।
ଏହାକୁ ଯୁକ୍ତି ସଙ୍ଗତ ନୁହେଁ ବୋଲି ଦର୍ଶାଇ ପରେ ସେ ଦେଶର ସମସ୍ତ ମଲ ଖୋଲିବା ପାଇଁ ନିର୍ଦ୍ଦେଶ ଦେଇଛନ୍ତି । କେବଳ ସେତିକି ନୁହେଁ ଶନିବାର ଓ ରବିବାର ମଧ୍ୟ ଦେଶରେ ଦୋକାନ ବଜାର ଖୋଲିବା ପାଇଁ ସେ ନିର୍ଦ୍ଦେଶ ଦେଇଛନ୍ତି । ବର୍ତ୍ତମାନର ପରିସ୍ଥିତିକୁ ନଜରରେ ରଖି ସପ୍ତାହକୁ 4ଦିନ ଦୋକାନ ବଜାର ଖୋଲୁଥିବା ବେଳେ ଏହି ନିୟମକୁ ପରିବର୍ତ୍ତନ କରିଛନ୍ତି ମୁଖ୍ୟ ବିଚାରପତି ଗୁଲଜାର ।
ସେ କହିଛନ୍ତି କି ଯଦି ସପ୍ତାହରେ ଚାରି ଦିନ ଦୋକାନ ବଜାର ଖୋଲା ରୁହେ, ତେବେ ଶନିବାର, ରବିବାର ଦୋକାନ ବନ୍ଦ କରିବା ଦ୍ବାରା କ’ଣ ଦେଶରୁ କୋରୋନା ମହାମାରୀ ଚାଲିଯିବ ? ସେ ଏହା ମଧ୍ୟ ପଛର କାରଣ ମଧ୍ୟ ପଚାରିଥିଲେ । ଶୁଣାଣି ଆରମ୍ଭରେ କେବଳ ସିନ୍ଧ ପ୍ରାନ୍ତରେ ପ୍ରତ୍ୟେହ ଦୋକାନ ବଜାର ଖୋଲିବାର ଅନୁମତି ଦିଆଯାଇଥିବା ବେଳେ ପରେ ମୁଖ୍ୟ ବିଚାରପତି ଏହାକୁ ସାରା ଦେଶରେ ଲାଗୁ କରିବା ପାଇଁ ନିର୍ଦ୍ଦେଶ ଦେଇଥିଲେ । ଏନେଇ ଲିଖିତ ଆକାରରେ ନୋଟିସ ଜାରି କରାଯାଇଥିବା ମଧ୍ୟ ଜଣାପଡିଛି ।
ବର୍ତ୍ତମାନ ସୁଦ୍ଧା ପାକିସ୍ତାନରେ କୋରୋନା ସଂକ୍ରମଣରେ 41,363 ଜଣ ଆକ୍ରାନ୍ତ ହୋଇଥିବା ବେଳେ 896 ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି ।
@IANS
