ଇସଲାମାବାଦ: ଆଉ ଦିନ କେଇଟା ପରେ ଆରମ୍ଭ ହେବ ରମଜାନର ମାସ । ଆସନ୍ତା ଏପ୍ରିଲ 23ରୁ ରମଜାନ ମାସ ଆରମ୍ଭ ହେବାକୁ ଥିବା ବେଳେ ଦେଶରେ କୋରୋନା ସ୍ଥିତି ମଧ୍ୟ ସଙ୍କଟାପନ୍ନ ହେବାରେ ଲାଗିଛି । ବର୍ତ୍ତମାନ ସୁଦ୍ଧା ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା 7125ରେ ପହଞ୍ଚିଥିବା ଏକ ଚିନ୍ତାଜନକ ବିଷୟ । ତେଣୁ ରମଜାନ ଆରମ୍ଭ ହେବା ପୂର୍ବରୁ ହିଁ ଉଚିତ ପଦକ୍ଷେପ ନେବା ପାଇଁ ପ୍ରଧାନମନ୍ତ୍ରୀ ଇମରାନ ଖାନ ଅପିଲ କରିଛନ୍ତି ।
ଗୁରୁବାର ନ୍ୟାସନାଲ କମାଣ୍ଡ ଆଣ୍ଡ ଅପରେସନ ସେଣ୍ଟର(ଏନସିଓସି) ସହ ଆୟୋଜିତ ବୈଠକରେ ଯୋଗ ଦେଇ ଇମରାନ ଏହି କଥା ସ୍ପଷ୍ଟ କରିଛନ୍ତି । ଏହି କମିଟି ସ୍ବତନ୍ତ୍ର ଭାବେ କୋରୋନା ମୁକାବିଲା ପାଇଁ ପ୍ରସ୍ତୁତ ହୋଇଥିବା ବେଳେ ଆବଶ୍ୟକସ୍ଥଳେ ଯେକୌଣସି ପଦକ୍ଷେପ ନେବାର ଏହି କମିଟି ପାଖରେ ଅଧିକାର ରହିଛି । ତେବେ ବୈଠକରେ ଇମରାନ କହିଥିଲେ କି ଗତ ଦୁଇ ଦିନରେ ଅଧିକ ଟେଷ୍ଟିଂ ହେଉଥିବାରୁ ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ବଢିବାରେ ଲାଗିଛି ।
ତେଣୁ ରମଜାନକୁ ନଜରରେ ରଖି ଦେଶରେ କୋରୋନା ସମ୍ବନ୍ଧୀୟ ଏକ ସବିଶେଷ ରିପୋର୍ଟ ପ୍ରସ୍ତୁତ କରିବାକୁ ଇମରାନ ନିର୍ଦ୍ଦେଶ ଦେଇଛନ୍ତି । ସେ କହିଛନ୍ତି ଯେ, ଏହି ରିପୋର୍ଟରେ ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା, ମୃତ୍ୟୁ ସଂଖ୍ୟା, ଟେଷ୍ଟିଂ ସଂଖ୍ୟା ଓ ଆକ୍ରାନ୍ତଙ୍କ ବର୍ତ୍ତମାନ ସ୍ବାସ୍ଥ୍ୟାବସ୍ଥା ବିଷୟରେ ତଥ୍ୟ ଦେବାକୁ ହେବ । ଏହି ଆଧରରେ ହିଁ ପରବର୍ତ୍ତୀ ପଦକ୍ଷେପ କ’ଣ ନିଆଯାଇପାରିବ ତାହା ନିର୍ଦ୍ଧାରଣ କରାଯିବ ।
