ହଂକଂ: ଆସନ୍ତା ଜୁଲାଇ 1ରେ ହେବାକୁ ଥିବା ଗଣତନ୍ତ୍ର ସମର୍ଥନ ରାଲି ବାତିଲ ନେଇ ଶନିବାର ସୂଚନା ଦେଇଛନ୍ତି ହଂକଂ ପୋଲିସ । ପ୍ରତିବର୍ଷ ଜୁଲାଇ 1ରେ ହଂକଂରେ ଏହି ରାଲି ଅନୁଷ୍ଠିତ ହେଉଥିବା ବେଳେ ଚଳିତବର୍ଷ ଜାତୀୟ ସୁରକ୍ଷା ଆଇନକୁ ନେଇ ଲାଗି ରହିଥିବା ଉତ୍ତେଜନାତ୍ମକ ପରିସ୍ଥିତି ପାଇଁ ଏହି ରାଲିକୁ ବାତିଲ କରାଯାଇଥିବା ଜଣାପଡିଛି । ଗତ 17 ବର୍ଷ ଧରି ଏହି ରାଲିର ଆୟୋଜନ ହେଉଥିବା ବେଳେ ଏହା ପ୍ରଥମ ଥର ହେବ କି ଗଣତନ୍ତ୍ର ସମର୍ଥନ ରାଲିକୁ ବାତିଲ କରାଯାଇଛି ।
ତେବେ ଏହା ଏକ ବିକ୍ଷୋଭ ରାଲି ହୋଇଥିବା ବେଳେ, 1997 ମସିହାରୁ ଏହି ରାଲି ଅନୁଷ୍ଠିତ ହୋଇଆସିଛି । ପ୍ରଥମେ ବ୍ରିଟିଶ ଅଧିକାରୀମାନେ ହଂକଂ ଉପରେ ଶାସନ ଚଳାଇଥିବା ବେଳେ ପରବର୍ତ୍ତୀ ସମୟରେ ଚୀନକୁ ଏହି ଦାୟିତ୍ବ ହସ୍ତାନ୍ତର କରାଯାଇଥିଲା । ହେଲେ ଚଳିତ ବର୍ଷ ଚୀନ ପ୍ରସ୍ତୁତ କରିଥିବା ଜାତୀୟ ସୁରକ୍ଷା ଆଇନ ଡ୍ରାଫ୍ଟ ଦ୍ବାରା ହଂକଂର ସ୍ବାଧୀନତା କ୍ଷୁର୍ଣ୍ଣ ହେବ ବୋଲି ମାନବାଧିକାର ଅଧିକାରୀମାନେ ସନ୍ଦେହ ପ୍ରକାଶ କରିଛନ୍ତି ।
ସୂଚନା ମୁତାବକ ହଂକଂ ଉପରେ ଚୀନର ଦବଦବାକୁ ହଂକଂବାସୀ ତୀବ୍ର ବିରୋଧ କରିଆସିଛନ୍ତି । ଏନେଇ ଦୀର୍ଘ ଦିନ ହେବ ହଂକଂରେ ଉତ୍ତେଜନାତ୍ମକ ପରିସ୍ଥିତି ଲାଗି ରହିଛି । ଦୈନିକ ଏହି ନୀତି ବିରୋଦ୍ଧରେ ବିକ୍ଷୋଭ ଜାରି ରହୁଛି । ସେପଟେ ଏହି ମାମଲାର ବିଚାର ପାଇଁ ହଂକଂ ମୁଖ୍ୟ କାର୍ଯ୍ୟକାରୀ କ୍ୟାରି ଲ୍ୟାମଙ୍କୁ ବିଚାରପତି ଚୟନର ଅଧିକାର ଦିଆଯିବାକୁ ମଧ୍ୟ ସାଧାରଣରେ ବିରୋଧ କରାଯାଇଛି । ହେଲେ କ୍ୟାରି ଚୀନର ଆଇନ ସପକ୍ଷରେ ନିଜ ସମର୍ଥନ ନେଇ ଖୋଲାଖୋଲି ଭାବେ ପ୍ରକାଶ କରିଛନ୍ତି । ଯାହା ନିଆଁରେ ଘିଅ ଢାଳିବା ପରି ହଂକଂବାସୀଙ୍କ ଭାବନାକୁ ଆଘାତ କରିଛି ।
@IANS
