ଢାକା: ପ୍ରାୟ 2 ମାସର ବିରତି ପରେ ଜୁନ ମାସ ଶେଷ ସୁଦ୍ଧା ଅନ୍ତର୍ଜାତୀୟ ବିମାନ ସେବା ଆରମ୍ଭ କରିବ ବାଂଲାଦେଶ । ଏନେଇ ମଙ୍ଗଳବାର ସରକାରୀ ଭାବେ ଘୋଷଣା କରାୟାଇଛି । ଏହି ସୂଚନା ଅନୁଯାୟୀ ଜୁନ ମାସ ତୃତୀୟ ସପ୍ତାହରେ ସମସ୍ତ ଅନ୍ତର୍ଜାତୀୟ ଉଡାଣ ସ୍ବାଭାବିକ ହେବ । ଏନେଇ ଗଣମାଧ୍ୟମକୁ ସୂଚନା ଦେଇଛନ୍ତି ବେସାମରିକ ବିମାନ ଚଳାଚଳ ଓ ପର୍ଯ୍ୟଟନ ବିଭାଗ ସଚିବ ମହମ୍ମଦ ମୋହିବୁଲ ହକ ।
ଗତ କିଛି ଦିନ ହେବ ଦେଶରେ କୋରୋନା ସଂକ୍ରମଣ ପୁଣି ଫେରିଥିବା ବେଳେ ରୋହିଙ୍ଗ୍ୟା ଶରଣାର୍ଥୀ କ୍ୟାମ୍ପ ନିକଟସ୍ଥ ଅଞ୍ଚଳଗୁଡିକୁ ରେଡ ଜୋନ ଭାବେ ଘୋଷଣା କରାଯାଇଥିଲା । ପରେ ପରେ ପର୍ଯ୍ୟାୟକ୍ରମେ ପୁଣି ଦେଶରେ ଆବଶ୍ୟକୀୟ ସ୍ଥାନରେ ଲକଡାଉନ ଜାରି ହେବ ବୋଲି ସୋମବାର ସରକାର ସ୍ପଷ୍ଟ କରିଥିଲେ । ଏପରି ସ୍ଥିତିରେ ଦେଶ ପୁଣି ଅନ୍ତର୍ଜାତୀୟ ବିମାନ ସେବା ପାଇଁ ପ୍ରସ୍ତୁତ ରହିଥିବା ଘୋଷଣା କରିଛି । ଏହି କ୍ରମରେ ବିମାନ ସେବା ସ୍ବାଭାବିକ ହେବା ପରେ ଲଣ୍ଡନ ଓ କତାରକୁ ପ୍ରଥମ ଉଡାଣ ଭରିବ ବୋଲି ସୂଚନା ରହିଛି ।
ମୋହିବୁଲଙ୍କ ପ୍ରଦତ୍ତ ସୂଚନା ମୁତାବକ ବିମାନ ବାଂଲାଦେଶ ଏୟାରଲାଇନ୍ସ ଲଣ୍ଡନକୁ ଉଡାଣ ଭରିବାକୁ ଥିବା ବେଳେ ବ୍ରିଟିଶ ଏୟାରୱେଜ ଏହି ରୁଟକୁ ଅନୁସରଣ କରିପାରିବେ । ସେହିପରି କତାର ଏୟାରୱେଜ ମଧ୍ୟ ସ୍ବାଭାବିକ ଉଡାଣ ଆରମ୍ଭ କରିପାରିବ ବୋଲି ସେ କହିଛନ୍ତି । ତେବେ ବିଶ୍ବରେ କୋରୋନା ଆତଙ୍କ ପାଇଁ ଅନ୍ତର୍ଜାତୀୟ ଉଡାଣ ବାତିଲ ରହିଛି । ଏମିତିରେ ଜୁନ 1 ରୁ ବାଂଲାଦେଶରେ ଘରୋଇ ବିମାନ ଉଡାଣ ଆରମ୍ଭ ହୋଇଥିବା ବେଳେ ଅନ୍ତର୍ଜାତୀୟ ବିମାନ ସେବା ବନ୍ଦ ରହିଥିଲା । ଯାହା ଜୁନ ମାସ ଶେଷ ସୁଦ୍ଧା ସ୍ବାଭାବିକ ହେବ ବୋଲି ସ୍ପଷ୍ଟ ହୋଇଛି ।
@IANS
