ଢାକା: କିଛି ଦିନର ବିରତି ପରେ ବାଂଲାଦେଶକୁ ପୁଣି ଫେରିଛି କୋରୋନା ଆତଙ୍କ । ଦେଶରେ ହୁ ହୁ ହୋଇ କୋରୋନା ସଂକ୍ରମଣ ସଂଖ୍ୟା ବଢି ଚାଲିଥିବା ବେଳେ ଛତୁ ଫୁଟିବା ଭଳି ଉଭା ହେଉଛି ନୂଆ ନୂଆ ରେଡ ଜୋନ । ପ୍ରାୟ ଦୁଇ ସପ୍ତାହ ତଳେ ବାଂଲାଦେଶରେ ଲକଡାଉନ କଟକଣା କୋହଳ କରିବା ପାଇଁ ନିଷ୍ପତ୍ତି ନିଆଯାଇଥିଲା । ହେଲେ ଏହାର କିଛି ଦିନ ପରେ ରୋହିଙ୍ଗ୍ୟା ଶରଣାର୍ଥୀଙ୍କ କ୍ୟାମ୍ପ ପାଖ ଅଞ୍ଚଳରେ କୋରୋନାର ପ୍ରାଦୁର୍ଭାବ ଦେଖାଦେବାରୁ ପୁଣି ପର୍ଯ୍ୟାୟ କ୍ରମେ ଲକଡାଉନ ଲାଗୁ ପାଇଁ ଘୋଷଣା କରିଥିଲେ ହସିନା ସରକାର ।
ଏହି କ୍ରମରେ ସୋମବାର ସୁଦ୍ଧା ଦେଶରେ ପ୍ରାୟ 50ରୁ ଊର୍ଦ୍ଧ୍ବ ରେଡ ଜୋନ ଚିହ୍ନଟ ହୋଇଥିବା ଜଣା ପଡିଛି । ଏହି ଅଞ୍ଚଳଗୁଡିକରେ କୋରୋନା ସଂକ୍ରମଣ ସଂଖ୍ୟା ବଢିବା ସହ ମୃତ୍ୟୁ ସଂଖ୍ୟା ମଧ୍ୟ ବଢୁଥିବା ଦେଖାଯାଉଛି । ତେବେ ଚିହ୍ନଟ ହୋଇଥିବା ରେଡଜୋନ ମଧ୍ୟରେ ରାଜଧାନୀ ଢାକାରେ 45 ଓ ଛତ୍ତୋଗ୍ରାମ ଓ ଅନ୍ୟ ଉପଜିଲ୍ଲା ନାରାୟଣଗଞ୍ଜ, ଗାଜିପୁର ଓ ନରସିଙ୍ଗଡିର 11ଟି ଅଞ୍ଚଳ ରେଡ ଜୋନ ଭାବେ ଚିହ୍ନଟ ହୋଇଛି । ଏନେଇ ସୋମବାର ସୂଚନା ଦେଇଛି କୋରୋନା ଲଢେଇ ପାଇଁ ପ୍ରସ୍ତୁତ ଜାତୀୟ କମିଟି ।
ଏହି କମିଟିର ରିପୋର୍ଟ ମୁତାବକ ଢାକା ଓ ଛତ୍ତୋଗ୍ରାମର ରେଡ ଜୋନ ଗୁଡିକରେ ଗତ 14 ଦିନ ମଧ୍ୟରେ ପ୍ରାୟ 1 ଲକ୍ଷ ଟେଷ୍ଟିଂରୁ 60 ଜଣ ପଜିଟିଭ ଚିହ୍ନଟ ହୋଇଥିବାବେଳେ ଅନ୍ୟ ଅଞ୍ଚଳଗୁଡିକରେ 1ଲକ୍ଷରେ ମାତ୍ର 10 ଜଣ ପଜିଟିଭ ଚିହ୍ନଟ ହୋଇଥିବା ଦେଖାଯାଇଛି । ତେବେ ସଦ୍ୟ ଚିହ୍ନଟ ରେଡ ଜୋନ ଗୁଡିକରୁ ସାମ୍ପ୍ରଦାୟିକ ସଂକ୍ରମଣ ଯେପରି ଆରମ୍ଭ ନହୁଏ ସେଥିପାଇଁ ସମ୍ପୃକ୍ତ ଜିଲ୍ଲାର ଡାକ୍ତର, ସ୍ବାସ୍ଥ୍ୟକର୍ମୀ, ସଫେଇ କର୍ମଚାରୀ ଓ ପୋଲିସ ପ୍ରଶାସନ ସଜାଗ ହୋଇପଡିଛି । ହେଲେ ଏହି ଅଞ୍ଚଳଗୁଡିକରେ ଲକଡାଉନ କଟକଣା ଜାରି ଏପର୍ଯ୍ୟନ୍ତ କୌଣସି ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇନାହିଁ ।
ଏନେଇ ସ୍ବାସ୍ଥ୍ୟମନ୍ତ୍ରୀ ଜାହିଦ ମଲ୍ଲିକ ସୂଚନା ଦେଇଛନ୍ତି କି ଢାକାରେ ମୁଖ୍ୟତଃ ଲକଡାଉନ ଲାଗୁ ପାଇଁ ସମସ୍ତ ପ୍ରସ୍ତୁତି ସରିନଥିବାରୁ ପ୍ରକ୍ରିୟାରେ ବିଳମ୍ବ ହେଉଛି । ଯଦି ବିଭାଗୀୟ ଅଧିକାରୀମାନେ ସମ୍ପୃକ୍ତ ଅଞ୍ଚଳଗୁଡିକରେ ସୁରକ୍ଷା ଓ ଅନ୍ୟାନ୍ୟ ବ୍ୟବସ୍ଥାକୁ ତ୍ବରିତ କରିବେ ତେବେ ଦରକାର ପଡିଲେ 24 ଘଣ୍ଟା ମଧ୍ୟରେ ଏଠାରେ ଲକଡାଉନ ନିୟମ ଘୋଷଣା କରାଯିବ । ସେପଟେ ଢାକା ଉତ୍ତରାଞ୍ଚଳ ନଗର ନିଗମର ମୁଖ୍ୟ ସ୍ବାସ୍ଥ୍ୟ ଅଧିକାରୀ ବ୍ରିଗେଡିୟର ଜେନେରାଲ ମୋମିନୁର ରହମାନ ମାମୁନ କହିଛନ୍ତି କି ରେଡ ଜୋନ ଗୁଡିକରେ ସ୍ଥିତି ଅନୁଧ୍ୟାନ ଜାରି ରହିଛି । ବର୍ତ୍ତମାନ ହସ୍ତଗତ ରିପୋର୍ଟ ଆଧାରରେ ସମ୍ପୃକ୍ତ ଅଞ୍ଚଳରେ ଲୋକଙ୍କ ଗତିବିଧି ଉପରେ ଅନୁଧ୍ୟାନ କରାଯାଉଛି । ଏହା ରେଡ ଜୋନରେ ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରିବାରେ ସହାୟକ ହେବ ।
ସୂଚନା ମୁତାବକ ମେ’ 31ରେ ବାଂଲାଦେଶରେ ଲକଡାଉନ ଶେଷ ହୋଇଥିବା ବେଳେ ଧିରେ ଧିରେ କଟକଣା କୋହଳ କରାଯାଇଥିଲା । ହେଲେ ପୁଣି କିଛି ପଜିଟିଭ ମାମଲା ଚିହ୍ନଟ ହେବାରୁ ଅଞ୍ଚଳଗୁଡିକୁ ରେଡ, ୟେଲୋ ଓ ଗ୍ରୀନ ଜୋନ ଭାବେ ବିଭକ୍ତ କରାଯାଇ ପଦକ୍ଷେପ ଗ୍ରହଣ କରାଯାଇଛି । ଦେଶରେ ବର୍ତ୍ତମାନ ସୁଦ୍ଧା87,520 ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିସହ ମୃତ୍ୟୁ ସଂଖ୍ୟା 1171ରେ ପହଞ୍ଚିଥିବା ଜଣା ପଡିଛି ।
@IANS
