ଟୋକିଓ: ଚଳିତ ସପ୍ତାହ ଆରମ୍ଭରୁ ଜାପାନରେ କୋହଳ ହୋଇଛି ଲକଡାଉନ କଟକଣା । ଏମିତିରେ ପର୍ଯ୍ୟାୟକ୍ରମେ ଦେଶରେ ସ୍ଥିତି ସ୍ବାଭାବିକ ହେବାରେ ଲାଗିଛି । ସପ୍ତାହ ପ୍ରାରମ୍ଭରେ ପର୍ଯ୍ୟଟନର ଦୁଇଟି ଆକର୍ଷଣ ବିନ୍ଦୁ, ନାଇଟ ଟୁର ଆରମ୍ଭ ହେବା ନେଇ ଘୋଷଣା ହୋଇଥିବା ବେଳେ ଗୁରୁବାର ଲୋକଙ୍କ ପାଇଁ ଖୋଲିଛି ପ୍ରସିଦ୍ଧ ଟୋକିଓ ଟାୱାର ।
333 ମିଟର ଲମ୍ବ ଏହି ଟୋକିଓ ଟାୱାରକୁ ଦେଖିବା ପାଇଁ ଦୁଇଟି ନିରୀକ୍ଷଣ ଡେକର ବ୍ୟବସ୍ଥା କରାଯାଇଛି । ଲକଡାଉନ କଟକଣା କୋହଳ ହୋଇଛି ସତ, ହେଲେ ଏବେ ବି ସଂକ୍ରମଣର ଭୟ ଲାଗି ରହିଥିବାରୁ ଲୋକଙ୍କୁ ସୁରକ୍ଷିତ ଦୂରତା ଅବଲମ୍ବନ କରିବା ପାଇଁ ପରାମର୍ଶ ଦିଆଯାଇଛି । ତେବେ ସୁରକ୍ଷା ଦୃଷ୍ଟିରୁ ଆଉ କିଛି ପଦକ୍ଷେପ ମଧ୍ୟ କାର୍ଯ୍ୟକାରୀ କରାଯାଇଛି । ସଂକ୍ରମଣରୁ ରକ୍ଷା ପାଇଁ ଗୋଟିଏ ଏଲିଭେଟରରେ 4 ଜଣ ଲୋକେ ଯିବା ପାଇଁ ଅନୁମତି ମିଳିଛି ।
ଯଦି କେହି ବୟସ୍କ ବା ଭିନ୍ନକ୍ଷମ ବ୍ୟକ୍ତି ଥାଆନ୍ତି ତେବେ ସେମାନଙ୍କୁ ପ୍ରଥମେ ସୁଯୋଗ ଦେବା ପାଇଁ କୁହାଯାଇଛି । ତେବେ ଅଧିକାଂଶ ପର୍ଯ୍ୟଟକଙ୍କୁ ଖୋଲା ଆକାଶ ତଳେ ଥିବା ପ୍ରାୟ 600 ପାହାଚ ଚଢିବାକୁ ହେବ ବୋଲି କୁହାଯାଇଛି । 150 ମିଟର ଉଚ୍ଚ ନିରୀକ୍ଷଣ ପ୍ଲାଟଫର୍ମରେ ପହଞ୍ଚିବା ପାଇଁ ଏହି ପାହାଚର ସ୍ବତନ୍ତ୍ର ବ୍ୟବସ୍ଥା କରାଯାଇଥିବା ମ୍ୟାନେଜମେଣ୍ଟ ପକ୍ଷରୁ ସୂଚନା ଦିଆଯାଇଛି । ସେପଟେ କାର୍ଯ୍ୟରତ କର୍ମଚାରୀଙ୍କୁ ସୁରକ୍ଷା ପାଇଁ ଫେସ ସିଲ୍ଡ, ମାସ୍କ ଓ ଗ୍ଲୋବ୍ସ ବ୍ୟବହାର ବାଧ୍ୟତାମୂଳକ କରାଯାଇଛି । ସୂଚନା ଅନୁଯାୟୀ କୋରୋନା ସଂକ୍ରମଣକୁ ନଜରରେ ରଖି ଏପ୍ରିଲ 8ରୁ ଟୋକିଓ ଟାୱାରକୁ ବନ୍ଦ କରାଯାଇଥିଲା ।
@IANS
