ଟୋକିୟୋ: ଜାପାନରେ କୋରୋନା ସ୍ଥିତିରେ ସୁଧାର ଓ କୋରୋନା ଦ୍ବାରା ହୋଇଥିବା କ୍ଷଯକ୍ଷତିର ଭରଣା ପାଇଁ ଶୁକ୍ରବାର ସଂସଦରେ ପାରିତ ହୋଇଛି ଦ୍ବିତୀୟ ବଜେଟ । ଏହି ବଜେଟର ମୂଲ୍ୟ ବର୍ତ୍ତମାନ ସୁଦ୍ଧା କୌଣସି ରାଷ୍ଟ୍ରରେ ପାରିତ ହୋଇଥିବା ବଜେଟରେ ରେକର୍ଡ ସୃଷ୍ଟି କରିଛି । ଏହି ବଜେଟର ମୂଲ୍ୟ ରହିଛି 31.91 ଟ୍ରିଲିୟନ ୟେନ ବା 297 ବିଲିୟନ ଡଲାର । ଚଳିତ ଆର୍ଥିକ ବର୍ଷର ଏହା ହେଉଛି ଦ୍ବିତୀୟ ସହାୟକ ରାଶି ।
ଦେଶରେ କୋରୋନା ମାଡରେ ହୋଇଥିବା କ୍ଷତିର ଭରଣା ପାଇଁ ଏହି ବଜେଚରେ ଅତିରିକ୍ତ 117 ଟ୍ରିଲିୟନ ୟେନର ଅର୍ଥକୁ ମଞ୍ଜୁର କରାଯାଇଛି । ଏହାକୁ ଚଳିକ ଆର୍ଥିକ ବର୍ଷରେ କୋରୋନା ସ୍ଥିତି ସୁଧାର କ୍ଷେତ୍ରରେ ବିନିଯୋଗ କରିବା ପାଇଁ ଯୋଜନା ପ୍ରସ୍ତୁତ କରାଯାଇଛି । ଏହି ପ୍ୟାକେଜରେ ମୁଖ୍ୟତଃ କ୍ଷୁଦ୍ର ବ୍ୟବସାୟୀଙ୍କୁ ଫୋକସ କରାଯାଇଛି । ଏଥିସହ ପ୍ୟାକେଜରେ କୋରୋନା ଯୁଦ୍ଧରେ ଆଗଧାଡିରେ କାର୍ଯ୍ୟରତ ସ୍ବାସ୍ଥ୍ୟକର୍ମୀଙ୍କୁ ସାହାଯ୍ୟ ପାଇଁ ମଧ୍ୟ ଯୋଜନା ରହିଛି ।
ଯୋଜନା ମୁତାବକ କୋରୋନା ଦ୍ବାରା ପ୍ରଭାବିତ କ୍ଷୁଦ୍ର ବ୍ୟବସାୟୀମାନଙ୍କୁ ଏହି ବଜେଟ ଅଧିନରେ 6 ମିଲିୟନ ୟେନ ପର୍ଯ୍ୟନ୍ତର ସବସିଡି ଯୋଗାଇଦିଆଯିବ । ସେହିପରି ସ୍ବାସ୍ଥ୍ୟକର୍ମୀମାନଙ୍କୁ ଜଣକା 2 ଲକ୍ଷ ୟେନ ଲେଖାଏଁ ଯୋଗାଇ ଦିଆଯିବ । ସେହିପରି ଡାକ୍ତରଖାନା କର୍ମଚାରୀଙ୍କୁ ଜଣକା 1 ଲକ୍ଷ ୟେନ ଲେଖାଏଁ ଦିଆଯିବାର ଯୋଜନା ରହିଛି । ସେପଟେ ରିଜର୍ଭରେ 10 ଟ୍ରିଲିୟନ ୟେନକୁ ସ୍ଥଗିତ ରଖାଯିବ । ଯେଉଁଥିରୁ 5 ଟ୍ରିଲିୟନ ୟେନକୁ ଦେଶରେ ସ୍ବାସ୍ଥ୍ୟସେବା ଉନ୍ନତିକରଣରେ ବ୍ୟବହାର କରାଯିବ ।
ସୂଚନା ମୁତାବକ ଜାପାନରେ ଏଯାବତ୍ ମୋଟ 17,332 ଜଣ ଆକ୍ରାନ୍ତ ହୋଇଛନ୍ତି ଓ 922 ଜଣଙ୍କ ମୃତ୍ୟୁ ହୋଇସାରିଛି ।
@IANS
