ଇସଲାମାବାଦ: ପାକିସ୍ତାନରେ ଦେଖାଦେଇଥିବା ଉତ୍କଟ ଅର୍ଥନୈତିକ ସଙ୍କଟ ମଧ୍ୟରେ ଦେଶରେ ଅତ୍ୟାବଶ୍ୟକ ସାମଗ୍ରୀର ଦରଦାମ ମଧ୍ୟ ଅହେତୁକ ଭାବେ ବଢିବାରେ ଲାଗିଛି । ଯାହାକୁ ନେଇ ଦେଶବ୍ୟାପୀ ଇମ୍ରାନ ଖାନଙ୍କ ସରକାର ବିରୋଧରେ ସ୍ବର ଉଠିବାରେ ଲାଗିଥିବାବେଳେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି ପ୍ରଧାନମନ୍ତ୍ରୀ ଇମ୍ରାନ ଖାନ । ଇମ୍ରାନ ଏହି ଆର୍ଥିକ ସଙ୍କଟକୁ ସ୍ବୀକାର କରିବା ସହ ଏହାର କାରଣ ଅନ୍ତର୍ଜାତୀୟ ବଜାର ବୋଲି ଦର୍ଶାଇବାକୁ ଚେଷ୍ଟା କରିଛନ୍ତି ।
ଶନିବାର ସାଧାରଣ ଜନତା ଅନ-ଏୟାର ନାମକ ଏକ କାର୍ଯ୍ୟକ୍ରମରେ ଆକାଶଛୁଆଁ ମୁଦ୍ରାସ୍ଫୀତି ବିଷୟରେ ଏକ ପ୍ରଶ୍ନର ଉତ୍ତର ଦେଇ ଇମ୍ରାନ ଖାନ କହିଛନ୍ତି ଯେ ଏହା ହିଁ ଏକମାତ୍ର ସମସ୍ୟା ଯାହା ତାଙ୍କୁ ଚିନ୍ତିତ କରିଛି । ଆହୁରି ମଧ୍ୟ ଇମ୍ରାନ ଖାନ କହିଛନ୍ତି, ବର୍ତ୍ତମାନର ମୁଦ୍ରାସ୍ଫୀତି ଏକ ବିଶ୍ୱସ୍ତରୀୟ ପ୍ରସଙ୍ଗ । ଏହା କୌଣସି ଦେଶର ଅର୍ତିନୀତି ମଧ୍ୟରେ ସୀମିତ ରହିନାହିଁ । କୋଭିଡ କାରଣରୁ ଏକାଧିକ ଦେଶ ଯୋଗାଣ ଅଭାବ ସମସ୍ୟାର ସମ୍ମୁଖୀନ ହେଉଛନ୍ତି । ତାହା ମଧ୍ୟ ଏକ କାରଣ ଭାବେ ଦର୍ଶାଇବାକୁ ଚେଷ୍ଟା କରିଛନ୍ତି ଇମ୍ରାନ ।
ମହାମାରୀ ସମୟରେ ଆମେରିକା 6,000 ବିଲିୟନ ଡଲାର ଖର୍ଚ୍ଚ କରିଥିବା ଦର୍ଶାଇ ଇମ୍ରାନ କହିଛନ୍ତି ଯେ ପାକିସ୍ତାନ ମଧ୍ୟ 8 ବିଲିୟନ ଡଲାର ଖର୍ଚ୍ଚ କରିଛି । ସେ ଆହୁରି ମଧ୍ୟ କହିଛନ୍ତି ଯେ ଉଭୟ ଦେଶର ସ୍ଥିତି ତୁଳନା କରିବାକୁ ହେବ । ବର୍ତ୍ତମାନ ବ୍ରିଟେନ ସମେତ କିଛି ୟୁରୋପୀୟ ଦେଶ ରେକର୍ଡ ମୁଦ୍ରାସ୍ଫୀତିର ସମ୍ମୁଖୀନ ହୋଇଛନ୍ତି । ମୁଦ୍ରାସ୍ଫୀତି ପାକିସ୍ତାନୀମାନଙ୍କୁ ବହୁତ ପ୍ରଭାବିତ କରିଛି ବୋଲି ସ୍ୱୀକାର କରିବା ସହ ଏହି କାରଣରୁ ଦରମାପ୍ରାପ୍ତ ଶ୍ରେଣୀ ଅଧିକ ପ୍ରଭାବିତ ହୋଇଛନ୍ତି ବୋଲି ମଧ୍ୟ ଇମ୍ରାନ ସ୍ବୀକାର କରିବାକୁ ଭୁଲି ନଥିଲେ ।
@ANI
