ସିଓଲ: ସୋସିଆଲ ମିଡିଆ ପ୍ଲାଟଫର୍ମରେ ଫେକ ନ୍ୟୁଜ୍ ବ୍ୟାପିବାକୁ ବେଶି ସମୟ ଲାଗିନଥାଏ । ଅଧିକାଂଶ ଲୋକେ ଏହି ପ୍ଲାଟଫର୍ମରେ ନିଜକୁ ବ୍ୟସ୍ତ ରଖୁଥିବାରୁ ଲୋକଙ୍କ ମଧ୍ୟରେ ଫେକ ନ୍ୟୁଜ୍ ମଧ୍ୟ ନିଆଁ ବେଗରେ ବ୍ୟାପିଯାଏ । ସେହିପରି ବେଆଇନ କଣ୍ଟେଣ୍ଟ ପାଇଁ ମଧ୍ୟ ଏବେ ସୋସିଆଲ ମିଡିଆ ଏକ ସହଜ ଓ ଶସ୍ତା ପ୍ଲାଟଫର୍ମ ପାଲଟିଛି କହିଲେ କିଛି ଭୁଲ ହେବ ନାହିଁ । ଏମିତିରେ ୟୁଟ୍ୟୁବ୍ରେ ଉଭୟ ଫେକ ନ୍ୟୁଜ୍ ଓ ବେଆଇନ କଣ୍ଟେଣ୍ଟକୁ ରୋକିବା ସହ ଏଗୁଡିକ ଉପରେ ମନିଟର କରିବାର ନିଷ୍ପତ୍ତି ନେଇଛି ଗୁଗୁଲ । ଏନେଇ ୟୁଟ୍ୟୁବ୍କୁ ଦକ୍ଷିଣ କୋରିଆ ସହ ସହଯୋଗ କରିବାକୁ ହେବ ବୋଲି ଗୁଗୁଲ ସ୍ପଷ୍ଟ କରିଛି ।
ଗୁଗୁଲର ବରିଷ୍ଠ ଉପାଧ୍ୟକ୍ଷ ନିଲ ମୋହନଙ୍କ ଏନେଇ କୋରିଆନ କମ୍ୟୁନିକେସନ କମିଶନ (କେସିସି) ଅଧ୍ୟକ୍ଷ ହାନ ସାଙ୍ଗ ହ୍ୟୁକଙ୍କ ସହ ଭିଡିଓ କନଫରେନ୍ସରେ ଆଲୋଚନା ହୋଇଛି । ତେବେ ଏହି ଆଲୋଚନାରେ ହ୍ୟାନ ଏହି ମନିଟରିଂ ପ୍ରସଙ୍ଗରେ ଅନୁରୋଧ କରିଥିଲେ । ସେ କହିଥିଲେ କି କୋରୋନା ମହାମାରୀ ନେଇ ୟୁଟ୍ୟୁବ୍ରେ ଅନେକ ମିଛ ଖବର ପ୍ରଚାର ହେଉଛି । ଏଥିସହ ଅନେକ ବେଆଇନ ଚର୍ଚ୍ଚା ମଧ୍ୟ ହେଉଥିବା ଦେଖାଯାଉଛି । ଯାହାକୁ ରୋକିବା ଅତି ଗୁରୁତ୍ବପୂର୍ଣ୍ଣ ବିଷୟ । ସେପଟେ ଦକ୍ଷିଣ କୋରିଆରେ ମଧ୍ୟ ନିକଟରେ ଡିଜିଟାଲ ଯୌନ ଶୋଷଣର ମାମଲା ସାମ୍ନାକୁ ଆସିଛି ।
ତେଣୁ ଏସବୁ ଅପରାଧିକ କାର୍ଯ୍ୟକଳାପକୁ ରୋକିବା ପାଇଁ ସମସ୍ତ କଣ୍ଟେଣ୍ଟ ଓ ସୋସିଆଲ ମିଡିଆରେ କାର୍ଯ୍ୟକଳାପକୁ ମନିଟରିଂ ଦେଇ ଗତି କରିବାକୁ ହେବ । ଗତ ବର୍ଷ ଗୁଗୁଲ ନିଜସ୍ବ ଉଦ୍ୟମରେ ଏହି କାର୍ଯ୍ୟକଳାପ ଉପରେ ରୋକ ଲଗାଇଥିଲା । ଯାହାକୁ ୟୁଜର୍ସଙ୍କ ପ୍ରତି ଅନ୍ୟାୟ ବୋଲି କେସିସି କହିଥିଲା । ଟେଲିକମ ନିୟମ ଉଲଙ୍ଘନ ଅଭିଯୋଗରେ ଗୁଗୁଲ ଉପରେ 720,000 ଡଲାରର ଫାଇନ ଲଗାଇଥିଲା କେସିସି ।
ଗତ ମାର୍ଚ୍ଚ ମାସରେ ଆଲଫାବେଟ ତଥା ଗୁଗୁଲ ସିଇଓ ସୁନ୍ଦର ପିଚାଇ ସ୍ପଷ୍ଟ କରିଥିଲେ କି କୋରୋନା ସଂକ୍ରମଣ ସମ୍ବନ୍ଧୀୟ ବିଭ୍ରାନ୍ତିକର ଭିଡିଓକୁ ୟୁଟ୍ୟୁବରୁ ହଟାଯାଇଛି । ଏଥିପାଇଁ ଆର୍ଟିଫିସିଆଲ ଇଣ୍ଟେଲିଜେନ୍ସ ବା ଏଆଇ ଟେକ୍ନୋଲୋଜିର ବ୍ୟବହାର କରାଯାଇଥିଲା ।
@IANS
