ବେଜିଂ: ଚୀନରେ ଓପ୍ପୋର 5ଜି ସେବାକୁ ବର୍ଷେ ପୂରିଛି । ଇତି ମଧ୍ୟରେ ଚୀନରେ ଓପ୍ପୋ ଅନେକ ଗ୍ରାହକଙ୍କ ପ୍ରିୟପାତ୍ର ପାଲଟିଥିବା ବେଳେ ପୁଣି ଏକ ନୂଆ ଘୋଷଣା କରିଛି କମ୍ପାନୀ । ରବିବାର ଚୀନରେ 1ବର୍ଷ ପୂର୍ତ୍ତି ଅବସରରେ କମ୍ପାନୀ ନିଜ ଅଫିସିଆଲ ୱେବ ପେଜରେ ଇନଫୋଗ୍ରାଫିକ୍ସ ଜରିଆରେ ନିଜର ସ୍ମାର୍ଟ ଟିଭି ଲଞ୍ଚିଂ ନେଇ ସ୍ପଷ୍ଟ କରିଛି । ବର୍ତ୍ତମାନ ଟେକ୍ନୋଲୋଜି ବଜାରରେ ଓପ୍ପୋର ଚାହିଦା ବଢିଚାଲିଥିବା ବେଳେ ଏହି ନୂଆ ଆଡିସନ କମ୍ପାନୀକୁ ଅଧିକ ଲୋକପ୍ରିୟ କରିବ ବୋଲି କମ୍ପାନୀ ଆଶା ରଖିଛି ।
ବର୍ତ୍ତମାନ କମ୍ପାନୀ ସ୍ମାର୍ଟଟିଭି, ସ୍ମାର୍ଟଫୋନ ଓ ଓୟାରେବୁଲ ଡିଭାଇସ ବିକଶିତ କରି ଲଞ୍ଚି କରିବା ଯୋଜନା ରଖିଥିବା ବେଳେ ତାଲିକାରେ ଆଗକୁ ରହିଛି ଆଇଓଟି ପ୍ରଡକ୍ଟ । ଏହା ପୂର୍ବରୁ ଓପ୍ପୋ ଭାଇସ ପ୍ରେସିଡେଣ୍ଟ ଲିୟୁ ବୋ ଗଣମାଧ୍ୟମକୁ କହିଥିଲେ କି ଚାଇନିଜ ସ୍ମାର୍ଟଫୋନ ମେକର ଖୁବଶୀଘ୍ର ସ୍ମାର୍ଟ ଟିଭି ବଜାରରେ ଏଣ୍ଟ୍ରି କରିବାକୁ ଯାଉଛି । ଏହିକ୍ରମରେ ଚଳିତବର୍ଷ ଦ୍ବିତୀୟାର୍ଦ୍ଧରେ କମ୍ପାନୀ ନିଜର ପ୍ରଥମ ସ୍ମାର୍ଟ ଟିଭି ଲଞ୍ଚ କରିବାର ଯୋଜନା ରଖିଛି ।
ଏହି ସ୍ମାର୍ଟ ଟିଭିରେ ଆଣ୍ଡ୍ରଏଡ ସେବା ରହିବ । ଏଥିସହ ଏହି ଟିଭିରେ ୱାନ ପ୍ଲସ ଓ ସାମସଙ୍ଗ ଟିଭି ପରି ଅନ୍ୟ ସମସ୍ତ ସୁବିଧା ମଧ୍ୟ ରହିବ । ବର୍ତ୍ତମାନ ସମୟରେ ସ୍ମାର୍ଟଟିଭିର ଚାହିଦା ବଢିଚାଲିଥିବାରୁ ଅନେକ ବ୍ରାଣ୍ଡ ନିଜର ସ୍ମାର୍ଟ ଟିଭି ଆଣିବାକୁ ବ୍ୟଗ୍ର ରହିଛନ୍ତି । ଏମିତିରେ ପ୍ରତିଯୋଗିତାକୁ ଅଧିକ କଠିନ କରିବା ପାଇଁ ରେସରେ ସାମିଲ ହେବାକୁ ଯାଇଛି ଓପ୍ପୋ ।
@IANS
